Chaka ichi chiŵenge chachitatu kuti ungano withu wa chigaŵa uŵe na mazgu ghakujamburika ghakulongosora mavidiyo. Mavidiyo agho muli mazgu ghakujamburika, ni mavidiyo agho ŵakulongosora vithuzi na ivyo vikuchitika mu vidiyo ndipo ghakugwiliskirika ntchito na awo ŵakuleka kulaŵiska panji ŵali na suzgo la maso. Ŵakaboni ŵa Yehova ŵakulutilira kuŵikapo mtima kupanga mavidiyo agho muli mazgu ghakulongosora ivyo vikuchitika mu vidiyo mwakuti uthenga wa mu Baibolo ufikeso ku ŵanthu 43 miliyoni pa charu chose awo mbambura kulaŵiska kweniso ŵanyake 295 miliyoni awo ŵali na suzgo la maso.

Dr. Joel Snyder, uyo ni pulezidenti wa Audio Description Associates, LLC kweniso nkhwantha yakumanyikwa makora yakuwona vya mazgu ghakujamburika ghakulongosora mavidiyo, wakati: “Nkhuwonga chomene Ŵakaboni ŵa Yehova chifukwa cha kuŵikapo mtima kuti ŵawovwire awo ŵakuleka kulaŵiska panji ŵali na suzgo la maso. Ŵanthu ŵanandi ŵalije navyo ntchito vyakuti mu mavidiyo ghawo ŵaŵikemo mazgu ghakujamburika ghakulongosora ivyo vikuchitika mu vidiyo na chilato cha kovwira awo ŵakuleka kulaŵiska. Pa chifukwa ichi, tikuti waka ‘yewo chomene’ Ŵakaboni ŵa Yehova.”

Apo Wupu Wakulongozga ukati ungano wa chigaŵa wa 2020 uŵikikenge pa intaneti chifukwa cha muliri, pakapangika ndondomeko yakuti mavidiyo ghaŵe na mazgu ghakujamburika ghakulongosora ivyo vikuchitika mu vidiyo. Mu 2020, Dipatimenti ya Vyakung’anamura ku Likuru la Ŵakaboni ŵa Yehova ku Warwick, New York, U.S.A., yikapanga mazgu ghakulongosora ivyo vikuchitika mu mavidiyo gha ungano. Mu 2021, ntchito iyi yikapelekeka ku Dipatimenti Yakuwona vya Kulemba ku Watchtower Educational Center of Jehovah’s Witnesses ku Patterson, New York. Awo ŵakuchita mulimo wa kupanga mazgu ghakulongosora ivyo vikuchitika mu vidiyo ŵakasambizgika umo ŵangachitira kuti ŵapange mazgu ghawemi chomene ndipo ŵakasambira kwizira pa intaneti.

Dr. Snyder wakulongosora kuti “mungasambizga ŵanthu umo ŵangachitira kuti ŵalongosorenge mu nthowa yiwemi chomene kweniso yakovwira.” Iyo wakati ivi vikusazgapo “kugwiliskira ntchito mazgu agho ngafupi, ghakupulikikwa makora, kweniso ghakovwira kuti munthu waghanaghanirengepo ivyo wapulika.”

Awo ŵakuchita mulimo uwu ŵakwamba dankha kutegherezga mazgu pera gha mu vidiyo, kwambura kuwonelera vidiyo yenecho, ndipo ivi vikovwira kuti ŵapulikiske umo munthu wambura kulaŵiska panji uyo wali na suzgo la maso wangakapulikiskira chigaŵa icho. Waliyose uyo wali pa gulu ili wakulemba ivyo wakupulika. Kufuma apo mbwenu ŵakujura vidiyo, kuwona apo ŵakwenera kuyima, chifukwa umo vidiyo yikuleka dankha kuyowoya ndipo ŵakuŵika mazgu ghakulongosora vidiyo.

Kweni kuŵika mu vidiyo mazgu ghakulongosora ivyo vikuchitika mu vidiyo nako ni suzgo pa iko kwekha. Michael Millen uyo wakovwirapo pa mulimo wakupanga mazgu ghakulongosora ivyo vikuchitika mu vidiyo wakuti: “Chifukwa chakuti mpata ukuŵa uchoko, tikwenera kusankha mazgu agho ngakuzirwa chomene kuti ŵanthu ŵakaleke kusuzgika kupulikiska ivyo vikuchitika mu vidiyo. Tikuŵikapo mtima kulongosora nyengo, malo, awo ŵali mu vidiyo, na ivyo vikuchitika.”

Awo ŵakupanga mazgu ghakulongosora ivyo vikuchitika mu vidiyo ŵakwenera yayi kuyowoya maghanoghano ghawo pa nkhani ya ivyo ŵakuwona mu vidiyo. Mu buku lake lakuti The Visual Made Verbal, Dr. Snyder wakuphalira awo ŵakupanga mazgu ghakulongosora ivyo vikuchitika mu vidiyo kuti: “Ŵapani mwaŵi awo ŵakutegherezga kuti ŵaghanaghane ŵekha ivyo vikwenera kuti vikuchitika mu vidiyo m’malo mwakuti imwe ndimwe muchite kuŵaphalira chilichose. Ichi chikung’anamura kuti mukwenera yayi kuyowoya kuti: ‘Ngana wakwiya,’ panji ‘Ngana wakhuŵara.’ M’malo mwake, yowoyani kuti: ‘Ngana walunga fayiti,’ panji ‘Ngana wakulira.’”

Para awo ŵakupanga mazgu ghakulongosora vidiyo ŵamara kulemba mazgu agha, munthu munyake wakujambura mazgu agha kuti ghaŵikike mu vidiyo yenecho. Uyo wakujambura mazgu agha wakwenera kuyowoya mwakuzikira kweniso ghakwenelera kupulikikwa mwakuyana waka. Michael Millen wakuti: “Munthu uyo wakujambura mazgu agha wakwenera kuwoneseska kuti mazgu ghake ghaleke kuŵa nga kuti nayo ni munthu uyo wali mu vidiyo yenecho. Nakuti para munthu uyo wakujambura mazgu agha wangathukutera chomene panji kukhwaskika chomene na ivyo vikuchitika, mbwenu uyo wakutegherezga wambenge kughanaghana kuti nayoso ni munthu uyo wali mu vidiyo yenecho.”

Kufuma apo, ŵanyake awo ŵakunozga ivyo vyajambulika, ŵakunozgamo munyake na munyake, mbwenu paumaliro ŵakuvitumizga ku maofesi gha munthavi ghose kuti ghakang’anamure na kujambura mazgu ghakulongosora vidiyo agha. Michael wakuti pa maungano gha chigaŵa ghatatu agho ghajumpha, ntchito yakupanga mazgu ghakulongosora ivyo vikuchitika mu vidiyo yikatoranga maora ghatatu pa miniti yiliyose ya mu vidiyo.

Pasono Ŵakaboni ŵa Yehova ŵakung’anamura mabuku mu viyowoyero vyakujumpha 1,000. Nangauli pa chiŵelengero ichi palije ntchito ya kung’anamura mazgu ghakulongosora ivyo vikuchitika mu vidiyo, kweni ŵanyake ŵakuwona kuti nayo ntchiyowoyero payekha. Michael wakuti: “Mazgu ghakulongosora ivyo vikuchitika mu vidiyo ghakovwira chomene awo ŵakuleka kulaŵiska. Tikung’anamura ivyo vikuchitika mu vidiyo kuti nawo ŵapulikiskenge makora.”

Tikuwonga chomene kuti Yehova wakuwoneseska kuti ŵanthu wose ŵasange chandulo na chakurya chauzimu icho tikupokera!—Yesaya 65:13.