Pa July 5, 2024, Mubali Colin Carson, uyo ngwa mu Komiti ya Munthavi ku Malawi, wakafumiska Baibolo la Mang’anamuliro gha Charu Chiphya Mateyu–Uvumbuzi mu chiyowoyero cha mawoko ku Malawi. Baibolo ili likafumiskika pa zuŵa lakwamba la Ungano wa Chigaŵa wa 2024 wa mutu wakuti “Pharazgani Makani Ghawemi!” uwo ukachitikira ku Lilongwe, Malawi. Ndipo pa ungano uwu pakawungana ŵanthu ŵakukwana 331. Nyengo yeneyiyo Baibolo la pa intaneti likamba kusangika kuti ŵanthu ŵachite dawunilodi pa jw.org kweniso pa JW Library Sign Language app.

Aka nkhakwamba kuti Baibolo lose Mateyu–Uvumbuzi lifumiskike mu Chiyowoyero cha Mawoko ku Malawi, ndipo ŵanthu ŵakujumpha 400,000 ndiwo ŵakuyowoya chiyowoyero ichi ku Malawi. Pasono, ŵabali na ŵadumbu ŵakujumpha 600 ŵakuteŵetera mu mipingo 16 ya chiyowoyero cha mawoko kweniso mu magulu 8 ku Malawi.

Pa July 19, 2024, Mubali Gage Fleegle, wa mu Wupu Wakulongozga, wakafumiska Baibolo lakunozgekaso la Malemba Ghakupatulika mu Mang’anamuliro gha Charu Chiphya mu Chibemba. Baibolo ili likafumiskika pa zuŵa lakwamba la Ungano wa Chigaŵa wa 2024 wa mutu wakuti “Pharazgani Makani Ghawemi!” uwo ukachitikira ku Sitediyamu ya Levy Mwanawasa ku Ndola, Zambia. Ŵanthu ŵakukwana, 23,336 ndiwo ŵakaŵapo pa ungano uwu maso na maso. Ndipo ŵanthu ŵanyake ŵakukwana 5,920 awo ŵakaŵa mu malo ghanyake 5 gha ungano wa chigaŵa, nawo ŵakawonelera pulogiramu iyi kwizira pa videoconference. Waliyose uyo wakaŵapo pa malo 6 gha ungano uwu wakapokera Baibolo lakuchita kupulinta la Mang’anamuliro gha Charu Chiphya. Baibolo lose kweniso Mabuku gha mu Baibolo ghakuchita kutegherezga gha, Rute, 1 Yohane, 2 Yohane, na 3 Yohane ghakamba kusangika kuti ŵanthu ŵachite dawunilodi.

Baibolo la Malemba Ghakupatulika mu Mang’anamuliro gha Charu Chiphya mu Chibemba likafumiskika kakwamba mu 2008. Ŵanthu pafupifupi 4 miliyoni ŵakuyowoya Chibemba ku Zambia, kusazgapo ŵabali na ŵadumbu ŵakukwana 131,351 awo ŵali mu mipingo 1,856 na magulu 8.

Pa July 19, 2024, Mubali José Torres, wa mu Komiti ya Munthavi ku Central America, wakafumiska Baibolo la Makani Ghawemi la Mateyu mu chiyowoyero cha Chiquiche. Baibolo ili likafumiskika pa Ungano wa Chigaŵa wa 2024 wa mutu wakuti “Pharazgani Makani Ghawemi!” ku San Lucas Sacatepéquez, Guatemala. Ŵanthu wose 405 awo ŵakaŵapo pa ungano uwu ŵakapokera Baibolo lakuchita kupulinta ili. Kweniso lakuti ŵanthu ŵachite dawunilodi likamba kusangika nyengo yeneyiyo pa jw.org na pa JW Library app.

Vikuwoneka kuti ŵanthu ŵakujumpha 4 miliyoni ŵakuyowoya Chiquiche. Ŵanandi mwa ŵanthu aŵa ŵakukhala ku Guatemala, ndipo ndiko mpingo wa chiyowoyero ichi ukambiskika mu 2010. Pasono, kuli ŵabali na ŵadumbu ŵakukwana 387 awo ŵakuteŵetera mu mipingo 16.

Pa July 28, 2024, kukaŵa ungano wapadera ku Estádio Nacional do Zimpeto ku Maputo, Mozambique. Ŵanthu ŵakukwana 26,025 ndiwo ŵakategherezga ungano uwu maso na maso. Ŵanyake ŵakukwana 64,570 ŵakawonelera ungano uwu kwizira pa videoconference mu malo gha ungano ghakupambanapambana 16.

Pa ungano uwu, Mubali Fleegle wakafumiska Mabaibolo mu viyowoyero vyakupambanapambana, ndipo nyengo yeneyiyo Mabaibolo ghakuchita kupulinta kweniso gha pa intaneti ghakamba kusangika mu viyowoyero vyose ivi. Iyo wakafumiska Baibolo la Makani Ghawemi la Mateyu mu chiyowoyero cha Chimakhuwa-Meetto, Chimakhuwa-Shirima, na Chinsenga (Mozambique); kweniso Baibolo la Mang’anamuliro gha Charu Chiphya Mateyu—Uvumbuzi mu Chichuabo, Chiphimbi, kweniso Chitewe; na Baibolo lose la Malemba Ghakupatulika mu Mang’anamuliro gha Charu Chiphya mu Chitshwa.

Chifukwa cha kufumiskika kwa ma Baibolo agha mu viyowoyero ivi, pasono ndikuti Baibolo la Mang’anamuliro gha Charu Chiphya likusangika lose panji chigaŵa waka mu viyowoyero vyakujumpha 300!