DECEMBER 8, 2022
NKHANI ZA PA CHARU CHOSE

Mubali Dubovenko na Litvinyuk Ŵapika Chilango Chakugwira Jele Vyaka 6

JULANI

Pa November 30, 2022, Khoti la mu Msumba wa Armyanskiy ku Crimea likati Mubali Aleksandr Dubovenko na Aleksandr Litvinyuk ŵali na mulandu. Ŵabali aŵa ŵali kupika chilango chakuti ŵakagwire jele vyaka 6 ndipo nyengo yeneyiyo ŵakaluta nawo kukaŵajalira.

Vyakukhwaskana na ŵanthu aŵa

Aleksandr Dubovenko

Chaka cha kubabikira: 1973 (Ochakiv, Ukraine)

Mbiri yake: Wakagwiranga ntchito ya kotchelera visulo, ya vyamagesi, na ukalipentara.Wakatorana na Irina mu 1999

Amama ŵake ŵakaŵa Kaboni wa Yehova, ndiwo ŵakamusambizga unenesko. Wakakondwa wati wamanya ivyo Baibolo likulayizga vyakukhwaskana na paradiso pa charu chapasi. Wakabatizika mu 1999

Ivyo Wakayowoya a

Kasi ukatonda wuli suzgo lakuŵa pa jele la panyumba?

Kwa myezi yakujumpha 13, nkhazomerezgeka yayi kuyowoyeskana na waliyose uyo wakaŵa kuwaro kwa nyumba yane padera pa awo ŵakafufuzanga mulandu wane panji maloya. Nichali kukanizgika kuyowoyeskana na waliyose uyo ni Kaboni wa Yehova. Kweni nkhaghanaghanirapo pa chiyelezgero chiwemi cha Eliya. Wakaŵa mu mapopa ndipo wakasuzgika chomene. Ndipouli, Yehova wakamukhozga Eliya, wakamuphalira kuti wali yekha yayi. Yehova wakamutaya yayi Eliya, ndipo nane nili na chigomezgo chose kuti Yehova wanisidenge yayi napachoko.

Aleksandr Litvinyuk

Chaka cha kubabikira: 1960 (Amangeldi, Kazakhstan)

Mbiri yake: Wakagwiranga pa chemical plant kweniso wakachitanga ntchito ya kotchelera visulo. Wakatorana na Nadezhda mu 1979. Ŵali na ŵana ŵanalume ŵaŵiri na mwana mwanakazi

Wakajifumbanga chifukwa icho Chiuta wazomerezgera masuzgo na uheni. Wakasanga mazgoro pamanyuma pakuti iyo na Nadezhda ŵamba kusambira Baibolo na Ŵakaboni ŵa Yehova. Wakabatizika mu 1993

Ivyo Wakayowoya b

Kasi ukachita wuli kunozgekera kusangana na nthambuzgo?

Nati namba kupulika ivyo vikachitikiranga ŵabali na ŵadumbu ŵane, nkhawona kuti ningakwaniska yayi kuzizipizga nthambuzgo. Nkhasanga kuti nkhaŵa wakunozgeka yayi. Nkhamba kuŵazga na kughanaghanirapo nkhani za mu Baibolo za awo ŵakazizipizga masuzgo. Nkhasambira umo ŵakazizipizgira masuzgo kweniso umo ŵakagomezgeranga chomene Yehova. Apo nkhaŵazganga nkhani izi, nkhajitoranga nga vikuchitikira ine. Ine na muwoli wane tikuŵazgaso nkhani za ŵabali na ŵadumbu ŵakugomezgeka ŵa mazuŵa ghano. Ivi vikukhozga chomene chipulikano chithu ndipo tikujipulika makora apo tikunozgekera ivyo vizenge munthazi.

Kasi mukuwona kuti malurombo gha ŵanji ghamovwirani wuli?

Nkhuthiska masozi para nkhupulika kuti ŵabali na ŵadumbu ŵakunilombera nyengo zose. Ŵakunilombera kwa Yehova kuti nichitenge vinthu mwakuzikira, kuti niŵe wachikanga, kweniso kuti niŵe wankhongono. Pambere khoti lindambe kutegherezga mulandu wane, mubali munyake wakanifumbanga usange namuphalira Yehova vinthu ivyo nkhufipa navyo mtima pa mulandu wane. Mubali uyu wakazunuranga mu lurombo lwake vinthu vyakuyana waka apo wakalindiliranga kuwaro. Ivi vikanikhozganga chomene.

Tikupembuzgika kumanya kuti Yehova nyengo zose wakuŵa nase kulikose kweniso panyengo yiliyose iyo tasangana na masuzgo.—Salimo 139:7-12.

Nyengo

August 2, 2021

Ŵakaŵapa mulandu. Ŵabali wose ŵaŵiri ŵakapika mulandu chifukwa chakuchita maungano na gulu ilo wakuti likuchita vinthu mwakutalulira
August 5, 2021

Ŵakasecha nyumba za Ŵakaboni ŵa Yehova 8, pamoza na nyumba ya Dubovenko na Litvinyuk. Mubali Litvinyuk wakakakika na kumuŵika mu jele lakulindiliramo awo mulandu wawo underuzgike
August 6, 2021

Mubali Litvinyuk wakafumiskika mu jele lakulindiliramo na kumuŵika mu jele la panyumba
August 9, 2021

Kachiŵiri, ŵamazaza ŵakasecha nyumba ya Dubovenko. Aleksandr wakafumbika mafumbo na kumuŵika mu jele la panyumba
August 11, 2021

Mubali Litvinyuk wakapika mulandu wakuti wakachitanga milimo na gulu ilo ŵakuti likuchita vinthu mwakutalulira
February 8, 2022

Mubali Dubovenko wakapika mulandu wakuti wakachitanga vinthu na gulu ilo wakuti likuchita vinthu mwakutalulira
April 29, 2022

Khoti likamba kutegherezga mulandu. Mweruzgi wakakana ivyo Mubali Litvinyuk wakapempha kuti wakawonane na dokotala na kupokera wovwiri pa nyengo iyo wakaŵa mu jele la panyumba
September 8, 2022

Ŵabali aŵa ŵakazomerezgeka kufumapo pa nyumba zawo pakati pa 7:00 koloko mulenji na 7:00 koloko namise
November 30, 2022

Ŵabali wose ŵaŵiri ŵakapika mulandu kukagwira jele vyaka 6