Mu chaka cha uteŵeti cha 2020 tachita ntchito yikuru chomene yakovwira para kwachitika soka, ndipo ntchito iyi yikulutilira. Pa charu chose pakapangika Makomiti Ghakovwira Para Kwachitika Soka ghakujumpha 950. Padera pa muliri, mu chaka cha 2020 mwachitikaso vinthu vyamabuchi kweniso masoka gha chilengiwa ghanandi. Makomiti Ghakovwira Para Kwachitika Soka nagho ghakasangana na suzgo linyake pa ntchito yawo ya kupeleka wovwiri ku ŵabali uku ŵakulondezga malango gha kujivikililira ku muliri wa COVID-19. Ŵabali na ŵadumbu awo ŵakawovwirapo pa masoka agha, ŵakuyowoya kuti chipulikano chawo chakhozgeka chomene. Musi umu muli vinyake ivyo vikachitikira ŵabali ŵithu:

Mu chaka cha uteŵeti cha 2020, mukalokwa vula zikuruzikuru chomene zakukwana 126 izo zikapangiska kuti ŵabali ŵithu ŵasuzgike. Apa chiŵelengero ichi chikasazgikira na 11.5 peresenti kuyaniska na izo zikalokwa mu chaka cha uteŵeti cha 2019. Vula izi zikapangiska kuti maji ghasefukire chomene kweniso kuti charu chilindimukenge.

Mwachiyelezgero, vimphepo vinandi ivyo vikwiza na vula vyakuchemeka tropical cyclones vikaputa ku Philippines, ndipo vikapangiska ŵapharazgi ŵanandi kusamuka mu nyumba zawo.

Chivula chikuru icho chikalokwa ku Nigeria chikananga mbewu za ŵabali ŵithu.

Vula ya mswera ku South Korea yikasakaza vinthu vinandi chomene.

Moto uwo ukwamba wekha ukasakaza vinthu vinandi chomene mu vyaru vinandi, ndipo ku malo ghanyake kakaŵa kakwamba kuti kubuke moto wakofya nthena.

Mwachiyelezgero, ŵabali ŵithu ŵanyake ŵakasangana na masuzgo chifukwa moto uwu ukasakaza malo ghakuru pafupifupi maekala 1 miliyoni.

Ivi ndivyo vikachitika ku United States.

Ŵabali ŵithu ŵa ku Australia nawo ŵakakhwaskika na moto wakofya wanthena uwu.

Apo masoka agha ghakachitikanga, gulu likapanga ndondomeko ya umo awo ŵakupeleka kweniso kupokera wovwiri ŵangachitira kuti umoyo wawo uŵe wakuvikilirika.

Mubali Han Chan-hee, uyo wakaŵa mu Komiti Yakovwira Para Kwachitika Soka ku South Korea, wakulongosora vinyake ivyo ŵakachitanga kuti ŵavikilire ŵabali na ŵadumbu: “Mulenji uliwose tikapimanga umo thupi la waliyose likotchera, kukhala mwakutalikirana na ŵanyithu, kuŵa na ŵanthu ŵachoko waka pa malo agho tikugwilira ntchito, na kuleka kuwungana pamoza pa nyengo ya chakurya na kupumura. Padera pa ivi, awo ŵakajipeleka kovwirapo ŵakapuputanga na munkhwala ivyo ŵagwiliskirenge ntchito kweniso para ŵamalira.”

Ŵabali ŵithu ŵanyake nyumba zawo zikanangikirathu panji ŵakasama chifukwa cha masoka agha. Mubali Chris Shirah, uyo wakaŵa mu Komiti Yakovwira Para Kwachitika Soka pa nyengo iyo kukabuka moto cha kumanjiliro gha dazi kwa United States, wakulongosora kuti: “Tikasandanga mwakupwelelera unandi wa ŵanthu awo tikaŵatumanga ku nyumba yiliyose mwakuti tilondezge malango gha kujivikilira ku muliri wa COVID-19.”

Mu vigaŵa vinandi, chiŵelengero cha awo ŵakapelekanga wovwiri chikachepeskekanga chifukwa cha malango agho ghakaŵikika gha kujivikilira ku muliri. Mubali Philips Akinduro, uyo wakaŵa mu Komiti Yakovwira Para Kwachitika Soka ku Nigeria, wakulongosora kuti: “Suzgo likuru likaŵa lakuti boma likakanizga kwenda ku malo ghanyake. Ntheura chikaŵa chakusuzga kusanga ŵanthu ŵakujipeleka awo ŵakakhumbikwanga.”

Mubali Kim Joon-hyeong, uyo nayo wakaŵa mu Komiti Yakovwira Para Kwachitika Soka ku South Korea, wakulongosora umo ŵakajipulikiranga para ŵachitako ntchito ya kovwira ŵanji “Pakuti tikuchita ntchito iyi chifukwa chakuti tikumutemwa Chiuta na ŵabali ŵithu, tikaŵanga maso kuti tileke kuŵika umoyo withu kweniso wa ŵabali ŵithu pangozi pakuchita ntchito iyi. Nangauli tikaŵa na malango ghanandi ghakuti tilondezge, kweni tikalutilira kuŵa ŵakukondwa pakuchita ntchito yithu.”

Pakuti awo ŵakachitako ntchito iyi ŵakafiska mulimo wawo nangauli pakaŵa vyakujandizga vinandi, chipulikano chawo chikakhozgeka chomene.

Mwachiyelezgero, Mubali Han wakafipanga mtima usange ŵanthu ŵakujipeleka kovwira pa ntchito iyo ŵasangikenge mwaluŵiro kuti ŵambe kugwira ntchito yawo pambere pandajumphe maora 24. “Mu maora ghachoko waka, nkhawamo kuti nkhasuzgikanga waka na kufipa mtima. Ŵabali na ŵadumbu ŵanandi ŵakajipeleka kufuma mu vigaŵa vyakupambanapambana mu charu chithu. Ŵakajipeleka ŵanandi chomene mwakuti m’paka ŵanyake tikachita kuŵaphalira kuti mbwenu ŵakwana.” Mubali uyu wakumalizga kuti: “Nkhuwona kuti Yehova wakaŵa nase nadi, ndipo ichi ntchakukhozga chomene.”

Mwakuyana waka, Mubali Brad Benner ku Honduras wakulongosora umo wakajipulikira wati wawovwirapo apo kukaputa chimphepo cha hurricane wakuti: “Nangauli yanguŵa nyengo yakusuzga, kweni ŵabali ŵithu ŵakasanga chakurya, pakukhala, na kukhozgeka mwauzimu. Najiwonera nekha kuti nanga ni vimphepo vyakofya ivi panji muliri, vingatitondeska yayi kulongorana chitemwa mu gulu la Yehova ili.”

Mubali Alquin Dayag, uyo wakaŵa mu Komiti Yakovwira Para Kwachitika Soka ku Philippines, wakumalizga kuti: “Ivyo vyachitika vyanovwira kumanya fundo yakuti Yehova wakupeleka nadi mwawanangwa nkhongono zakuluska za kawiro kweniso vinjeru kuti tifiske kuchita ntchito iyi.”—2 Ŵakorinte 4:7.

Tikuwonga chomene vyose ivyo maofesi gha munthavi, Makomiti Ghakovwira Para Kwachitika Soka, na ŵabali na ŵadumbu ŵanandi ŵakuchita pakovwirapo pa ntchito ya kupeleka wovwiri iyi. Kujipeleka uko ŵabali ŵachita kweniso vyawanangwa ivyo ŵakupeleka, vyawovwira kuti ŵabali na ŵadumbu ŵithu ŵasange wovwiri mu chaka icho mwachitika masoka ghanandi ichi.—1 Ŵatesalonika 1:3.