Mu chaka cha uteŵeti cha 2020, Ŵakaboni ŵa Yehova pa charu chose ŵangusangana na masuzgo ghakupambanapambana pa milimo yawo iyo ŵakuchitira Chiuta. Kweni masuzgo agha ghapangiska kuti ŵabali na ŵadumbu ŵithu ŵalongore nadi kuti ŵakuŵikapo mtima chomene kulutilira kuŵa ŵakugomezgeka kwa Chiuta kweniso kuti mbakukolerana.

Suzgo likuru languŵa muliri wa COVID-19, uwo watimbanizga chomene vinthu pa charu chose kuluska kumanyuma kose uku.

Ŵakaboni ŵa Yehova ŵakachitapo kanthu mwaluŵiro chomene, muliri wati wamba waka kuthandazgika. Ŵakasanga nthowa ziphya za umo ŵangachitira kuti ŵalutilire kusopa, kukhozgana kweniso kupharazga makani ghawemi.

Wonani zinyake mwa ‘nkhani ziwemi’ izo zachitika mu chaka chambura kuluwika ichi.—Zintharika 15:30.

Mu chaka cha uteŵeti ichi, gulu lithu lafumiska mabaibolo gha Malemba Ghakupatulika mu Mang’anamuliro gha Charu Chiphya, Baibolo lose panji chigaŵa waka, mu viyowoyero 36. Chifukwa cha muliri wa COVID-19, Mabaibolo ghanandi agho ghali kufumiskika nga pa intaneti pera, ndipo ghakafumiskika pa maungano agho ghakajambulikirathu. Pasono Baibolo la Malemba Ghakupatulika mu Mang’anamuliro gha Charu Chiphya, Baibolo lose panji chigaŵa waka, likusangika mu viyowoyero 193.

Kufuma pa March 18, 2020, ŵabali ŵa mu Wupu Wakulongozga, mwezi uliwose ŵafumiskanga vidiyo yapadera yakukhwaskana na muliri ndipo yaŵikikanga pa jw.org na JW Library app.

Mu lipoti lakwambilira, Mubali Stephen Lett wakati nangauli muliri uwu ngwakofya, kweni ukupeleka waka ukaboni wakukwana wakuti tili ku umaliro nkhanira wa mazuŵa gha umaliro!”

Nangauli tikukhala mu nyengo zakusuzga izi, Mubali Lett wakati: “Kweni ise nga mbateŵeti ŵa Yehova tikwenera kufipa mtima chomene yayi.”

Mu mavidiyo agha mukaŵangaso malipoti ghakukhozga ghakufuma mu vyaru vyakupambanapambana. Malipoti agha ghakutilongora uwemi wakupulikira luŵiro ulongozgi wakufuma ku Wupu Wakulongozga. Mu vyaru vinandi, ŵalaraŵalara ŵa boma ŵakatilumba chifukwa chakuti tikachita vinthu mwamahara kweniso mwaluŵiro.

Kwa vyaka vinandi, ŵanthu ŵa Yehova ŵakawungananga pa malo ghamoza chaka chilichose kuti ŵachite Mgonero wa Fumu. Mu chaka ichi, chikaŵa chakusuzga kuti ŵanthu ŵanandi ŵawungane pa malo ghamoza. Mu vyaru vinyake ŵanthu ŵakapanganga ŵekha chingwa na vinyo wa pa chikumbusko, pamanyuma ŵakawoneleranga nkhani ya Chikumbusko kwizira pa pulogiramu yinyake ya pa kompyuta.

Ndipouli mu vyaru vinyake, chikaŵa chakusuzga kuti ŵanthu ŵagwiliskire ntchito pulogiramu yinyake ya pa kompyuta. Umu ndimo vinthu vikaŵira mu vigaŵa vya maofesi gha munthavi ghakukwana 11 ku Africa. Maofesi agha ghakanozga vyakuti pulogiramu ya Chikumbusko yiŵikike pa TV na pa wayilesi. Ndondomeko iyi yikapangiska kuti Ŵapharazgi 407,000 ŵaŵe na mwaŵi wakutegherezga pulogiramu iyi pamoza na ŵanthu ŵanandi awo chiŵelengero chawo chikumanyikwa yayi.

Padera pakuzomerezga kuti pulogiramu ya Chikumbusko yiŵikike pa TV na pa Wayilesi, Wupu Wakulongozga ukazomerezgaso kuti mu vyaru vinyake maungano gha mpingo ghaŵikikenge pa TV na pa wayilesi. Nthowa iyi yawovwira ŵapharazgi ŵa mu vyaru vikavu kuti nawo ŵachitengeko maungano. Pasono, maofesi gha munthavi 23, kusazgapo gha ku Africa, Europe, North America, na South America, ghakulondezga ndondomeko iyi.

Chifukwa cha muliri wa COVID-19, ŵanandi mwa ŵabali na ŵadumbu ŵithu ŵakusuzgikira kuti ŵasange vinthu vyakukhumbikwa pa umoyo. Makomiti Ghakovwira Para Kwachitika Soka ghakujumpha 400, ghali kupangika pa charu chose kuti ghawovwirenge ŵapharazgi awo ŵangafiska yayi kusanga vinthu vyakukhumbikwa pa umoyo. Mu chaka cha uteŵeti cha 2020, Wupu Wakulongozga ukazomerezga kuti ndalama zakujumpha madola 18 miliyoni gha ku America, zigwire ntchito yakovwira ŵapharazgi ŵakujumpha 330,000 mu nyengo ya muliri.

Kakaŵa kakwamba kuti ungano wa chigaŵa ujambulikirethu na kuŵikika pa intaneti. Ŵabali ŵa mu Wupu Wakulongozga pamoza na ŵabali awo ŵakuwovwira mu makomiti ghakupambanapambana, ndiwo ŵakadumba nkhani zose za mu ungano wa chigaŵa izo zikajambulikirathu. Pamanyuma mavidiyo gha nkhani izi ghakang’anamurika mu viyowoyero vyakujumpha 500. Ungano uwu ukaŵikika pa jw.org na JW Library app kuti ŵapharazgi na ŵanthu ŵakunweka ŵawonelere uku ŵali pa nyumba pawo.

Padera pa kuzizipizga muliri, ŵabali na ŵadumbu ŵithu mu vyaru vyakupambanapambana ŵakusangana na nthambuzgo zakofya chomene.

Ku Russia, mu chaka chajumpha ichi, Ŵakaboni ŵanandi nyumba zawo zikasecheka mwakuchita kuchichizga ndipo ŵanandi ŵakakakika. Pasono, ŵabali na ŵadumbu 42 ŵali kujalirika mu jele ku Russia, ndipo ŵaŵiri ŵali mu jele ku Crimea. Kufuma waka apo Khoti Likuru ku Russia likakanizgira mulimo withu mu 2017, ŵamazaza ŵasecha mwakuchichizga nyumba zakujumpha 1,000 za ŵabali ŵithu.

Ku Eritrea ndiko kuli Ŵakaboni ŵa Yehova ŵanandi chomene awo ŵali mu jele. Pasono wose pamoza ŵalipo 52. Ŵanyake mwa awo ŵakugwira jele chifukwa chakuti ŵakakana kunjira usilikari chifukwa cha njuŵi yawo, ni Paulos Eyasu, Isaac Mogos, na Negede Teklemariam, ndipo ŵakaŵajalira pa September 17, 1994. Paliso ŵabali na ŵadumbu ŵanyake 26 awo ŵakhala mu jele vyaka vyakujumpha 10.

Tikulutilira kulombera ŵabali na ŵadumbu ŵithu wose awo ŵali mu jele kuti ŵalutilire kuŵa ŵachikanga. Tikumanya kuti ŵakulongora kuti mbakugomezgeka apo ŵakulutilira kuzizipizga viyezgo.—Chivumbuzi 2:10.

Mu chaka chamara cha uteŵeti, Ŵakaboni ŵa Yehova pa charu chose ŵalongora kuti mbakugomezgeka kwa Yehova mwa kuchitako maupharazgi ghanyake, na kusanga nthowa ziphya za kuti ŵakhozganenge. Ŵalongoraso kugomezgeka mwa kuŵikapo mtima kupulikira ulongozgi wakufuma ku Wupu Wakulongozga kweniso wakufuma ku ŵamazaza ŵa boma.

Ŵabali na ŵadumbu ŵithu ŵalongora kuti ŵakumutemwa chomene Mlengi wawo, pa milimo yose ya kujipeleka pakusopa Chiuta iyo ŵakuchita. Ndipo ivyo ŵakuchita sono vikuŵanozgekereska kuzakazizipizga masuzgo ghanyake ghakuru agho ghakwiza munthazi.—Yakobe 1:2, 3.