Nkhani za pa JW izo zikulongosora vya ŵabali na ŵadumbu ŵithu awo ŵakutambuzgika, zikutikhozga chomene ndipo zikutovwira kuti tilutilire kuzizipizga. Vinthu vyakukhwaskana na ŵabali aŵa vikutovwira kuti tiŵamanye, ndipo ivyo vikuŵachitikira na ivyo ŵakuyowoya, vikutikhozga na kutovwira kuŵa ŵakukolerana kweniso vikulongora kuti ŵakuzizipizga mwachimwemwe. Nkhani zakulondezgapo izi zikulongora umo ŵabali na ŵadumbu pa charu chose ŵakovwilikira na nkhani izi.

Nga umo viliri ku taŵanandi, Mubali Miguel Silva na muwoli wake Mónica, (awo ŵali pachanya apa) awo mbapayiniya ŵapadera ku Portugal, ŵakutondeka kuchita vinyake chifukwa cha muliri uwu. Ivi vingapangiska kuti tambe kusuzgika maghanoghano. Ndipouli, iwo ŵakakhozgeka na nkhani ya pa chigaŵa cha Nkhani za pa JW yakuyowoya vya Mubali Konstantin Bazhenov. Konstantin wakakhumbanga kuti waŵerengenge Baibolo, kweni ku jele uko wakaŵa kukaŵavya. M’malo mwakuti wambe kukhalira kudandaura, iyo wakapanga “Baibolo” lake mwakugwiliskira ntchito mavesi agho wakasunga pa mtima. Ivi vikawovwira chomene Miguel na Mónica. Miguel wakuti: “M’malo mwa kuŵika mtima pa ivyo tikutondeka kuchita mu nyengo ya muliri iyi, tikuyezgayezga kuti tiŵike mtima pa ivyo tingafiska uku tili pa nyumba.”

Nakuti Miguel na Mónica ŵakaghanaghana vyakuti ŵasazgireko nyengo ya kuŵerengera Baibolo na kughanaghanirapo. Mónica wakuti: “Mu kuluta kwa nyengo, tikugomezga kuti Yehova wazamutovwira kukumbuka vinthu ivyo tikusunga mu mitima yithu pa nyengo yakwenelera.” Miguel wakusazgirapo kuti: “Nkhani ya Mubali Bazhenov yikatovwiraso kuwona kuti nangauli pasono tikukhala waka pa nyumba chifukwa cha muliri, kweni tili na mwaŵi wa kukhozga ŵanji, kwimbira Yehova mwakukondwa, na kuwona apo tingasintha pa nkhani ya malurombo ghithu.

Mudumbu Christine Mouhima Etonde, uyo ni mupayiniya wanyengozose ku Cameroon, wakuti kwa vyaka vinandi wakachitanga wofi para waŵerenga nkhani zakuyowoya vya nthambuzgo. Ndipouli, iyo wakulongosora umo wakuwonera nkhani izi pasono: “Kuŵerenga nkhani za pa JW zakuyowoya vya ŵabali na ŵadumbu ŵithu awo ŵakuzizipizga nthambuzgo vyanovwira kusintha kaghanaghaniro kane. Para nkhuŵerenga nkhani za umo ŵabali aŵa ŵakuwonera vinthu, malurombo ghawo ghakudunjika, kuwona ŵakumwemwetera na umo ŵakanozgekera pambere ŵandakumane na nthambuzgo, vilije kanthu kuti kwali mba msinkhu wuli, vikunovwira kuti nimumanye makora Yehova. Pasono nkhumutemwa chomene Yehova, mwakuti nane nkhwamba kujiwona nga kuti nkhutambuzgika kweni nkhuchita wofi yayi. Nkhujiwona kuti ndine wakukondwa, ndipo nkhulomba na kughanaghanira vyakukhwaskana na Yehova.”

Mubali Iulian Nistor na muwoli wake Oana, awo mba ku Romania, ŵakakhwaskika chomene na umo Mubali Anatoliy Tokarev wakavikililira chipulikano chake mu khoti. Mtima wa mubali uyu ukaŵa m’malo, wakaŵa na ntchindi, ndipo wakaŵikapo mtima kulutilira kuŵa wakugomezgeka. Chiyelezgero chake chiwemi chikawovwira Iulian na Oana kughanaghanirapo umo nawo ŵangavikililira chipulikano chawo mu khoti. Oana wakuti: “Pa nyengo ya kusopa kwa mbumba, tikayezgeleranga kuti tili panthazi pa khoti tikuvikilira chipulikano chithu. Kweni chikaŵa chipusu yayi kulongosora vigomezgo vithu mwaluso kweniso mwantchindi nga umo wakachitira mubali uyu. Paumaliro wa kusambira kwithu, tikajipulikanga kuti tili pafupi chomene na ŵabali na ŵadumbu ŵithu. Tikawona kuti ntchakuzirwa chomene kunozgekerathu kuvikilira chipulikano chithu kweniso kukumbuka chifukwa icho tikukondwa kuŵa Ŵakaboni ŵa Yehova.”

Mudumbu Anna Ravoajarison wa ku Madagascar wakachiskika kusandaso makora malurombo ghake. Wakati waŵerenga nkhani ya Mubali Jovidon Bobojonov, Anna wakuti: “Nyengo zinyake para natangwanika chomene na ntchito izo nkhuchita zuŵa na zuŵa, nkhuwona kuti malurombo ghane ghakuŵa ghambura kulongosoka. Para nindapatule nyengo yakuti nighanaghanirepo ivyo nimuphalirenge Yehova, nkhusanga kuti nkhuwerezga waka mazgu ghamoza na ghamoza.” Wakati waghanaghanirapo chiyelezgero cha Mubali Jovidon, wakamba kujitora nga kuti ndiyo. Wakajifumba kuti: ‘Niŵenge kuti ndine nkhasangana na chiyezgo ichi, kasi mphanyi nane nkhayowoya vinthu vyakudunjika nga ni ivi?’ “Ivi vyanisambizga kuti nkhwenera dankha kupatura nyengo ya kughanaghanirapo ivyo nkhukhumba kumuphalira Yehova mu lurombo. Nkhuwonga chomene chifukwa cha nkhani izi.”

Mubali Ruben Catarino na muwoli wake Andreia, mbapayiniya ŵanyengozose ku Portugal, ndipo pasono ŵakujiwona kuti ŵali pafupi chomene na ŵabali na ŵadumbu. Ruben wakuti: “Kale tikamanyanga kuti ŵabali ŵithu ŵakutambuzgika mu vyaru vinyake, kweni tikaŵamanyanga makora yayi. Tikamanyanga yayi mazina ghawo, umo umoyo wawo ukaŵira, panji masuzgo agho ŵakakumananga nagho. Tikuwonga chomene nkhani izi, chifukwa pasono tikuŵamanya makora. Tingaŵazunura mazina ghawo mu malurombo ghithu kweniso kuŵalombera kuti ŵalutilire kuzizipizga. Ivi vikutipangiska kuti tijipulikenge kuti tili pafupi chomene na ŵabali ŵithu kweniso ndipo malurombo ghithu ghangawovwira chomene.”

Tikukayika yayi kuti taŵanandi ŵa ise tikujipulika nga ni Mudumbu Cecilia Cardoso, uyo ni mupayiniya wanyengozose ku Portugal, uyo wakati: “Chifukwa cha ivyo vikachitikira ŵabali na ŵadumbu, pasono nkhuzirwiska chomene sambiro la namwene. Pakuti pasono nkhuŵikapo mtima kusambira Baibolo, nithembenge chomene Yehova, ndipo nimutemwenge chomene. Iyo wanovwirenge kuti nambe kuwona wofi nga nkhanthu kachoko kakuyana na kamchenga. Nakuti nawamo kuti munthu ukuchita wofi para waleka kuthemba Yehova.”

Tikuwonga chomene kuti tili na viyelezgero vyasono vya chikanga na chipulikano ivyo vikusangika pa jw.org. Nkhani izi zikutovwira kuti “tiŵenge ŵakukhwima mtima na kuyowoya kuti: ‘Yehova ni movwiri wane, nopenge chara.’”—Ŵahebere 13:6.