Pa April 25, 2022, tikafumiska Buku Lakupenjera Nkhani la Ŵakaboni ŵa Yehova lakunozgekaso pa JW Library app. Buku ili lili na maliferensi ghakusazgikira pa chigaŵa cha malemba agho ghali kulongosoreka.

Kufuma waka apo likafumiskikira mu 2013, Buku Lakupenjera Nkhani lili na chigaŵa cha maliferensi gha malemba agho ghalongosoreka mu mabuku ghithu ghasonosono.

Mu vyaka ivyo vyajumpha, mabuku ghanandi ghakale ghali kuŵikika pa JW Library. Mabuku ghanandi agho ghakasangikanga pa Layibulare ya pa Intaneti pasono ghakusangikaso pa JW Library app. Buku Lakupenjera Nkhani lakunozgekaso ili, lili na maliferensi ghakufuma mu mabuku ghakale agha kweniso buku la Insight on the Scriptures. Mu Buku Lakupenjera Nkhani ilo lili pa JW Library, mazgu agho ghali mu maliferensi agho ghazunulika ngakuti wamunthu ungadofya na kuŵazga ivyo ukukhumba nanga vingaŵa kuti kulije intaneti.

Buku lakunozgekaso ili, lili na maliferensi ghakufuma mu buku la Mungakondwa na Umoyo Kwamuyirayira! Mudumbu munyake zina lake Kari wakati: “Nkhuchita wofi kupharazga pa foni, kweni nkhumanya kuti ŵanthu ŵakukhumbikwira chomene kukhozgeka. Nyengo zinyake nkhukumbuka makora waka malemba, kweni nkhukhumbikwira wovwiri kuti nifiske kusambizga munthu mu nthowa yipusu, na yakuti nimufike pamtima kuti chidumbirano chilutilire. Pakuti pasono ningajura vesi na kusanga maliferensi mwambura kusuzga mu Buku Lakupenjera Nkhani, nanga ghangaŵa ghakufuma mu buku la Mungakondwa na Umoyo Kwamuyirayira!, vikunipangiska kuti nipharazgenge na mtima wose kweniso niŵe wakukondwa.”

Nthowa yakupangira Buku Lakupenjera Nkhani ŵali kuyisintha kuti yiŵe yipusu na chilato chakuti lisangikenge mu viyowoyero vinandi. Ivo, uyo wakuteŵetera pa ofesi ya munthavi ya Chile, wakati: “Kakaŵa kakwamba kuti Buku Lakupenjera Nkhani lifumiskike mu Chimapudungun. Nakuti nindachitepo nakale ntchito yanthena iyi, kweni nthowa iyo tikulondezga pakupanga buku ili njipusu chomene. Ŵabali ŵakazizwa kuti buku ili lafuma mu chiyowoyero chithu. Ŵakaghanaghanangako yayi kuti lingafumiskika mu chiyowoyero icho chili na ŵanthu ŵachoko waka. Ŵakakondwa chomene kupokera buku ili chifukwa liŵawovwirenge chomene pa kusambira paŵekha na pakunozgekera mazgoro gha pa maungano kweniso nkhani.”

• Mu Baibolo, lutani pa lemba ilo mukukhumba kulifufuza kuti mumanye vinandi.

• Dofyani pa vesi. Para mwadofya pakwiza tuvimanyikwiro tunandi, sankhani kachimanyikwiro ka Buku Lakupenjera Nkhani. Para pa tuvimanyikwiro uto palije kachimanyikwiro ka buku ili, mbwenu ndikuti palije maliferensi ghakulongosora vesi ilo.

Buku Lakupenjera Nkhani likulongora dankha maliferensi agho ghafuma sonosono kukwambilira ndipo ghakale ghakuŵa musi. Para mukukhumba kuwona maliferensi ghakale, mukwenera kukhira waka musi kuti mughasange. Pa nkhani ya mavesi agho tili kusintha kapulikiskiro kake, maliferensi ghasonosono ndigho ghakuŵa na fundo za umo tikupulikiskira pasono.