Ŵasambiri ŵa Sukulu ya Giliyadi ya kilasi nambara 148, ŵakamalizga masambiro ghawo nga umo vikuŵira na makilasi ghose, kweni pakaŵa waka mphambano yimoza. Mu Holo mukaŵavya ŵanthu ŵakuwonelera. Wose awo ŵakiza pa zuŵa lapadera ili ŵakachita kuwonelera waka pulogiramu iyi kwizira pa pulogiramu ya pa kompyuta. Pakuti pasono nthenda ya coronavirus yakhwaska charu chose, chakuchitika ichi chikaŵa chiyelezgero chiwemi chomene cha umo gulu likuchitira para vinthu vyasintha mwakuti likukolerane na umo vinthu viliri pa nyengo iyo.

Pulogiramu yapadera iyi yikachitika pa March 14, 2020, ku likuru la masambiro la Ŵakaboni ŵa Yehova ku Patterson, New York. Mubali Stephen Lett, uyo ngwa mu Wupu Wakulongozga, ndiyo wakaŵa cheyamani wa pulogiramu iyi. Ŵasambiri 55 ndiwo ŵakamalizga masambiro agha. *

Mu masabata ghachoko waka pambere zuŵa lapadera ili lindafike, nkhani ya matenda gha coronavirus agho ghathandazgika pa charu chose, yikaŵa waka palipose. Nga umo tikayowoyera pa jw.org, pa chigaŵa cha Nkhani, ŵabali ku likuru la Ŵakaboni ŵa Yehova, ŵakasandanga pafupipafupi umo vinthu viliri pa nkhani ya matenda agha, na kupeleka ulongozgi ku mipingo yose. Ŵakawoneseskanga kuti ulongozgi uwu ukaŵa wakukolerana na ivyo ŵamazaza ŵayowoya mu chigaŵa icho.

Ulongozgi unyake ukaŵa wakuti ŵanthu ŵanandi ŵaleke kuwungana malo ghamoza. Pa chifukwa ichi, Wupu Wakulongozga ukayowoya kuti pa pulogiramu iyi paleke kuŵa ŵalendo awo ŵachita kwiza. Pakaŵaso ulongozgi wakuti mu Holo muleke kuŵa ŵanthu ŵanandi. Mbumba ya Beteli kweniso ŵasambiri ŵa Sukulu ya Giliyadi, ŵakalongora chiyelezgero chiwemi chomene pa nkhani ya kupulikira ulongozgi.—Yohane 13:34, 35.

Nangauli vikaŵa nthena, pakanozgeka ndondomeko yakuti mbumba ya Beteli kweniso ŵanthu awo ŵachemeka na awo ŵakamalizganga masambiro gha Sukulu ya Giliyadi ŵachite kuwonelera pulogiramu iyi. Ivi vikapangiska kuti ŵabali na ŵadumbu ŵakujumpha 10,000 pa charu chose, kusazgapo ŵabwezi na ŵabali ŵa ŵasambiri aŵa, kuwonelera pulogiramu yapadera iyi.

Wupu Wakulongozga ukukhumba kuti mphanyi vinthu vyauzimu nga maungano gha mpingo, vilutilire kuchitika nangauli kuli muliri wa COVID-19. Lekani mwasonosono apa, Wupu Wakulongozga wapeleka ulongozgi ku maofesi gha munthavi pa charu chose, wa umo ŵangachitira kuti maungano gha mpingo ghalutilire kuchitika kuyana na umo vinthu viliri ku chigaŵa icho. Ku vigaŵa vinyake, ŵapharazgi ŵakwenera kuwungana mu tumagulu panji kugwiliskira ntchito mapulogiramu ghanyake gha pa kompyuta kuti ŵachite maungano. Tili na chigomezgo chose kuti ŵabali na ŵadumbu pa charu chose, ŵalutilirenge kupindula na chakurya chauzimu icho gulu likulutilira kupeleka ku mipingo yose.

Ntchakuwonekerathu kuti palije icho chingamutondeska Yehova kovwira gulu lake kulimbana na suzgo la mtundu uliwose.—Salimo 18:29.