AUGUST 2, 2021
NKHANI ZA PA CHARU CHOSE

Takwaniska Vyaka 75 Kufuma Apo Tikaŵira na Ungano Ukuru Chomene wa Mitundu Yose

Ungano Wambura Kuluwika Wakuti “Mitundu Yakukondwa” Ukalongora Waka Umo Vinthu Vizamuŵira Munthazi

JULANI

Pa August 4, 2021, tizamukwaniska vyaka 75 kufuma apo tikaŵira na ungano wakuti “Mitundu Yakukondwa”, ungano wa mitundu yose wa Ŵakaboni ŵa Yehova uwo pakaŵa ŵanthu ŵanandi chomene. Ungano uwu ukachitika pa August 4-11, 1946, ku Cleveland, Ohio, U.S.A., mu Sitediyamu ya Municipal na mu holo yinyake yapafupi.

Nkhondo Yachiŵiri ya pa Charu Chose yati yamara, ŵabali ŵakanozga vyakuti pachitike ungano uwu, uwo ukaŵa wakupambana chomene na ivyo vikachitikanga mu charu pa nyengo iyo. Pa ungano uwu pakiza ŵabali na ŵadumbu ŵakufuma mu vyaru vyakupambanapambana ndipo wose ŵakawungana mwamtende. Ŵanthu ŵa mitundu yakupambana kweniso ŵakufuma ku vigaŵa vyakupambana ŵakachitiranga vinthu lumoza nangauli pa nyengo iyi nkhani ya sankho yikasuzga chomene ku United States.

Ungano wakuti “Mitundu Yakukondwa” ukaŵa wakwamba kuti Ŵakaboni ŵa Yehova 80,000 ŵawungane pamoza. Pa nyengo iyi ŵabali ŵakakondwa chomene kuwungana pamoza chifukwa waliyose wakakhalanga kwayekha chifukwa cha nkhondo. Pa ungano uwu pakaŵaso ŵanthu 302 ŵakufuma mu vyaru 32. Pa Sabata, ilo likaŵa zuŵa laumaliro la ungano uwu, Mubali Nathan H. Knorr wakayowoya nkhani yakuti “Karonga wa Mtende.”

Kuwaro kwa Sitediyamu ya Municipal kuli mazgu ghakuti “Karonga wa Mtende,” uwo ukaŵa mutu wa nkhani yachisanisani iyo wakayowoya Mubali Knorr

Ungano ukachitika makora waka, ndipouli pakaŵa masuzgo ghanyake. Pa zuŵa lakwamba la ungano, ŵabali awo ŵakalaŵiliranga ungano uwu ŵakasangana na suzgo likuru. Chiŵelengero cha ŵanthu awo ŵakiza ku ungano chikaŵa chikuru kuluska icho chingakwana mu holo ya Municipal. Ŵabali ŵakeneranga kugwiliskiraso ntchito sitediyamu yapafupi kuti mzinda wa ŵanthu ukwanemo chigaŵa chamise icho chikamba pa 7:45 p.m. Kweni mu sitediyamu mukaŵa maseŵera gha baseball agho ghakeneranga kuchitika maulendo ghaŵiri na kumara pa 6:30 p.m.

Apo maseŵera agha ghachitikanga ulendo wachiŵiri, kukamba chivula chikuru cha ŵaleza ndipo ivi vikapangiska kuti mzinda uwo ukiza ku maseŵera agha uwere luŵiro. Pati pajumpha kanyengo, vula yikakata ndipo ivi vikawovwira kuti Ŵakaboni 50,000 ŵalute ku sitediyamu mwakutendekera pambere chigaŵa cha mise cha ungano chindambe

Mubali Knorr wakufumiska buku la “Mulungu Akhale Woona”

Pa ungano uwu wakuti “Mitundu Yakukondwa” pakafumiskika magazini ya Wukani!, pamoza na buku lakovwira pakusambira Baibolo lakuti “Mulungu Akhale Woona.” Mubali Knorr wakapharazgaso vya pulani iyo yikaŵapo yakusazgirako malo ghakupulintirako mabuku ku Brooklyn, New York, U.S.A., na maofesi gha munthavi mu vyaru 6.

Chimoza mwa vinthu vyakukondweska chomene ivyo vikachitika ntchakuti ŵanthu 2,602 ŵakabatizika—ŵabali 903 na ŵadumbu 1,699—ndipo ŵakabatizikira mu Nyanja yapafupi ya Erie. Vinyake ivyo vikachitika vikaŵa, viyelezgero vya umo ŵangachitiskira Sambiro la Gongwe la Mulinda na Sukulu ya Uteŵeti, kweniso pakimbika sumu za ving’wenyeng’wenye na ŵanthu 160 awo ŵakamanyanga kwimba sumu izi.

Ŵanyake mwa ŵabali na ŵadumbu ŵithu ŵakunozgeka kukabatizika

Ungano uwu ukaŵa chakuwonerapo ku maungano gha munthazi. Mwachiyelezgero, madipatimenti ghakupambanapambana ghakapangika pa ungano uwu, nga ni dipatimenti ya Ŵalinda, Ofesi ya Cheyamani, dipatimenti ya Chipatala, kweniso dipatimenti ya Vyakuzgeŵa na Vyakusangika.

Mubali Ron Little, uyo pasono ni mubali mulara mu mpingo wa McKeesport ku Pennsylvania, U.S.A., wakaŵa na vyaka 11 apo wakaluta ku ungano uwu pamoza na adada ŵake kweniso mwana wakwake. Wose ŵatatu ŵakagonanga mu thiraki yawo kwa mazuŵa ghose 8 gha ungano uwu.

Mubali Little wakukumbuka vya kufumiskika kwa magazini gha Wukani! Iyo wakuti, “Tati tapokera magazini agha, tose tikachimbirangachimbiranga uku takolera magazini agha. Waliyose wakakhumbanga kumupako munyake usange wawona kuti wandakolere magazini agha.”

Mubali Little, uyo wali na vyaka 86 pasono, wakukumbukaso kuti wakakondwa chomene kuwona Ŵakaboni ŵanandi chomene ŵawungana pamoza. Iyo wakuti, “Nkhukumbuka kuti nkhakhumbanga nga ungano ungalutiliranga waka kwambura kumara. Ukanozga chomene.”

Tikuwonga chomene Yehova kufumira pasi pa mtima chifukwa cha kutitumbika na “maungano ghakupatulika.”—Levitiko 23:2.

Ndondomeko ya ungano wa Ŵakaboni ŵa Yehova wakuti “Mitundu Yakukondwa” ku Cleveland, Ohio, U.S.A., kufuma pa August 4 m’paka pa 11, 1946

Magalimoto ghaŵiri ghali na masipika na vikhwangwani vyakuti: “Ŵerengani Gongwe la Mulinda na Consolation.” Posita iyo yili pa chijaro cha galimoto yili na mazgu ghakuti “Karonga wa Mtende” ndipo ndiwo ni mutu wa nkhani yachisanisani

Ŵasungwana ŵaŵiri na amama ŵawo ŵimilira panthazi pa galimoto iyo yili na masipika. Ŵasungwana ŵakolera magazini yakwamba ya Wukani! iyo yikafumiskika pa ungano wa mu 1946 wakuti “Mitundu Yakukondwa.” Amama ŵawo ŵakolera nyuzipepara yakuchemeka The Messenger, iyo yikafumiskikanga na Watch Tower Bible and Tract Society

Mubali wayimilira pamoza na ŵana ŵake ŵaŵiri. Galimoto yawo yili na vikhwangwani ivyo vili na mutu wa nkhani yakuti “Karonga wa Mtende”

Awo ŵafuma mu vyaru vinyake pa ungano wa mu 1946 wakuti “Mitundu Yakukondwa” ŵali pa desiki kuti ŵapokere makadi agho ghali na mutu wa nkhani yachisanisani yakuti “Karonga wa Mtende”

Ŵabali ŵakugwira mu Dipatimenti Yakuwona vya Chakurya

Awo ŵiza pa ungano ŵakurya chakurya mu malo ghakulyera pa ungano wa mu 1946 wakuti “Mitundu Yakukondwa”

Gulu la ŵabali na ŵadumbu awo ŵiza pa ungano ndipo waliyose wakolera buku ilo lafuma waka lakuti “Mulungu Akhale Woona”

Ŵabali ŵali pawaro pa malo gha ungano, ŵanandi mwa iwo ŵakajalirikapo mu jele chifukwa cha chipulikano chawo. Mubali Daniel Sydlik (mzere wapanthazi, kumalyero cha kuumaliro chomene), uyo pamanyuma wakazakaŵa mu Wupu Wakulongozga wa Ŵakaboni ŵa Yehova, nayo wakajalirikapo mu jele.