Pa Sabata, July 26, 1931, Mubali Joseph F. Rutherford, uyo panyengo iyo wakaŵa pulezidenti wa Watch Tower Bible and Tract Society, wakayowoya ku ŵanthu ŵakujumpha 15,000 pa ungano wa chigaŵa uwo ukachitikira ku Columbus, Ohio, U.S.A. Chigaŵa chinyake cha pulogiramu ya ungano chikaŵikika pa masiteshoni gha mawayilesi ghakujumpha 450 pa charu chose. Ndipo aka kakaŵa kakwamba kuti purogiramu ya pa wayilesi yiŵikike pa masiteshoni ghanandi nthena pa charu chose chapasi. Mubali Rutherford wakayowoya nkhani yakuzirwa chomene ya mutu wakuti, “Zina Liphya.” Mu nkhani iyi mukaŵa mazgu ghakuti: “Kufuma sono m’paka kunthazi, tikukhumba kuti timanyikwenge na kuchemeka na zina lakuti Ŵakaboni ŵa Yehova.” (Wonani bokosi lakuti “ Ivyo Tadumura.”) Ŵanthu ŵakazomerezga fundo iyi na mazgu ghapachanya kuti “Enya!” ndipo ŵakakuŵa mapi mwankhongono.

Pakuyowoya za ivyo vikachitika panyengo iyi, Mubali Arthur Worsley, uyo nkhani ya kulongosora umoyo wake yikafuma mu 1986, wakayowoya kuti: “Nizamuluwa yayi ntchemerezgo yikuru na chiwawa cha kukuŵa mapi ivyo vikapulikikwanga pa malo gha ungano.”

Mu vyaru vinyake, ŵanyake ŵakapulika apo mazgu agha ghakayowoyekanga pakuti nkhani iyi yikapharazgika pa wayilesi. Mubali na Mudumbu Barber ku Australia ŵakukumbuka ivyo vikachitika. Iwo ŵakuti: “Ŵanthu ŵakati ŵamba kukuŵa mapi ku America, ŵabali ku Melbourne ŵakayimilira ndipo nawo ŵakamba kukuŵa mapi.” Ku Japan, kagulu kachoko waka, kusazgapo Mudumbu Matsue Ishii, nawo ŵakategherezgako apo mazgu agha ghakaŵazgikanga. Pamanyuma, mudumbu uyu wakalemba kuti: “Tikachemerezga mwakukondwa pamoza na ŵabali ŵithu ku America.”

Vikapulikwika kuti ŵanthu ŵanyake awo ŵakachitanga mabizinesi mu msumba uwo mukachitikira ungano, Columbus, Ohio, awo ŵakakhoma maposita ghakupokelera Ŵasambiri ŵa Baibolo, pamanyuma ŵakakhoma vikhwangwani ivyo vikanjira m’malo mwa maposita agha ndipo ŵakalembapo mazgu ghakuti, “Tamupokelerani, Ŵakaboni ŵa Yehova.” Pa July 28, 1931, nyuzipepara ya The Messenger, iyo yikafumiskika na Watch Tower Bible and Tract Society iyo yikayowoya vinthu vyakukhwaskana na ungano withu, mukalembeka zina lakuti Ŵakaboni ŵa Yehova kwa nyengo yakwamba.

Nyengo yichoko waka pamanyuma pa ungano uwu, ŵabali na ŵadumbu ŵithu ŵakambapo kupharazga ndipo ŵakagaŵiranga kabuku kamutu wakuti The Kingdom, the Hope of the World, umo mukaŵaso nkhani yakukhwaskana na zina liphya. Pakati pajumpha myezi yiŵiri na hafu, tumabuku twakujumpha 5 miliyoni tukagaŵirika ndipo ŵalongozgi ŵa matchalitchi ŵanandi, ŵalara ŵa boma, kweniso awo ŵakachitanga mabizinesi ŵakapokera kabuku aka.

Mubali Martin Poetzinger wakukumbuka ivyo vikachitika panyengo iyo. Wakuti: “Pa nyumba yiliyose ŵanthu ŵakazizwanga para tamba chidumbirano na mazgu ghakuti: ‘Niza kwa imwe mwahuno chifukwa ndine yumoza wa Ŵakaboni ŵa Yehova.’ Ŵanthu ŵakapukunyanga mitu panji kufumba kuti: ‘Kweni kasi muchali ŵasambiri ŵa Baibolo?’” (Wonani bokosi lakuti “ Makadi Ghakapangiska Kuti Zina la Yehova Limanyikwe.”) Kweni pakati pajumpha nyengo, Mubali Poetzinger wakalemba kuti: “Vinthu vyasintha chomene! Pambere nindayowoye chilichose, ŵanthu ŵakuyowoya kuti: ‘Ukwenera kuti ndiwe yumoza wa Ŵakaboni ŵa Yehova.’”

Mubali A. H. Macmillan, uyo nayo wakaŵapo pa ungano uwu mu 1931, pamanyuma wakayowoya chifukwa icho zina ili likaŵa lakwenelera nadi kumanyikwa nalo. Wakayowoya kuti: “Nkhughanaghana kuti yikaŵa fundo yiwemi chomene kwamba kumanyikwa na zina ili chifukwa likalongosoranga vinandi vyakukhwaskana na ivyo tikuchita kweniso chilato chithu. Pambere ungano uwu undachitike, tikachemekanga waka Ŵasambiri ŵa Baibolo. Chifukwa wuli? Chifukwa chakuti ndivyo tikachitanga. Ndipo tikati tamba kusambira Baibolo na ŵanthu pa charu chose, tikamba kuchemeka kuti International Bible Students. Kweni pasono ndise ŵakaboni ŵa Yehova Chiuta, ndipo zina ili likumanyiska ŵanthu umo ise tiliri nadi kweniso ivyo tikuchita.”

Mazuŵa ghano, ŵanthu mamiliyoni ghanandi pa charu chose ŵakukondwa kuchemeka na zina lakuti Ŵakaboni ŵa Yehova.—Yesaya 43:10-12.