Mu July na August 2020, ŵabali na ŵadumbu mamiliyoni ghanandi, pamoza na ŵanthu ŵakunweka, ŵakawonelera ungano wa chigaŵa wa 2020.

Ŵakaboni ŵa Yehova ŵakalindiliranga na mtima wose ungano wa Chigaŵa wakuti, ‘Sekelerani Nyengo Zose’! Ungano uwu ukate uchitikirenge mu Maholo gha Ungano, mu masitediyamu na malo ghanyake, mu vyaru 240. Kuti ŵavikilire ŵanthu awo ŵakate ŵizenge ku ungano uwu, Wupu Wakulongozga ukasankha kuti pa charu chose tiwonelere ungano wakuchita kujamburika. Aka nkhakwamba kuti tichite ungano wa chigaŵa mu nthowa yanthena kufuma waka mu 1897.

Kenneth Cook, Jr., uyo ngwa mu Wupu Wakulongozga wakati: “Maungano gha chigaŵa ghakati ghayimiskika, chilato chithu chikaŵa chakuti tiŵe na pulogiramu yimoza ya ungano, iyo tose tingawonelera mu nyengo yakuyana waka. Tikamanya kuti pulogiramu iyi yikakhumbikwanga kujambulika mu viyowoyero vinandi kweni mu myezi yambura kujumpha yinayi. Kanandi ntchito yanthena iyi yikutoranga chaka chimoza panji kujumphiraposo kuti yimare. Tikakondwa chomene apo tikawona kuti chigaŵa chakwamba cha pulogiramu iyi chikasangikanga mu viyowoyero pafupifupi 400, pa July 6, 2020. Tikukhazga kuti pulogiramu iyi yisangikenge mu viyowoyero 511!”

Pakuyowoyapo vya uwemi wa pulogiramu iyi, mudumbu munyake uyo wakulera yekha ŵana ŵatatu, wakati: “Nangauli taŵasoŵa ŵabali na ŵadumbu ŵithu, kweni pulogiramu iyi yawovwira chomene ŵana ŵane. Pakuti pulogiramu iyi yili mu vigaŵa vichokovichoko, vyapangiska kuti chiŵe chipusu kupulikiska ivyo ŵakusambira. Para ŵakukhumba kupumurapo, tikuyimika dankha. Ntheura palije icho chikutijumpha. Mu chigaŵa cha pa Chinkhondi tikasambira kuti ŵana ŵali nga ni mivi ndipo ŵangaŵa na umoyo wakukondweska kweniso wakukhorweska para ŵakuteŵetera Yehova. Pulogiramu iyi yikunovwira kuti chiŵe chipusu kovwira ŵana ŵane kuchita nthena.”—Salimo 127:4.

Ungano uwu ukapangiska kuti ŵamutolamakani ŵanandi pa charu chose, ŵaŵe na khumbo lakuti ŵamanye makora ivyo vikuchitika. Mwachiyelezgero, Robert Hendriks, uyo wakulaŵilira milimo ya mu Dipatimenti yakuwona vya Nkhani ku United States, wakati: “Ŵamutolamakani ŵanandi ŵakalemba nkhani zinandi zakukhwaskana na ungano uwu. Nkhani izi zikalongosoranga kuti gulu lithu lagwiliskira ntchito tekinoloje kuti ŵanthu ŵawonelere pulogiramu ya ungano wa chigaŵa mwakuti waliyose waŵe wakuvikilirika.”

Ungano wa Chigaŵa wa 2020 wakuti, ‘Sekelerani Nyengo Zose’! walongora pakweru fundo yakuti Yehova ndiyo ni Msambizgi withu Mukuru.—Yesaya 30:20.