Ŵakaboni ŵa Yehova ŵazamuluwa yayi upharazgi wapadera uwo ukachitika mu November 2020. Muliri wakofya ukapangiska kuti taŵanandi tikhalenge waka pa nyumba. Tikaleka dankha kupharazga na nthowa zinyake izo tikutemwa kugwiliskira ntchito. Ndipouli, Ŵakaboni ŵa Yehova ŵakakwaniska kuchita upharazgi wapadera pa charu chose kuti ŵaphalireko ŵanji vya Ufumu wa Chiuta. Ŵapharazgi ŵanandi pa charu chose ŵakaŵikapo mtima chomene kuti ŵagaŵire magazini gha Gongwe la Mulinda Na. 2 2020 ku ŵamalonda, ŵamazaza ŵa boma, ŵasambizgi, ŵabwezi, ŵachibali, kweniso ku ŵanthu ŵanyake wose. Ntchito iyi yikakhozga wose awo ŵakaŵa ŵakukhumbisiska kutegherezga. Nakuti wose awo ŵakachitako ntchito iyi, nawo ŵakakhozgeka chomene.

Wonani vinyake ivyo ŵabali na ŵadumbu ŵakufuma mu vyaru vyakupambanapambana ŵakayowoya:

Lucinda Furkin wa ku Australia uyo wali na vyaka 18 ndipo wabatizika mwasonosono, wakalemba kuti: “Nangauli nkhaŵa makora yayi mu thupi apo upharazgi wapadera uwu ukaŵa mukati, kweni nkhajipulika kuti Yehova wakunikhozga, wakunikora pa woko, na kunipa nkhongono kuti nilutilire kuzizipizga.”

Dada munyake ku New Zealand wakalongosora umo upharazgi uwu ukawovwilira mbumba yake, wakati: “Tili na ŵana ŵachokoŵachoko ŵasungwana ŵanayi, ŵa vyaka 7, 9, 11, na 13. Tikawona kuti upharazgi uwu ntchawanangwa chakufuma kwa Dada withu wachitemwa Yehova. Ivi vikawovwira mbumba yithu kuti yilutilire kupharazga zuŵa lililose mu nyengo yose ya upharazgi wapadera uwu.”

Kagiso na Lydia Marumo, awo ŵakuchita ulaŵiliri wa dera, ŵakatumizgira magazini ya pa Intaneti ku ŵabali ŵawo awo Mbakaboni yayi. Ŵakapokera mazgoro ghakukhozga ghanandi kufuma ku ŵabali ŵawo. Yumoza mwa ŵabali ŵa Kagiso, uyo ni dokotala, wakati magazini iyi yikafika pa nyengo yake. Iyo wakalongosora kuti ŵalwari ŵanyake ŵakaŵa na mafumbo ghakukhwaskana na Chiuta kweniso Baibolo, ndipo nanga ni ŵana ŵake nawo ŵakachitangako vinthu vyakukhwaskana na vyamizimu. Banja la Marumo likamuyimbira foni mubali wawo uyu na kwamba kusambira nayo Baibolo mise ya zuŵa lenelilo. Pasono ŵakusambira nayo kaŵiri pa sabata.

Soroya Thompson, uyo ni mupayiniya ndipo wakukhala ku Ontario, wakalemba kuti: “Upharazgi wapadera uwu ukanovwira kuti niŵike mtima pa vinthu ivyo ni vyakuzirwa chomene, kweniso kumanya kuti pachali ŵanthu ŵanandi ŵakuti ŵapulike uthenga wa Chiuta. Upharazgi uwu ukanikumbuskaso kuti Yehova ngwachitemwa kweniso ukaŵa ukaboni wakuti iyo ngwakukhumbisiska kuti waliyose wazakapone. Para nakumbuka fundo iyi, vikanipangiskanga kuti niŵikepo mtima kupharazga, mu nyengo ya upharazgi wapadera iyi.”

Mudumbu munyake wakufuma ku British Columbia wakati: “Pa nyengo yakusuzga chomene iyi, nkhasankha kuti nichiteko upayiniya wakanyengo mwakuti nileke kusuzgika chomene maghanoghano. Ivi vikanovwira kuti nijipulikengeko makora ndipo vikawovwiraso chomene mbumba yakwithu.”

Ofesi ya munthavi ya Canada yikapeleka lipoti lakuti upharazgi uwu ukawovwira chomene kuti mbumba ziŵe zakukolerana. Vikawovwiraso kuti ŵana nawo ŵajipulike kuti mbakukhumbikwa pa ntchito yakupharazga, chifukwa ŵakalembanga ŵekha tumakalata tupusu kweniso kovwirapo pa kulemba mazina pa manevulupu, kuŵikapo masitampu na kupenja maadiresi.

Mubali na Mudumbu Tuomisto, awo ŵakuchita ulaŵiliri wa dera, ŵakati: “Mwezi wa November wanguŵa wakusuzga chomene kuno kumpoto. Ntheura ŵabali na ŵadumbu, chomenechomene ŵapayiniya, ŵakakondwa chomene na upharazgi uwu chifukwa ukaŵawovwira kuti ŵaleke kusuzgika chomene maghanoghano.”

Mbumba yinyake yikati yatumira magazini iyi munthu munyake uyo ŵakamumanyanga, yikapokera kalata yakuŵawonga. Mazgu ghanyake mu kalata iyi ghakaŵa ghakuti: “Mwahuno, [naŵerenganga buku la mu Baibolo] la Yakobe. Buku ili likuti chipulikano chambura milimo ntchakufwa. Nakuti Ŵakaboni ŵa Yehova ndivyo nyengo zose ŵakuchita, iwo ŵakulutanga ku ŵanthu kuti ŵakaŵasambizge na kuŵalongosolera uthenga wa mu Baibolo. Iwo ŵakuchita milimo iyo yikukhozga chipulikano.”

Ofesi ya munthavi ya Greece yikalemba kuti: “Pakuti muliri uwu wapangiska kuti ŵanthu ŵakanizgike kuchita vinthu vinyake kweniso kuti ŵakhalenge waka panyumba, vyapangiska ŵanthu ŵanandi kuti ŵajipulikenge ŵakuvuka chomene. Upharazgi wapadera uwu waŵawovwira chomene kuti ŵakhozgeke. Ŵanandi ŵakayowoya kuti upharazgi uwu waŵawovwira chomene mu nyengo yakusuzga iyi.”

Mudumbu Suzie Kontargiri wakasankha kuchitako upayiniya wakanyengo nangauli wakusuzgikira mu thupi kweniso mfumu wake ni Kaboni yayi. Iyo wakati: “Upharazgi wapadera uwu ukanovwira kuti nileke kusuzgika chomene maghanoghano. Mulenji uliwose nkhawukanga wakukondwa, kugwira ntchito zane, kuphika, kumunozgera vyose mfumu wane, paumaliro na kwamba kupharazga. Kanandi mfumu wane wakanifumbanga kuti: ‘Kasi mwahuno upharazgenge yayi?’ chifukwa wakazgoŵera kuniwona nkhupharazga mwakukondwa na ŵadumbu ŵanyake.”

Mudumbu Tamaki Hirota wakalembera makalata ŵamazaza ŵa boma. Iyo wakati: “Yehova ndiyo wakaŵa wakwamba kugwiliskira ntchito makalata pakupharazga. Iyo wakalembera ŵanthu makalata 66, ndipo ŵanthu ŵaghaŵazga mwakuwerezgawerezga kwa vyaka vinandi kuti ŵaŵe nayo paubwezi. Nakuti Yehova wakumanya makora kuti nthowa iyi njakovwira chomene. Upharazgi wapadera uwu ngwambura kuluwika.”

Mudumbu Meharaja Vijaya na Imayanathan Amutha ŵakalembera ku adiresi yimoza mwangozi. Mweneko wa nyumba wakataya waka kalata yakwamba kwambura kuyijura. Mbwenu wakasanga kuti kwizaso kalata yachiŵiri. Munthu uyu wakawona kuti mu makalata agha mukwenera kuti muli uthenga wakuzirwa chifukwa ghakatumizgika maulendo ghaŵiri. Pamanyuma wakaŵerenga magazini iyo yikaŵamo, na kumuyimbira mudumbu uyo wakatumizga kalata yachiŵiri ndipo wakazomera kusambira Baibolo.

Wamazaza munyake wakayimbira ofesi ya munthavi ya Sri Lanka wati wapokera magazini. Iyo wakati wandakumanepo na Ŵakaboni ŵa Yehova nangauli nayo ni Mkhristu. Wati wayowoya viwemi vinandi vyakukhwaskana na magazini agha kweniso webusayiti yithu, wakafumba kuti: “Kasi ningachita wuli kuti nane niŵe Kaboni wa Yehova?” Mwaluŵiro ŵabali ŵakanozga ndondomeko yakuti munthu wadumbiskaneso nayo.

Mupharazgi munyake wa vyaka 13 uyo wakusambira ku sukulu iyo ŵakutemwa kudumbiskana vya ndyali, wakalongosora umo upharazgi wapadera uwu ukamovwilira: “Ukanovwira kuti nileke kuŵa na wofi para nkhukhumba kulongosolera ŵasambizgi chifukwa icho nkhuleka kunjilirapo pa vya charu. Ivi vikakhozga chomene chipulikano chane.”

Mudumbu Margit Haring nayo wakajipulika mwakuyana waka. Iyo wakalemba kuti: “Upharazgi uwu ukanovwira kuti niŵe wachikanga kweniso wamwamphu. Pakwamba apo nkhapulika waka kuti tipharazgirenge ŵamalonda, na ŵamazaza ŵa boma, wofi ukanikora chomene. Pakuti nasambilirathu kuyowoya vigomezgo vyane mwambura wofi sono, kunthazi vizamunovwira chomene.”

Mulara munyake wakati: “Nkhakhwaskika chomene na unandi wa ŵanthu awo ŵakachitako upayiniya nangauli ŵali na masuzgo mu thupi. Ŵakaŵa na chifukwa chakupulikikwa chakuti ŵatondeke kuchitako upharazgi uwu. Kweni m’malo mwake, iwo ŵakasankha kuchitako upharazgi wapadera uwu. Chimwemwe icho ŵakaŵa nacho chifukwa cha kuteŵetera Yehova kweniso ŵabali ŵawo, vikapangiska kuti waliyose wathiske masozi.”

Pali vinthu vinandi chomene ivyo ŵabali na ŵadumbu ŵakuyowoya pa charu chose, nakuti tingakwaniska yayi kuyowoya vyose. Tikakondwa chomene kuphalirako ŵanthu mamiliyoni ghanandi uthenga wa Ufumu.—Yohane 15:11.