Mu January 2021, Wupu Wakulongozga ukapharazga vya kufumiskika kwa buku na burosha la Mungakondwa na Umoyo Kwamuyirayira! Nthowa yakudumbiskana iyo yili mu buku ili kweniso burosha yatovwira chomene kuti tisambizgenge makora ŵanthu Baibolo.

Pa JW Library app ŵaŵikamo vinthu vinyake ivyo vikupangiska kuti buku ili na burosha viŵe vyakukopa chomene kweniso viwovwirenge msambiri wa Baibolo pamoza na msambizgi wake. Patulani nyengo yakuti muvimanye makora vinthu viphya ivi.

• Kasi mukukhumba kumulongora fundo yinyake msambiri winu pa sambiro ilo mukudumbiskana? Dofyani pa ndime iyo mukukhumba ndipo yimujuliraninge vinthu ivyo mungachita. Sankhani kachimanyikwiro ka Share kuti mumutumizgire linki ya sentesi iyo mukukhumba.

• Kasi mukukhumba kuti imwe na msambiri winu muchite kutegherezga waka ndime yikuŵazgika? Dofyani pa ndime iyo mukukhumba kuti yimujulirani ivyo mungachita. Sankhani kachimanyikwiro ka Play kuti mutegherezge ndime iyo mukukhumba.

• Panyake vingachitika kuti msambiri winu wakugwiliskira ntchito buku panji burosha lakuchita kupulinta apo imwe mukugwiliskira ntchito la pa intaneti. Kasi mukukhumba kuwona umo peji linyake likuwonekera mu buku panji burosha lakuchita kupulinta? Pachanya chomene kumalyero kwa foni, tabuleti panji kompyuta yinu kuli tumadoti tutatu, dofyani penepapo na kusankha Printed Edition kuti muwone umo lakuchita kupulinta likuwonekera. Sankhani Digital Edition pa tumadoti twenetutu kuti muwelereso umo lawonekeranga pakwamba.

• Kasi mukukhumba kovwira ŵasambiri ŵinu kuti ŵalembenge ivyo vingaŵawovwira kumanya usange ŵakuluta panthazi mwauzimu? Ŵachiskani kuti ŵagwiliskirenge ntchito tumabokosi uto ŵangalembapo deti ilo ŵamalizgira sambiro panji kulemba vilato ivyo ŵakukhumba kufiska. Ŵangagwiliskiraso ntchito tumabokosi uto ŵangachongamo pa tchati cha “Manyani Apo Mwalekezgera Kuŵerenga Baibolo.”