Kwamba mu 2019, ŵanthu awo ŵali na mafoni kweniso matabuleti agho ghakukora kugwiliskira ntchito Amazon Alexa panji Google Assistant ŵakuŵazga vinthu vinyake vya pa jw.org na mapulogiramu agha. Nakuti pasono mapulogiramu agha ŵaghasintha ndipo munthu ungaghagwiliskira ntchito pakuŵazga vinthu vinandi vyakukhwaskana na maungano ghithu kweniso uteŵeti. Chachitima ntchakuti, kwamba mu June 2023 Google Assistant yizamuleka kuchita ivi. Kweni pasono yichali kugwira ntchito makora waka m’paka apo yizamulekera. Ndipouli, Amazon Alexa yilutilirenge kugwira ntchito makora nga umo vyanguŵira kumasinda uku pakuŵazga vinthu vya pa jw.org.

Pasono munthu ungayowoya waka ku foni yako kuti yiŵazge ndondomeko ya maungano gha mukati mwa sabata kufuma mu Kabuku ka Maungano ka Uteŵeti na Umoyo Wachikhristu na fundo za mu kaburosha ka Jipelekani pa Kuŵazga na Kusambizga. Para munthu wakukhumba kunozgekera sambiro la Baibolo, wangayowoya waka ku foni yake ndipo pulogiramu iyi yingajura sambiro ilo wakukhumba mu buku la Mungakondwa na Umoyo Kwamuyirayira!

Chinyakeso ntchakuti, ŵanthu ŵangategherezga sumu zithu za pa maungano zakufuma mu buku la ‘Yimbirani Yehova Mwakukondwa’, kweniso sumu zakwimbika na piyano, zaving’wenyeng’wenye panji izo ŵabali ŵali kwimba waka pa mulomo. Nanga ghangaŵa malipoti ghakufuma ku Wupu Wakulongozga naghoso munthu ungategherezga.

Kuti mumanye vinandi pa nkhani ya umo mungagwiliskira ntchito mapulogiramu agha, wonani pa chigaŵa chakuti “Use the JW.ORG Skill for Amazon Alexa” panji “Use the JW.ORG Action for Google Assistant.”

Kwa awo foni zawo zikukora zekha yayi mapulogiramu agha, mbwenu ŵangachita kupanga dawunilodi Alexa app.

Mapulogiramu agha chomene ghakovwira ŵanthu awo ŵakuleka kulaŵiska panji ŵali na suzgo la maso. Usange muli na munyinu uyo wali na suzgo la maso, kasi mungajipeleka yayi kumovwira kugwiliskira ntchito mapulogiramu agha?