Kufika mu 2023, pajumpha vyaka 75 kufuma apo Ŵakaboni ŵa Yehova ŵakambira kung’anamura mabuku ghakulongosora Baibolo mu chiyowoyero cha Chipapiamento. Chipapiamento ntchiyowoyero chakufuma mu Chidatchi, Chipwitikizi, na Chisipanishi. Mazuŵa ghano, ŵanthu pafupifupi 350,000 awo ŵakukhala pa virwa ivyo vikumanyikwa kuti ABC vya Aruba, Bonaire, na Curaçao ŵakuyowoya Chipapiamento.

Mulimo wa kupharazga mu virwa ivi ukamba kuumaliro wa vyaka vya m’ma 1920. Apo ŵamishonale ŵakafikanga ku Curaçao mu 1946, mipingo yinandi yikaŵa kuti yapangika kale pa chirwa ichi. Kweni panyengo iyi pakaŵavya mabuku agho ghakang’anamurikanga mu Chipapiamento. Maungano gha mpingo ghakachitikanga mu Chingelezi na mu Chipapiamento ndipo ŵakagwiliskiranga ntchito mabuku gha mu Chidatchi, Chingelezi, na Chisipanishi. Nangauli ŵabali ŵakamanya kuti ŵakukhumbikwira mabuku ghakulongosora Baibolo mu Chipapiamento, kweni pakaŵa vinthu vinandi ivyo vikatondeskanga. Mwachiyelezgero, pakaŵavya madikishonare gha Chipapiamento kweniso pakaŵavya malango gha kalembero gha chiyowoyero ichi. Mubali Bill Yeatts wakaŵa yumoza wa ŵamishonale ŵakwamba awo ŵakatumika ku virwa ivi, ndipo wakawovwirapo pa mulimo wakung’anamura. Nga umo vilikulembekera mu Buku Lapachaka la Ŵakaboni ŵa Yehova la 2002, iyo wakayowoya kuti: “Pakulemba mabuku ghithu, tikeneranga kuyowoya na kulemba vinthu ivyo vindayowoyekepo mu Chipapiamento. Chikaŵa chakusuzga chomene kuŵika malango gha kalembero agho tikeneranga kulondezga.” Nangauli pakaŵa masuzgo agha, kweni ŵabali ŵakaluta panthazi na mulimo wakung’anamura mabuku.

Buku lakwamba ilo likang’anamurika mu Chipapiamento kakaŵa kabuku ka The Joy of All the People, ako kakamalizgika mu 1948. Paumaliro, mabuku ghanandi ghakang’anamurika, kusazgapo Gongwe la Mulinda na Wukani! Pasono Baibolo la Mang’anamuliro gha Charu Chiphya likufumiskika mwapachokopachoko mwakuyana na buku la mu Baibolo ilo ŵamalizga mu Chipapiamento. Buku lakwamba la Baibolo ilo likang’anamurika ni buku la Rute, ndipo likafumiskika pa Okutobala 1, 2021.

Mulimo wakung’anamura mabuku uwu, wawovwira chomene kuti chiŵelengero cha ŵapharazgi chilutilire kukura pa virwa ivi. Mu 1956, apo mpingo wakwamba mu Chipapiamento ukakhazikiskikanga, ukaŵa na ŵapharazgi 16. Mazuŵa ghano, kuli ŵapharazgi ŵakujumpha 1,600 awo ŵali mu mipingo 25 ya Chipapiamento. Mu 2023, ŵabali na ŵadumbu ŵakaŵa na masambiro gha Baibolo ghakujumpha 1,200.

Tili na chigomezgo chose kuti Yehova walutilirenge kutumbika mulimo uwo ŵabali na ŵadumbu ŵanandi ŵakuchita mu chigaŵa icho ŵakuyowoya Chipapiamento, apo ŵakuŵikapo mtima kupharazga makani ghawemi na kupeleka uchindami kwa Yehova.—Mateyu 5:16.