JANUARY 3, 2022
NKHANI ZA PA CHARU CHOSE
Vyaru Vinandi Vyakolerana Kulemba Chikalata Chakupempha Kuti Ŵakaboni ŵa Yehova Ŵaleke Kutambuzgika
Pa December 17, 2021, vyaru vinandi ivyo vili mu wupu wa International Religious Freedom or Belief Alliance a (IRFBA) vikakolerana kulemba chikalata cha kuŵikira kumanyuma Ŵakaboni ŵa Yehova awo ŵakutambuzgika chifukwa cha chipulikano chawo. Chikalata ichi chikaŵa cha kupempha kuti Ŵakaboni ŵa Yehova wose awo ŵali mu jele ŵafumiskike, ndiposo kuti maboma ghaleke kuŵatambuzga, kuŵachitira nkhaza, kusecha nyumba zawo na kuŵagega.
Pa charu chose, Ŵakaboni ŵa Yehova ŵakujumpha 150 ŵali kujalirika mu jele chifukwa cha chipulikano chawo, mu vyaru nga Crimea, Eritrea, Russia, Singapore, na Tajikistan. Vyaru ivyo vili mu wupu wa IRFBA vikati “vili na chitima chikuru” chifukwa cha “kutambuzgika kwa Ŵakaboni ŵa Yehova uko kukuya munthazi” ndipo vikati Ŵakaboni nawo ŵali na wanangwa wa kuchita vinthu vyakukhwaskana na chipulikano chawo “kwambura wofi, kuchitirika nkhaza, sankho, panji kutambuzgika.”
Tikuwonga chomene maboma agho ghakulongora mtima uwemi na kuyowoyapo kuti ghaŵikire kumanyuma wanangwa withu wakusopa. Tikumanya kuti Yehova walutilirenge kuvikilira ŵabali na ŵadumbu ŵithu awo ŵakulutilira kuthemba iyo nangauli ŵakutambuzgika ndipo waŵapenge “mtende wambura kumara.”—Yesaya 26:3.