Wupu wakuchemeka Lagergemeinschaft Dachau, ukupempha ŵalara ŵa boma la Russia kuti ŵaleke kutambuzga Ŵakaboni ŵa Yehova. Wupu uwu ukayowoya vya pempho ili pa May 16, 2021, kwizira mu kalata iyo ukalembera pulezidenti wa charu cha Russia Vladimir Putin, kususka ivyo boma ili likuchita pakuŵikapo mtima kutambuzga ŵabali ŵithu.

Kalata iyi yikati: “Zuŵa linganjira yayi kwambura kupulikapo lipoti lakuti boma likuyuzga Ŵakaboni ŵa Yehova. Awo ŵali mu chisopa ichi nyumba zawo zikusecheka na ŵamazaza, ŵa FSB na ŵapolisi. Ŵakuŵachitira nkhaza na kuŵatambuzga. Ŵanalume na ŵanakazi ŵakupika chilango chakuti ŵakagwire jele kwa vyaka vinandi. Kanandi para ŵakupempha kuti ŵaleke kuŵasunga mu jele panji kuŵafumiska pambere nyengo yawo yindakwane, ŵakuŵakanira.”

Kalata iyi yikumalizga na mazgu ghakuti: “Tikumupemphani kuti mphanyi waliyose uyo wakukhala mu charu cha Russia waŵa na ŵanangwa wakusopa. Chonde lekani vinthu vyambura urunji ivi!”

Kufika mu May 2021, Ŵakaboni ŵa Yehova 61 ŵakaŵa kuti ŵali mu jele chifukwa cha chipulikano chawo. Pa Ŵakaboni aŵa pali ŵachekuru nga ni Mudumbu Valentina Baranovskaya, wa vyaka 70, uyo pasono nthena wakugwira jele la vyaka viŵiri. Mudumbu uyu wakalwara sitiroku mu July 2020. Pa May 24, 2021 khoti likakana apilu yake pamoza na ya mwana wake, Roman Baranovskiy, uyo wakugwira jele la vyaka 6.

Tikuwonga chomene ivyo ŵanthu ŵa mitima yiwemi ŵakuyowoya pakweru kupempha kuti ŵabali na ŵadumbu ŵithu ŵaleke kutambuzgika ku Russia. Tikumanya kuti paumaliro, Yehova ŵazamuthaska ŵanthu ŵake.—Daniyeli 12:1.