JANUARY 9, 2024 | YASINTHIKA: OCTOBER 7, 2024
NKHANI ZA PA CHARU CHOSE

YASONO—ŴABALI ŴAJALIRIKA MU JELE | Naŵikapo Mtima Kudemelera kwa Yehova

JULANI

Pa October 3, 2024, Khoti Likuru Chomene ku Crimea lili kusintha chilango icho likapeleka kwa Mubali Yuriy Gerashchenko na Mubali Sergey Parfenovich. Pasono khoti lili kudumura kuti ŵakhale mu jele kwa vyaka 6 m’malo mwa chilango icho likadumura pakwamba chakuti ŵaleke kusangikaso na mulandu kwa vyaka 6. Ŵakatolekera ku jele nyengo yeneyiyo khoti lati ladumura waka mulandu.

Pa July 1, 2024, Khoti la Krasnogvardeyskiy ku Crimea lili kumusanga na Mulandu Mubali Yuriy Gerashchenko na Mubali Sergey Parfenovich. Wose ŵaŵiri ŵali kupika chilango chakuti ŵaleke kusangikaso na mulandu kwa vyaka 6, ndipo pasono ŵalutenge ku jele yayi.

Vyakukhwaskana na ŵabali aŵa

Yuriy Gerashchenko

Chaka cha kubabikira: 1979 (Ukraine)

Mbiri yake: Wakugwira ntchito ya vya magesi

Wakakhorwa kuti Baibolo likuyowoya unenesko kweniso ukaboni uwo likupeleka pa nkhani yakuti Chiuta wakutemwa chomene ŵanthu. Wakabatizika kuŵa yumoza wa Ŵakaboni ŵa Yehova mu 2000

Wakatorana na Irina mu 2002

Ivyo Wakayowoya

Kasi ni mukhaliro wuli wa Yehova uwo wamovwirani chomene pa nyengo yakusuzga iyi?

Nkhuwonga chomene Yehova pakuti ndiyo ni mwenecho wa kumanya vinthu. Wakumanya makora ivyo ine nkhukhumbikwira nadi ndipo ngwakunozgeka kunovwira. Para nkhughanaghanirapo pa ivyo vyanichitikira mwasonosono, najiwonera nekha umo Yehova wanovwiliranga kuti niŵe wakunozgeka. Nkhujipulika nga nili chilwero mu woko lake. Misiri waluso nyengo zose wakusunga makora vilwero vyake, wakuvinora kweniso kuvipwelelera makora mwakuti nyengo yiliyose wangavigwiliskira ntchito. Ndimo Yehova wachitiranga nane nyengo yose iyi ndipo ivi vikunipangiska kuti nidemelere chomene kwa iyo.

Sergey Parfenovich

Chaka cha kubabikira: 1972 (Mirnoye, Crimea)

Mbiri yake: Wakagwiranga ntchito yakupwelelera malo ghakuchitirapo vya maseŵero

Wakachontheka wati wamanya ivyo Ufumu wa Chiuta uzamufiska munthazi. Wakabatizika mu 1993 pa ungano wa mitundu yose uwo ukachitikira ku Kyiv, Ukraine

Wakatorana na Marina mu 1997. Ŵali na ŵana ŵanalume ŵanayi kweniso ŵasungwana ŵaŵiri

Ivyo wakayowoya

Kasi ntchiyelezgero cha njani mu Baibolo icho chamovwirani chomene?

Pa Ŵafilipi 3:10, mpositole Paulosi wakalemba kuti: “Nkhukhumba kuti nimumanye iyo ndiposo kuti nimanye nkhongono za chiwuka chake na kusangana nayo mu visuzgo vyake.” Nkhughanaghanirapo pa umo Paulosi wakatemweranga Yesu. Iyo wakamutemwanga chomene Yesu ndipo wakaŵa wakunozgeka kusuzgika nga ndiyo. Nkhulomba kuti nane niŵe na mtima wakujipeleka nga umo vikaŵira na Paulosi, ndipo ivi vyanovwira kuti nisinthe umo nkhuwonera vinthu. M’malo mwakujiwona nga munthu uyo wakutambuzgika na masuzgo, nkhujiwona mwakwenelera nga munthu uyo waŵikapo mtima pa kuteŵetera Yehova visuzge viti uli.

Tikumanya kuti Yehova walutilirenge kovwira Yuriy na Sergey, kweniso wose awo ŵakulutilira kwenda mwakunyoloka apo Yehova ‘wakuŵabisa mu mfwiri wa mapapindo ghake.’—Salimo 17:7, 8.

Nyengo

September 19, 2022

Ŵakamujulira mulandu Sergey
September 28, 2022

Nyumba ya Sergey yikaŵa yimoza mwa nyumba 8 izo zikasecheka na ŵa ŵapolisi ŵa FSB, ndipo ŵakamutumizga ku malo ghakulindilirako mulandu
September 30, 2022

Sergey ŵakamulutiska ku jele lakulindilirako mulandu
November 15, 2022

Sergey wakafumiskika ku jele lakulindilirako ndipo wakaphalirika kuti wakhale pa jele la panyumba
March 22, 2023

Yuriy ŵakamujulira mulandu. Ŵakamukaka kweniso kumuphulunga na mafumbo ndipo ŵakamuŵika ku jele lakulindilirako mulandu
March 24, 2023

Yuriy wakafumiskika ndipo wakaphalirika kuti wakhale pa jele la panyumba
July 12, 2023

Sergey na Yuriy ŵakafumiskika pa jele la panyumba ndipo ŵakaphalirika kuti ŵaleke kwenda kuluta ku vigaŵa vinyake
July 28, 2023

Khoti likamba kutegherezga mulandu wawo. Wakwimira boma pa milandu wakati Sergey na Yuriy ŵakulutilira “kuswa malango na kofya ŵanthu awo mbakaboni pa nkhani izi.” Mweruzgi wakadumura kuti Sergey na Yuriy ŵakhaleso pa jele la panyumba nangauli pakaŵavya ukaboni pa ivyo wakwimira boma pa milandu wakayowoya

Wonaniso

NKHANI

Ŵajalirika mu Jele Chifukwa cha Chipulikano Chawo—Crimea

Khoti la Dzhankoy ku Crimea lati Sergey Filatov wakhale mu jele vyaka 6 chifukwa cha kuchitako vinthu vyakukhwaskana na kusopa mwa mtende ku nyumba yake.

NKHANI