MAY 9, 2022
NKHANI ZA PA CHARU CHOSE

YASONO—ŴABALI ŴERUZGIKA KUTI ŴAKAGWIRE JELE | Na Wovwiri wa Yehova, Ŵakulutilira Kuzizipizga ku Crimea

JULANI

Pa October 6, 2022, Khoti la Nakhimovskiy ilo lili ku Sevastopol likati Mubali Vladimir Maladyka, Vladimir Sakada, na Yevgeniy Zhukov ŵali na mulandu. Wose ŵakeruzgika kuti ŵakagwire jele vyaka 6. Chigamuro ichi chili kwambapo kale kugwira ntchito.

Nyengo

October 1, 2020

Ŵa FSB ŵakasecha nyumba 9 za Ŵakaboni ŵa Yehova ku Sevastopol, kusazgapo nyumba ya Maladyka, Sakada, na Zhukov. Apo ŵakasechanga nyumba ya Maladyka, ŵamazaza aŵa ŵakasanga kapaketi ka mkaka wa ufu. Ŵamazaza ŵakati mkaka uwu ukawonekanga nga ni munkhwala wakukanizgika, ntheura ŵakamutuma Mubali Maladyka na muwoli wake ku chipatala kuti ŵakaŵapime. Nataliya ŵakamuleka kuti walutenge zuŵa lenelilo. Kweni Mubali Maladyka, pamoza na Mubali Sakada kweniso Zhukov, ŵakaŵasunga dankha mu jele. Zuŵa lakulondezgapo ŵakatumika ku jele ilo ŵakusungako ŵanthu awo mulandu wawo underuzgike
March 23, 2021

Mubali Sakada wakafumiskika mu jele na kutumika pa jele la panyumba. Ŵakamuvwalika kanthu kakujambura uko wenda ndipo ŵakamukanizga kugwiliskira ntchito intaneti, kwimba foni, panji kuyowoyeskana na ŵabali ŵanyake awo ŵakakhwaskika na mulandu uwu
March 30, 2021

Mubali Maladyka wakafumiskika mu jele na kutumika pa jele la panyumba
May 17, 2021

Mubali Zhukov wakafumiskika mu jele umo wakasungika kwa myezi yakujumpha 7 na kutumika pa jele la panyumba
September 30, 2021

Khoti likamba kutegherezga mulandu wawo

Vyakukhwaskana na ŵanthu aŵa

Vladimir Maladyka

Chaka cha kubabikira: 1963 (Yenakievo, Ukraine)

Mbiri yake: Wagwira ntchito ya kunozga ndege kweniso umekaniki kwa vyaka vinandi. Wakatorana na Nataliya mu 1986

Wakamba kukhumba kusambira vyakukhwaskana na Chiuta pamanyuma pakuti mbumba yake yasangana na masuzgo. Munung’una wake ndiyo wakamuphalira vyakukhwaskana na Ŵakaboni ŵa Yehova. Wakabatizika lumoza na muwoli wake Nataliya mu 1997

Ivyo Wakayowoya

Kasi Yehova wamovwirani wuli imwe na mbumba yinu kwizira mu ŵabali na ŵadumbu?

Apo ine nkhasungikanga mu jele, ŵabali na ŵadumbu ŵakamovwiranga muwoli wane mwa kumupa vinthu vyakukhumbikwa pa umoyo, kumupembuzga, na kumukhozga na Mazgu gha Chiuta. Kanandi waka ŵakamuyimbiranga foni, kumulembera mameseji, panji kumutumira makadi kuti ŵamanye umo waliri. Ŵanyake ŵakalutanga ku nyumba kuti ŵakamukhozge na kumovwira.

Ŵanandi mu mpingo mwithu ŵakawonanga kuti ni mwaŵi wawo wakuti ŵamovwire. Ningati waka waliyose mu mpingo wakaŵa muchanya kale, ndipo wose ŵakaŵa na “mtima umoza” wakuti ŵachite ivyo ŵangafiska kuti ŵatovwire.—Zefaniya 3:9.

Vladimir Sakada

Chaka cha kubabikira: 1970 (Kyiv, Ukraine)

Mbiri yake: Wakasambizgika umo wangagwiliskira ntchito mashini ghanyake ndipo wakagwirapo ku usilikari. Wakugwira ntchito yakuzenga. Wakatorana na Svetlana mu 2005

Wakakulira mu mbumba iyo yikagomezganga kuti Chiuta kulije. Wakanweka na uthenga wa mu Baibolo pamanyuma pakuti munyake wamulongora zina la Chiuta. Wakawona kuti fundo za mu Baibolo ni zakovwira nadi. Wakabatizika mu 1991

Ivyo Wakayowoya

Kasi imwe na muwoli winu mwasambira vichi pa nkhani ya kuŵa na ndondomeko yiwemi ya kuchitira vinthu vyauzimu?

Vigaŵa vyakupambanapambana vya kusopa kwithu vikwendera lumoza. Vili nga umo minofu ya thupi lithu yikugwilira ntchito. Kuti tilutilire kuŵa ŵakukhora mwauzimu, tikunozgekera makora maungano na kutoramo chigaŵa, kuchitako ntchito ya kupharazga, kulomba na kusambira Baibolo zuŵa lililose, na kuchezga na ŵabali na ŵadumbu ŵithu . . . Nangauli milimo yithu yili kukanizgika, kweni tikuyezga kupenjerezga nthowa zakuti tilutilire kukhozga ubwezi withu na Yehova.

Yevgeniy Zhukov

Chaka cha kubabikira: 1969 (Sevastopol, Crimea)

Mbiri yake: Wakakulira mu mbumba yikuru. Adada ŵake ŵakafwa apo wakaŵa na vyaka 14

Apo wakaŵa munyamata, wakasambira kulizga piyano pa sukulu yinyake yakusambizga vya sumu. Wakasambira vya kuŵikira mapayipi ndipo pamanyuma wakamba kugwira ntchito pa kampani yinyake

Wakamba kujifumba chifukwa icho tiliri na umoyo pamanyuma pakuti wanjira usilikari. Amama ŵake ndiwo ŵakamusambizga Baibolo ndipo wakasanga mazgoro ghakukhorweska gha mafumbo agho wakaŵa nagho. Wakabatizika mu 1997

Ivyo Wakayowoya

Kasi Yehova wakamovwirani wuli apo mukasungikanga mu jele?

[Cha kukwambilira kwa 2021,] nkhukumbuka kuti nkhamba kufipa mtima kuti nizamuchita wuli Chikumbusko. Kakaŵa kakwamba kuti nichite Chikumbusko panekha kwambura mpingo. Ntheura nkhalomba kwa Yehova, ndipo wakanipa nkhongono na vinjeru. Na wovwiri wa Yehova, nkhadumba nkhani ya Chikumbusko ku ŵanyane ŵaŵiri awo tikaŵa selo yimoza. Apa ningati nkhachitira ukaboni vya Ufumu.

Tili na chigomezgo chose kuti Yehova wakhozgenge mtima wa ŵabali aŵa na wose awo ŵakutambuzgika ku Crimea.—1 Ŵatesalonika 3:12, 13.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Crimea

Khoti la Dzhankoy ku Crimea lati Sergey Filatov wakhale mu jele vyaka 6 chifukwa cha kuchitako vinthu vyakukhwaskana na kusopa mwa mtende ku nyumba yake.

NKHANI