Likuru la Ŵakaboni ŵa Yehova pa charu chose, likuwoneseska umo vinthu viliri pa nkhani ya muliri wa coronavirus (uwo ukumanyikwaso kuti COVID-19) uwo wathandazgika chomene. Tikumanya kuti Baibolo likayowoyerathu kuti mu mazuŵa ghaumaliro kuzamuŵa nthenda zakwambukira. (Luka 21:11) Para kwawa matenda ghakwambukira, ntchamahara kujivikilira na kuvikiliraso ŵanyithu.—Zintharika 22:3.

Ŵanji ŵangamba kujifumba kuti: Kasi vinthu vili wuli ku ŵabali na ŵadumbu ŵithu mu vigaŵa ivyo matenda agha ghathandazgika chomene? Muliri wa COVID-19 wapangiska kuti vinthu vinyake visinthe mu maofesi gha minthavi na mipingo ku Italy, Japan, South Korea, na mu vyaru vinyake. Mu vyaru vinyake, maofesi gha munthavi ghalekeska dankha ŵanthu kuzakawona malo kweniso kupokelera ŵalendo awo ŵakukhala pa ofesi yayi. Mu vyaru vinyake boma lakanizga kuti ŵanthu ŵanandi ŵawunganenge pamoza. Ivi vyapangiska kuti maofesi ghanyake gha munthavi ghayimiske dankha maungano gha dera. Kweniso mu vigaŵa vinyake, mipingo yasintha ndondomeko yakupharazgira na yakuchitira maungano. Nangauli pali masuzgo agha kweni ŵabali ŵakulutilira kuchita vinthu vyauzimu na kukhozgana.—Yuda 20, 21.

Mu nyengo yakusuzga iyi, ŵabali ŵithu ŵawona kuti fundo zakulondezgapo izi ni zakovwira. Fundo izi zingamovwirani imwe na banja linu para uko mukukhala kwawa muliri.

• Zikirani. Nangauli ntchiwemi kuŵa maso kweniso kuchita vinthu mwamahara para kwawa muliri, kweni tikwenera kuchita vinthu mwakuzikira.—Zintharika 14:15; Yesaya 30:15.

• Pulikirani ulongozgi wa boma. Kanandi ŵalara ŵaboma ŵakuŵika malango kuti ŵavikilire umoyo wa ŵanthu. Ntchamahara kutegherezga fundo ziphya za umo mungajivikililira na kupulikira ivyo ŵaboma ŵakuyowoya.—Ŵaroma 13:1.

• Mujipwelerenge. Ntchakuzirwa chomene kugeza mu mawoko na sopo pafupipafupi panji na munkhwala wakukomera majeremusi. Tikweneraso kuwoneseska kuti vinthu ivyo tikuvikora pafupipafupi ku nyumba panji ku Nyumba ya Ufumu ni vyakutowa. Kweniso uko kuli muliri uwu, ŵavyaumoyo ŵakukana kuti tikoranenge chasa kuti tileke kuthandazga muliri uwu. Pa nkhani ya muliri wa coronavirus, wupu wa World Health Organization ukupeleka fundo zakovwira kuti tijivikilire ku muliri uwu.

• Longorani Chitemwa ku Ŵanyinu. Nangauli tikumanya kuti kuwungana na kupharazga ni vyakuzirwa, kweni para mwalwara, ntchiwemi kukhala waka ku nyumba kuti muleke kupirako ŵanyinu matenda. Para mwachita nthena ndikuti mukuŵatemwa ŵabali na ŵadumbu ŵithu kweniso ŵazengezgani.—Mateyu 22:39.

• Londezgani Vyose Ivyo Vyasintha pa Mpingo. Mu vigaŵa ivyo kwawa muliri, chingaŵa makora kuti ofesi ya munthavi yiyimiske dankha maungano gha mpingo, gha dera na vyakuchitika vinyake vyapadera. Ivi ndivyo vyachitika mu vigaŵa ivyo vyakhwaskika chomene na muliri wa COVID-19, nga ni mu vigaŵa vinyake vya ku Japan, na South Korea. Kuyana na umo vinthu viliri ku chigaŵa icho, ŵalara ŵangawovwira ŵapharazgi kuti ŵategherezgenge maungano ghakuchita kujambura, agho ŵangawonelera uku ŵali ku nyumba kwawo. Ŵapharazgi ŵangapharazga kwizira pa foni, kulemba meseji, maimelu panji makalata.

Pasi apa pali maliferensi agho ghali na fundo za umo tingajivikililira ku matenda.

• “Jivikilirani ku Matenda” Wukani! Na. 6 2016, peji 4-6

• “Nthowa Zakupwelelera Umoyo Winu” Wukani! Juni 2015, peji 2-7

• “Pali Zimene Mungachite Kuti Mukhale ndi Thanzi Labwino: 4—Muziteteza Thanzi Lanu” mu Galamukani! ya March 2011, peji 7