Kufuma pa June 22 m’paka 25, 2023, chivula chikuru chikalokwa ku chigaŵa chakumwera na pakati ku Chile. Ŵanthu pafupifupi 20,000 ŵali kukhwaskika na chivula ichi. Nyumba zakujumpha 5,000 zili kunangika panji kunangikirathu. Ŵanthu masauzandi ghanandi ŵachali kuŵasamuska mu nyumba zawo. Ŵanthu ŵaŵiri ŵali kufwa, ndipo ŵanyake ŵaŵiri ŵakusangika yayi uko ŵali.

• Palije mubali panji mudumbu uyo wali kupwetekeka panji kufwa

• Ŵapharazgi 212 ŵali kusama mu nyumba zawo

• Nyumba 13 zili kunangika chomene

• Nyumba 38 zili kunangika pachoko waka

• Palije Nyumba ya Ufumu panji malo ghanyake ghakusoperamo agho ghali kunangika

• Ŵabali na ŵadumbu ŵanandi ŵakujipeleka ŵakovwira kutozga na kunozga nyumba izo zanangika

• Ŵalaŵiliri ŵadera na ŵabali ŵalara ku malo agha ŵakukhozga ŵabali na ŵadumbu mwauzimu kweniso kupeleka wovwiri wakwenelera

• Makomiti ghaŵiri Ghakovwira Para Kwachitika Soka ghali kusoleka kuti ghalaŵilirenge mulimo wakupeleka wovwiri

Tikulomba kuti mphanyi Yehova walutilira kupembuzga na kukhozga ŵabali na ŵadumbu ŵithu ku Chile kuti wazizipizge suzgo ilo ŵasangana nalo.—2 Ŵatesalonika 2:16, 17.