Pa June 5, 2022, Mubali Jason Reed, uyo ngwa mu Komiti ya Munthavi ya Chile, wakafumiska Baibolo la Mang’anamuliro gha Charu Chiphya, Mateyu-Uvumbuzi mu Chimapudungun ndipo likafumiskika la pa intaneti na lakuchita kupulinta. Mipingo yose ya Chiyowoyero ichi mu charu ichi yikapempheka kuti yiwonelere pulogiramu ya kufumiska Baibolo ili. Ŵanthu wose awo ŵakawonelera ŵakaŵa pafupifupi 800.

Ŵanthu ŵanandi ŵa mtundu wa Mapuche ŵakukhala ku chigaŵa cha pakati na kumanjiliro gha dazi kwa Chile na Argentina, pakati pa nyanja ya Pacific na Atlantic. Vigaŵa ivi vili na makuni ghanandi, malo agho kukuphulika volcano, mapiri gha Andes, na vidika. Ŵanthu ŵa mtundu wa Mapuche ŵakutemwa kupokelera ŵalendo ndipo ŵakuchindika chomene vinthu vyakupatulika.

Vigaŵa vinyake vya Baibolo vikamba kusangika mu Chimapudungun kwamba mu 1901, ndipo Baibolo la Malemba ghose gha Chigiriki likafumiskika na wupu wa Bible society mu 1997. Kweni nipera pakakhumbikwanga Baibolo lakung’anamurika makora. Mwachiyelezgero, Baibolo la mu 1997 likugwiliskira ntchito lizgu lakuti “mphinjika” pakuyowoya vya umo Yesu wakafwira. Ndipouli, Baibolo la Mang’anamuliro gha Charu Chiphya mu Chimapudungun likugwiliskira ntchito lizgu lakuti “khuni,” kulongora kuti Yesu wakafwira pa khuni lakunyoloka.

Chakukondweska ntchakuti apo Baibolo ili likafumiskikanga la pa intaneti, lakuchita kupulinta nalo likaŵapo kale ndipo ŵanthu awo ŵakawoneleranga pulogiramu iyi mu Nyumba za Ufumu 23, ŵakaŵa na mwaŵi wakupokera Mabaibolo agha. Mubali Jorge González, uyo ngwa mu Komiti ya Munthavi ya Chile, wakati: “Ŵanthu ŵa mtundu wa Mapuche ŵakutemwa kukayikira vinthu vyakupatulika nga Mazgu gha Chiuta para ghali pa intaneti. Ntheura tikukhazga kuti ŵanthu ŵanandi ŵamukondwa chomene kupokera Baibolo lakuchita kupulinta la Mang’anamuliro gha Charu Chiphya, Mateyu-Uvumbuzi mu Chimapudungun.”

Tikulomba kuti mphanyi Baibolo ili lawovwira ŵanthu ŵanandi kufuma mu “mitundu yose” kumumanya makora Yehova na kwamba kumusopa.—Yesaya 2:2.