Pa April 7, 2021, Khoti Lakuwona vya Malango ku Colombia likapeleka chigamuro chake icho chikaŵikira kumanyuma mwana uyo ni Kaboni wa Yehova ndipo wali pa msinkhu wakuti wangasankha yekha chakuchita pa nkhani ya wovwiri wa ku chipatala. Mulandu uwu ukaŵa wakuti mwana wa Ŵakaboni wakapemphanga kuti ŵamovwire na nthowa zinyake izo zikaŵapo kwambura kugwiliskira ntchito ndopa. Khoti ili likati vimapepara ivyo ŵakusayina ŵana awo ŵali pa msinkhu wakuti ŵangasankha ŵekha chakuchita ni vyakuzomerezgeka na dango ndipo ŵapapi ŵa ŵana aŵa ŵalije mulandu wa kusulako nkhani ya wovwiri wa chipatala wa ŵana ŵawo.

Pa May 27, 2020, Mudumbu Daniela Caicedo, uyo wakaŵa na vyaka 16, wakasangika na nthenda ya kansa ya mu ndopa. Madokotala ghakawona kuti wakwenera kuŵikika ndopa kweniso kovwirika na nthowa zinyake. Nangauli vinthu vikaŵa makora yayi, Daniela wakaŵalongosolera madokotala mwantchindi kuti wakukana kuŵikika ndopa kuyana na ivyo wali kusambira mu Baibolo.—Milimo 15:29.

Pa June 24, 2020, wupu wa Colombian Institute of Family Welfare (ICBF) ukapeleka mazaza ku madokotala kuti ghangamuŵika ndopa Daniela vilije kanthu kuti mweneko wakukana. Wupu wa ICBF ukatiso madokotala ghamuwone makora Daniela usange mutu wake ukwenda makora. Apo ŵakamusandanga, mudumbu withu wakalongora kuti wakughanaghana makora waka kweniso kuti ni mulara mwakuti wangasankha yekha munkhwala uwo wangazomera na uwo wangakana kupokera. Awo ŵakamusandanga ŵakawonaso kuti Daniela wakakana kupokera ndopa chifukwa chakuti wakachita kuchichizgika yayi, kweni chifukwa cha ivyo wali kusambira mu Baibolo.

Khoti lichoko likakhozgera wanangwa wake wakuti ni mulara ndipo wangasankha kupokera ndopa panji yayi. Ndipouli, khoti la apilu likadumura kuti usange madokotala ghakuwona kuti wakwenera kuŵikika ndopa, mbwenu ŵangamuŵika. Na wovwiri wa ŵapapi ŵake, Daniela wakachita apilu ku Khoti Lakuwona vya Malango kuti wavikilire wanangwa wake wa kukana kupokera ndopa.

Mu chigamuro chake chaumaliro, Khoti Lakuwona vya Malango likavikilira wanangwa wa Daniela mwa kuyowoya kuti wanangwa wa chisopa “ukuvikilira ubwezi wa munthu na Chiuta kweniso ivyo wakugomezga.” Khoti ili likatiso kumuchichizga Daniela kuti wapokere ndopa vingatimbanizga mtende uwo wali nawo na Chiuta kweniso kuswa wanangwa wake. Khoti likayowoyaso kuti mudumbu uyu wali na wanangwa wa kovwirika na nthowa zinyake zambura kugwiliskira ntchito ndopa.

Chigamuro ichi chikovwira waka ŵa vya chipatala kumanya fundo yakuti ŵakwenera kuchindika wanangwa wa ŵana awo Mbakaboni ŵa Yehova ndipo ŵali pa msinkhu wakuti ŵangasankha ŵekha chakuchita pa nkhani ya wovwiri wa chipatala kuyana na ivyo ŵakugomezga. Yumoza wa awo ŵakawovwirapo pa mulandu uwu wakati: “Khoti Lakuwona vya Malango likawona kuti wanangwa wa kuŵa na umoyo ukwendera lumoza na wanangwa wa kuchindika fundo izo munthu wakwendera. Pa chifukwa ichi, ŵana awo ŵali pa msinkhu wakuti ŵangasankha ŵekha chakuchita ŵangaŵa ŵakukondwa usange tikuchindika ivyo ŵakugomezga pa nkhani ya chisopa nanga vingaŵa kuti madokotala panji ŵeruzgi ŵakugomezga vinyake.”

Wati wapulika ivyo Khoti Lakuwona vya Malango ladumura, Daniela wakati: “Icho chanikondweska chomene ntchakuti zina la Yehova lapika uchindami. Ivyo vikachitika vyanisambizga kuti Yehova wangapangiska kuti viyezgo ivyo tikusangana navyo viŵe mwaŵi wakulongolera kuti tikumutemwa.”

Pasono Daniela waliko makora, ndipo wakulutilira kupokera wovwiri uwemi chomene wa chipatala. Nayo wazamunjira sukulu ya ŵapayiniya mu August 2021. Tikumanya kuti Chiuta withu, Yehova, wakukondwa para wakuwona ŵachinyamata ŵakumuchindika kwizira mu ivyo ŵakuchita.—Salimo 148:12, 13.