Mu chaka ichi cha 2022, vyaka 100 viŵenge kuti vyajumphapo kufuma apo Ŵakaboni ŵa Yehova ŵakambira kupharazga pa chilwa cha Cyprus icho chili pa Nyanja ya Mediterranean. Mpositole Paulosi wakiza pa chilwa ichi pamoza na Baranaba, uyo kukaŵa kukwake mu ulendo wake wakwamba waumishonale. Mu nyengo yithu yino, uthenga uwemi ukafika pa chilwa ichi mu 1922, mulara wa chisopa wati wapokera kabuku ka mutu wakuti Does the Soul Die?

Pamanyuma pa vyaka viŵiri, Cyrus Charalambous, uyo wakaŵa Msambiri wa Baibolo ku United States, wakawelera ku Cyprus. Wakamba kuŵikapo mtima chomene pa ntchito yakupharazga ndipo wakatumizga kathirakiti kamutu wakuti Where Are the Dead? mu tawuni yiliyose na chikaya ku Cyprus.

Antonis Spetsiotes wakapokerako thirakiti ili. Ivyo wakaŵazga vikamufika pamtima chomene, wakamanya kuti wasanga unenesko ndipo wakamba kudumbiskana na mzengezgani wake zina lake Andreas Christou. Pamanyuma, ŵanalume ŵaŵiri aŵa ŵakamba kuphalirako ŵanyawo ivyo ŵakasambira.

Tchalitchi cha Greek Orthodox chikimikana nayo ntchito yakupharazga iyo ŵakachitanga, wose ŵaŵiri Antonis na Andreas ŵakaŵasezga mu tchalitchi. Ndipouli ŵakaleka yayi kupharazga. M’ma 1930, kuŵikapo mtima kwawo kukapangiska kuti papangike mpingo wakwamba pa chilwa ichi mu muzi wa Xylophagou.

Ŵabali pa chilwa ichi ŵakapokera wovwiri wakwenelera pa mulimo wakupharazga mu 1947, mubali Antonios Karandinos uyo wakaŵa mu mishonale wakufuma ku sukulu ya giliyadi wati wafika pa chilwa ichi. Kuzakafika mu 1948, pa chilwa ichi pakaŵa ŵapharazgi ŵamwamphu 50 ndipo pakajulika ofesi ya munthavi. Mu 1960 ŵabali ŵakalembeska ku boma kuti ŵaŵe ŵakuzomerezgeka na dango. Pamanyuma pa vyaka viŵiri pera, Nyumba ya Ufumu yakwamba yikazengeka ku Nicosia. Chiŵelengero cha Ŵakaboni chikalutilira kusazgikira, ivi vikapangiska kuti ofesi ya munthavi yizengeke yikuruko mu 1969.

Apo chiŵelengero chikakweranga nthambuzgo nayo yikalutanga panthazi. Cha m’ma 1960, ŵabali ŵachinyamata ŵakajalirikanga mu jele chifukwa chakukana kunjira usilikari. Ŵanyake ŵakayuzgikanga na ŵasilikari na chilato chakuti mpaka ŵazomere kunjira usilikari.

Suzgo linyake likawuka mu 1974 charu cha Turkey chati chawukira Cyprus na kwamba kuwusa chigaŵa chikuru cha chilwa ichi. Ŵabali ŵithu pafupifupi 300 ŵakachimbira kukwawo. Mbumba ya beteli nayo yikayileka ofesi ya munthavi. Ŵabali na ŵadumbu ŵakufuma mu vyaru vinyake ŵatumizganga vinthu vyakukhumbikwa ku ŵabali ŵithu ŵa ku Cyprus. Ŵabali awo vinthu vikaŵako makora kwa iwo ŵakafiska kukhala mu nyumba zawo pamoza na ŵabali na ŵadumbu awo ŵakachimbira ku Cyprus.

Nkhondo iyi yikapangiska kuti ŵabali na ŵadumbu ŵaŵavye mwaŵi wakuwungana pamoza. Nangauli ndimo vikaŵira, mulimo wakupharazga ukalutilira. Mu 2006, Ŵakaboni ŵa Yehova ŵakachita chinthu chapadera, icho ukaŵa ungano wa chigaŵa wa mutu wakuti “Kuwombokwa Kuli Pafupi!” uwo ukachitikira ku Limassol. Ŵakaboni ŵa Yehova wose ku Cyprus ŵakafiska kuwunganaso pamoza kakwamba kufuma mu 1974.

Pasono kuli ŵapharazgi 2,866 awo ŵakuteŵetera mu mipingo 41 na magulu 17 gha viyowoyero vyakupambanapambana pa chilwa ichi. Mu 2021, ŵanthu 5,588 ŵakachitako Chikumbusko cha nyifwa ya Khristu.

Tikukondwa lumoza na ŵabali na ŵadumbu ŵithu ku Cyprus. Tikumanya kuti na wovwiri wa Yehova ŵalutilirenge kwenda mu nthowa yiwemi.—Ŵafilipi 3:16.