Apo muliri wa coronavirus ukulutilira, ŵabali na ŵadumbu ŵithu ŵa mu vigaŵa vinyake ku Democratic Republic of the Congo na Republic of the Congo ŵakusuzgikaso chifukwa cha kututuka kwa maji kweniso viwawa. Ofesi ya Munthavi ya Congo (Kinshasa), iyo yikulaŵilira ntchito yithu yakupharazga mu vyaru viŵiri ivi, yanozga ndondomeko yakovwira ŵabali ŵithu mwakuthupi na mwauzimu wuwo. Ofesi ya munthavi yapanga Makomiti 57 Ghakovwira Para Kwachitika Soka, kuti ghawovwirenge ŵabali ŵithu awo ŵali mu chigaŵa cha ofesi iyi. Kufika sono, makomiti agha ghapeleka chakurya ku ŵabali na ŵadumbu ŵakujumpha 90,000.

Pa April 16 na 17, 2020, kuvuma kwa Democratic Republic of the Congo, kukalokwa vula yikuru iyo yikapangiska kuti maji ghatutuke, ndipo ŵapharazgi 139 ŵakachimbira mu nyumba zawo. Pasono ŵakukhala mu nyumba za ŵabali na ŵadumbu ŵanyawo. Makomiti Ghakovwira Para Kwachitika Soka, ghakuyezgayezga kusanga malo ghakukhala gha ŵabali na ŵadumbu ŵithu aŵa.

Ŵabali na ŵadumbu ŵakovwira na mtima wose makomiti agha. Mu chigaŵa chinyake, ŵapharazgi ŵakapeleka nthochi zakukwana makilogiramu 700, ngoma makilogiramu 400, kweniso vikhawu na chigwada makilogiramu 220.

Kusazgirapo apa, mpingo wa Some 26 Km, ukapokelera ŵabali ŵithu 50, awo ŵakachimbira ku kwawo chifukwa cha nkhondo. Ŵapharazgi aŵa ŵakagaŵananga chakurya na ŵabali awo ŵakachimbira kukwawo m’paka apo Komiti Yakovwira Para Kwachitika Soka, yikazakapelekera chakurya ku ŵabali aŵa.

Mwanalume munyake wa ku Brazzaville, msumba ukuru wa charu cha Republic of the Congo, wati wapokera wovwiri wa chakurya wakati : “Umoyo ukusintha mu kanyengo kachoko waka. Nkhaŵa pa ntchito ndipo nkhapokeranga makorako, muwoli wane nayo wakagwiranga ntchito mwa apo na apo. Tikajisangiranga vyakukhumbikwa pa umoyo. Ndipouli, muliri wa COVID-19 wati wamba, tose ntchito zikatimalira. Kweni chipulikano chithu mwa Yehova chikamara yayi. Apo tikaŵavya chakurya Yehova wakachitapo kanthu kuti watovwire.”

Mudumbu Mbuyi Ester, uyo ni chokoro ndipo wakukhara mu msumba wa Kinshasa, nayo wakayowoya fundo yakuyana waka. Wakati: “Mfumu wane wali kutayika mu mwezi uwo wajumpha, nkhakhumbikwiranga chomene wovwiri. Nkhaŵavya pakukora kuti nipwelelere ŵana ŵane ŵatatu. Tikaŵavya chakurya chakukwana chakuti ine na ŵana ŵane tirye. Nkhuwonga chomene Yehova!”

Tikulomba Yehova kuti walutilire kupwelelera ŵabali na ŵadumbu ŵithu, na kutumbika mulimo wa awo ŵakovwira para kwachitika soka. Tikulindilira nyengo iyo waliyose pa charu wazamuŵa wakukondwa na chakurya chinandi.—Salimo 72:16.