Kwambira mu December 2017, nkhondo yapawenenawene pakati pa Ŵahema na Ŵalendu ku Ituri mu charu cha Democratic Republic of the Congo, yakomeska ŵanandi, ndipo ŵanyake masawuzande ghanandi ŵali kuchimbira mu vikaya vyawo. Ŵabali na ŵadumbu ŵanandi nawo ŵakukhwaskika chomene na nkhondo iyi.

Ŵanthu ŵanandi ku Congo ŵali kuchimbilira mu charu cha Uganda kuti ŵavikilire umoyo wawo. Pa gulu ili pali ŵapharazgi 192 awo ŵali ku misasa yiŵiri ya ŵanthu awo ŵachimbira kwawo kufupi na boda ya charu cha Congo. Kufika mu June 2018, Ŵakaboni ŵa Yehova ŵanyake 1,098 ŵali kuchimbilira ku Bunia, msumba ukuru wa Ituri. Chachitima ntchakuti, ŵakutorana ŵanyake, kweniso ŵana ŵatatu ŵa Ŵakaboni ŵa Yehova, ŵali kufwa chifukwa cha kulwara. Ndipouli, palije mubali panji mudumbu uyo wali kukomeka pa nkhondo iyi.

Nyumba za ŵabali ŵanandi awo ŵali kuchimbira nkhondo zili kotcheka ndipo katundu wawo wali kwibika. Kweniso vyakurya ivyo ŵakalima, vili kusakazika.

Kufuma waka apo nkhondo yikambira, ŵabali na ŵadumbu ŵa uko kulije nkhondo iyi, ŵakovwira ŵanyawo awo ŵasuzgika chifukwa cha nkhondo. Ŵanyake ŵakapeleka magalimoto ghawo kuti ghawovwire pakusamuska ŵabali na ŵadumbu (wonani chithuzi). Kweniso, mbumba zakukwana 205 za Ŵakaboni ŵa Yehova ku Bunia zikawovwirapo na ndalama, chakurya, kweniso malo ghakukhala, nangauli nazo zikusanga mwakusuzgikira. Nangauli ku Bunia kuli misasa yiŵiri yikuru, kweni ŵabali na ŵadumbu wose awo ŵali kuchimbira kwawo, ŵakusungika na Ŵakaboni ŵanyawo.—Zintharika 17:17.

Komiti ya Munthavi ya Ŵakaboni ŵa Yehova ku Congo yikasora Komiti Yakovwira pa Nyengo ya Suzgo, iyo yikapeleka wovwiri ku ŵabali na ŵadumbu. Mwimiliri wa ofesi ya munthavi wakaluta kukawona ŵabali aŵa na kuŵakhozga mwauzimu.

Ŵabali na ŵadumbu awo ŵali kuchimbilira ku Bunia na vigaŵa vinyake, ŵakulutilira kuwungana na kupharazga makani ghawemi pamoza na ŵabali ŵa uko ŵali kuchimbilira. Kwambira mu February m’paka mu April 2018, ŵabali ŵakambiska masambiro gha Baibolo ghakujumpha 270 mu misasa iyo ŵakukhala.

Tikulomba kuti Yehova walutilire kupeleka mtende wa maghanoghano ku ŵabali na ŵadumbu ŵa ku Congo, kweniso kuti walutilire kutumbika ŵabali awo ŵakujipeleka kovwira ŵabali aŵa kusanga vyakukhumbikwa pa umoyo wawo. Tose tikulindilira Ufumu wa Chiuta kuti wize, uwo uzamovwira kuti ŵanthu ŵa Yehova “ŵakhalenge mu malo gha mtende.”—Yesaya 32:17, 18.