Pa February 20, 2022, Baibolo la Mang’anamuliro gha Charu Chiphya Mateyu-Uvumbuzi likafumiskika mu Chikipende mu pulogiramu iyo yikajambulikirathu. Mubali Nicolas Hifinger, uyo ngwa mu Komiti ya Munthavi ya Congo (Kinshasa), ndiyo wakafumiska Baibolo la pa intaneti pera ili ndipo ŵanthu pafupifupi 10,000 ŵakawonelera pulogiramu iyi. Baibolo lakuchita kupulinta lambenge kusangika mu April 2022.

Ŵakaboni ŵa Yehova ŵakamba kusangika ku chigaŵa icho ŵakuyowoya Chikipende mu vyaka vya mu ma 1960, apo mwanalume munyake zina lake Makanda Madinga Henri wakapokera magazini gha Gongwe la Mulinda. Wati waŵerenga magazini iyi, wakakhorwa kuti wasanga unenesko ndipo wakamba kuphalirako ŵanyake ivyo wakasambiranga. Pamanyuma wakabatizika na kuŵa Kaboni wa Yehova. Ndipo pati pajumpha nyengo, mpingo wakwamba wa chiyowoyero cha Chikipende ukapangika ku Kiefu mu 1979.

Baibolo ili liwovwirenge chomene ŵabali na ŵadumbu para ŵakusambira paŵekha kweniso pakupharazga makani ghawemi. Nakuti Mubali Hifinger wakayowoya kuti Baibolo ili “ndipusu na lakupulikikwa makora,” kweniso “palipose apo pakaŵa zina lakuti Yehova ŵawezgerapo nga umo vikaŵira mu malemba ghakwambilira.”

Tikulomba kuti mphanyi Baibolo la Mang’anamuliro gha Charu Chiphya ili lawovwira ŵabali kulutilira “kupambika vipambi mu mulimo wose uwemi na kulutilira kumumanya makora Chiuta.”—Ŵakolose 1:10.