JANUARY 21, 2022
DEMOCRATIC REPUBLIC OF THE CONGO
Ntchito Yakuzenga Maofesi Ghaphya ku Democratic Republic of the Congo Yili Mukati
Ntchito yakuzenga ofesi yiphya iyo yizamuŵa ofesi ya munthavi yikuru yili mukati ku Lubumbashi, Democratic Republic of the Congo. Vikuwoneka kuti ŵateŵeti ŵa pa Beteli pafupifupi 260 ŵazamusamukira ku ofesi iyi cha mu May 2022, apo ŵanyake 131 ŵazamukhala kwenekuku ku ofesi yakale iyo yili ku Kinshasa. a Ntchito yakuzenga yambikaso ku nyumba iyo muzamukhalanga ŵanthu kufupi na ofesi yakale ku Kinshasa. Vikuwoneka kuti ŵateŵeti ŵa pa Beteli 48 ŵazamusamukira mu nyumba iyi kuumaliro wa January 2024. Nyumba zose ziŵiri izo zizengekenge ziwovwirenge kuti ntchito ya Ufumu yendenge makora ku Congo.
Ntchito yakuzenga yikulutilira pa nyumba yimoza mwa nyumba zitatu izo muzamuŵa maofesi
Mu chaka cha Uteŵeti cha 2021, ŵabali ŵithu ku Democratic Republic of the Congo ŵakachitiska masambiro gha Baibolo ghakujumpha 250,000. Ŵanthu ŵakujumpha 1 miliyoni ŵakasangikapo pa Chikumbusko cha nyifwa ya Yesu. Pasono ŵanthu 394 ŵakuteŵetera pa ofesi ya munthavi ku Kinshasa.
Pakuti chikaŵa chakusuzga kuti ŵasazgireko maofesi ku Kinshasa, ŵabali ŵakamba kupenja malo mu misumba yinyake kuti ndiko ŵazenge maofesi ghakusazgikira. Ŵakasanga malo ghawemi chomene ku Lubumbashi agho ghakaŵa ghakwenelera kuzengapo maofesi ghaphya.
Kumazere: Ŵateŵeti ŵa pa Beteli pafupifupi 300 ŵambenge kusamukira ku nyumba ziphya izo zili ku Lubumbashi mwasonosono. Kumalyero: Chithuzi cha umo zizamuwonekeranga para zamalizgika
Malo gha ku Lubumbashi ghali pa mtunda wa makilomita 2,300 kufuma ku Kinshasa. Ngasani maekala 30 ndipo pazamuŵa nyumba zakugonamo, maofesi, nyumba yakusungiramo vinthu, holo yakuchitiramo vinthu vyakupambanapambana kweniso chipinda chakulyeramo, na malo ghakuchitirapo maseŵera ghakupambanapambana.
Ntchito yakuzenga yikamba mu November 2020, kweni yikasangana na masuzgo ghanandi chifukwa cha muliri COVID-19.
Mubali Robert Elongo, uyo ngwa mu Komiti ya Munthavi ya Congo (Kinshasa) wakuti: “Maboda ghakajalika. Chikaŵa chakusuzga kuti katundu wakuzengera wize mwaluŵiro, ndipo ivi vikapangiska kuti ntchito iyi yileke kwenda mwaluŵiro.”
Mubali Elongo wakuti nangauli vikaŵa nthena, kweni “mu chaka chimoza pera, tafiska kumalizga ntchito yinandi iyo yikaŵa mu chigaŵa chakwamba.”
Vikuwonekerathu kuti Yehova wakutumbika ntchito yakuzenga iyi. Tikulomba kuti mphanyi maofesi agha ghawovwira kuchitira ukaboni mu chigaŵa icho ghali kweniso kuchindika zina la Yehova Chiuta.—Mateyu 24:47.
a Ofesi ya munthavi ya Democratic Republic of the Congo (Kinshasa) yikulaŵilira ntchito ya Ufumu mu Democratic Republic of the Congo na Republic of the Congo.
