Ŵabali na ŵadumbu ŵithu pa charu chose ŵachali kupharazga apo muliri wa COVID-19 ukulutilira. Ŵapharazgi ku Ecuador ŵakupharazga makani ghawemi munthowa zakupambanapambana.

Mu msumba wa Ambato, msungwana wa vyaka 7, pamoza na amama ŵake, ŵakutumizga mameseji ku ŵasambizgi ŵake. Ghanyake mwa mameseji agha wakalemba kuti: “Mwawuka wuli asambizgi? Namutumirani meseji iyi kuti nimupembuzgani chifukwa cha nyengo zakusuzga izo tilimo. Pa Chivumbuzi 21:4, Baibolo likutiphalira kuti kunthazi uku vinthu vizamuŵa makora. Namutumirani linki iyo para mwajura, musangenge fundo zinandi.”

Msambizgi munyake wakazgora meseji iyo mwana uyu wakalemba. Wakati: “Nawonga chomene mwana wane. Nangauli ndiwe mwana, kweni walemba fundo zamahara.” Msambizgi munyake nayo wakamuwonga mwana uyu, ndipo wakamufumba usange buku la mutu wakuti Buku Lane la Nkhani za mu Baibolo lingasangika pa intaneti. Msambizgi uyu wakati, buku ili wakaŵa nalo kweni wali kubwerekeska mwana wa sukulu munyake. Mwana uyu wakaphalira msambizgi wake kuti wangachita dowunilodi buku ili pa jw.org.

Banja linyake mu msumba wa Quevedo likapenja ŵanthu awo Mbakaboni yayi pa manambara gha mu foni yawo. Ndipo pamanyuma likaŵalembera meseji iyi: “Ndine yumoza wa Ŵakaboni ŵa Yehova. Chifukwa cha muliri uwo wakhwaska charu chithu kweniso charu chose, tikutondeka kuti tipharazge ku nyumba na nyumba. Kweni takhumbanga kuti tichezgepo namwe kwizira pa pulogiramu yinyake ya pa kompyuta.”

Ŵanandi ŵakuzomera kuyowoya nawo pa pulogiramu ya pa kompyuta. Mwanakazi munyake uyo wakakananga kutegherezga uthenga withu, wakawonga chomene banja ili chifukwa chakuti likuyezgayezga kupembuzga ŵanthu. Mwanakazi uyu wakati wakufipa mtima chomene chifukwa cha umo vinthu viliri pasono. Banja ili likamutumira mwanakazi uyu PDF ya magazini ya Wukani, Na. 1 2020, ya mutu wakuti, “Umo Mungachitira Para Mukusuzgika Maghanoghano.” Apo ŵakadumbiskananga ulendo wakulondezgapo, mwanakazi uyu wakawonga chomene, ndipo wakati magazini iyi wayiŵerenga mwakuwerezgawerezga

Mudumbu munyake wakumangwa zina lake Johana, uyo wakukhala ku Santo Domingo de los Tsáchilas, “wakalemba” kalata ya vithuzi. * Wakajambura vithuzi na kutumira ŵanthu ŵakumangwa. Kweni pa ŵanthu awo ŵakaŵatumira vithuzi ivi pakaŵa mwanakazi munyake uyo wakaŵa wakumangwa yayi. Mwaluŵiro, mwanakazi uyu wakamba kumufumba mafumbo. Pakuti Johana wakapulikiskanga yayi ivyo mwanakazi uyu wakafumbanga, mupayiniya munyake zina lake Rhonda ndiyo wakazgora mafumbo ghara.

Mwanakazi yura wakamuphalira Rhonda kuti ivyo Johana wakajambura vikamuzizika chomene. Ndipo wakamufumba Rhonda usange pali mavesi ghanyake mu Baibolo agho ghakuyowoya za ivyo vikuchitika pa charu panyengo yasono. Rhonda wakamuŵerengera mwanakazi uyu lemba la Luka 21:10, 11 ndiposo wakamutumizgira linki ya mavidiyo ghakuti Chifukwa Wuli Chiuta Walekelera Uheni na Suzgo? na N’chifukwa Chiyani Mulungu Analenga Dziko Lapansi? Mwanakazi uyu wakaŵa wakukhumbisiska kuti ŵazakadumbiskaneso na Rhonda zuŵa linyake.

Paulosi wakalutilira “kuchitira ukaboni mwakukwana vya Ufumu wa Chiuta” apo wakaŵa mu jele. Mwakuyana waka, ŵabali ŵithu nawo ŵakulutilira kupharazga pa m’pata uliwose, nangauli ŵakupharazga uku ŵali ku nyumba zawo.—Milimo 28:23.