Pa Chisulo, March 5, 2022, Mubali Alan Costa, uyo ngwa mu Komiti ya Munthavi ya Ecuador, wakafumiska Baibolo la Mang’anamuliro gha Charu Chiphya Mateyu-Uvumbuzi mu viyowoyero vya Chiquichua vyakuchemeka Chimborazo na Imbabura. Viyowoyero ivi ndivyo ni vikuruvikuru pa viyowoyero vya Chiquichua ivyo vikuyowoyeka ku Ecuador. Mabaibolo agha ghakafumiskika gha pa intaneti kweniso ghakuchita kupulinta ndipo pulogiramu yake ŵanthu ŵakachita kuwonelera nyengo yeneyiyo.

Ŵanthu ŵanandi awo ŵakuyowoya Chiquichua ŵakukhala ku Mapiri gha Andes agho ghali pachanya mamita 2,700 m’paka 3,700 kufuma pasi. Ŵanthu awo ŵakukhala ku chigaŵa ichi ŵakutemwana chomene ndipo ŵakumanyikwa kuti mbakupa, ŵakulimbikira ntchito, kweniso ŵakupokelera ŵalendo. Ŵanandi ŵakugomezga kuti kuli Mlengi, ndipo ŵakulichindika chomene Baibolo.

M’ma 1990, Ŵakaboni ŵa Yehova ŵakang’anamura mabuku mu chiyowoyero icho chikumanyikwa kuti muli viyowoyero vyakupambanapambana vya Chiquichua, ivyo vikuyowoyeka ku Ecuador. Ndipouli, mbanthu ŵachoko chomene awo ŵakanweka na uthenga wa Ufumu mu chigaŵa cha chiyowoyero ichi. Vikawonekerathu kuti ŵabali ŵakakhumbikwiranga mabuku gha mu chiyowoyero cha mtundu uliwose pawekha kuti ŵaŵafike pamtima ŵanthu ŵa chiyowoyero ichi.

Awo ŵakuchita mulimo wakung’anamura mu Chiquichua ŵakawovwirika na ŵapharazgi ŵakufuma mu vigaŵa vyakupambanapambana vya charu ichi awo ŵakawelerangamo ivyo vyang’anamulika. Munyake uyo wakang’anamurako Baibolo la Chimborazo wakalongosoranga masuzgo agho ŵakasangana nagho pakung’anamura wakati: “Na wovwiri uwo ŵapharazgi aŵa ŵakatipa, tikafiska kung’anamura vinthu vyakuti waliyose wangapulikiska.” Munyakeso uyo wakang’anamurako Baibolo la Imbabura wakati: “Yehova wakatilongozganga, ndipo nkhajiwonera nekha kuti wakukhumba nadi waliyose wamanye Mazgu ghake na kughapulikiska.”

Mabaibolo ghaŵiri agha ni thumbiko ku ŵabali na ŵadumbu awo ŵakuyowoya Chiquichua apo ŵakuteŵetera Chiuta withu Yehova, uyo ni “Mponoski wa ŵanthu ŵa mitundu yose”—1 Timote. 4:10.