Kufuma pa 20 mpaka pa 24 September 2023, chiwoneskero cha mabuku cha nambara 9 chikachitika ku Guayaquil mu charu cha Ecuador. Ŵalendo ŵakujumpha 30,000 ŵakaŵapo pachiwoneskero ichi ku Guayaquil Expoplaza. Ŵabali ŵakanozga kanyumba kakuwoneskeramo mabuku ndipo ŵakalembapo kuti, “Buku Lakale Chomene Ilo Ndakovwira Mazuŵa Ghano.” Mutu uwu ukalongora kuti uthenga wa mu Baibolo ngwakovwira chomene ku ŵanthu ŵa misinkhu yose. Ŵanthu ŵakaŵa na mwaŵi kusanga mabuku mu viyowoyero ivi: Chitchayinizi Mandarin, Chingelezi, Chiphwitikizi, Chiquichua (Chimborazo), Chiquichua (Imbabura), na Chispanish. Ŵabali ŵakukwana 150 ŵakachitako chiwoneskero ichi. Ŵabali na ŵadumbu ŵakagaŵira mabuku ghakujumpha 700 ku ŵanthu ŵakunweka kweniso ŵanandi ŵakalongoreka umo ŵangapenjera nkhani zakupambanapambana pa webusayiti yithu ya jw.org.

Dada munyake na ŵana ŵake ŵachinyamata wakasendelera pafupi na uko tikawoneskanga mabuku ghithu ndipo wakayowoyapo vya masuzgo agho ŵana ŵake ŵakukumana nagho. Ŵabali ŵithu ŵakamulongosolera kuti fundo za mu Baibolo zikutchujuka yayi ndipo zingawovwira ŵachinyamata kuti ŵazizipizge masuzgo agho ŵakukumana nagho. Mwanalume uyu wakazomera kupoka buku la mutu wakuti, “Mayankho a Zimene Achinyamata Amafunsa—Buku Loyamba ndi Lachiwiri.” Ndipo wakayowoyapo kuti, “Namanyanga yayi kuti ningasanga mabuku gha fundo zakovwira nthena pa malo agha.”

Mama munyake wakafika apo tikawoneskeranga mabuku ghithu na kufumba usange wangasanga Baibolo. Iyo wakalongosora kuti wakukhala ku nyumba za mpanda ndipo ntchipusu yayi kuti wakumane na Ŵakaboni ŵa Yehova. Mudumbu withu wakamupasa Baibolo na kumulongosolera umo tikusambilira Baibolo kwaulere na ŵanthu. Pamanyuma, mwanakazi uyu wakafila fomu pa jw.org yakupempha kuti wasambirenge Baibolo na Ŵakaboni ŵa Yehova.

Mubali Diego uyo nayo wakachitako chiwoneskero ichi wakayowoyapo kuti: “Nangauli ŵanthu ŵanandi ŵakumanya webusayiti ya jw.org, kweni ŵanyake ŵakumanya vinandi yayi. Nkhugomezga kuti chiwoneskero ichi chawovwira ŵanthu kumanya umo Baibolo liliri lakovwira mazuŵa ghano.

Tili ŵakukondwa chomene kuwona umo ŵabali na ŵadumbu ŵithu ku Ecuador ŵakawovwilira ŵanthu kumanya vinjeru viwemi ivyo vikusangika mu Baibolo, ilo ni buku lakale chomene ilo lichali lakovwira mazuŵa ghano.—Zintharika 3:21.