Pa August 24, 2021, Ŵakaboni ŵa Yehova ku Ecuador ŵakawina mulandu wakuzirwa chomene mu khoti. Khoti Lakuwona vya Malango likapeleka chigamuro chake chakuti wanangwa wakusopa wa ŵabali na ŵadumbu awo ŵakukhala ku vigaŵa vyakutali chomene ku San Juan de Ilumán Chigaŵa cha Imbabura ukaphwanyika nadi. Ivyo Khoti likagamura vyawovwira kuvikilira wanangwa wakusopa wa ŵanthu mu charu chose cha Ecuador, chomenechomene ŵanthu awo ŵakukhala ku vigaŵa vyakutali chomene ndipo ivyo khoti likagamura apa vyaru vinyake vingagwiliskiraso ntchito.

Mu 2014, ŵalongozgi ŵa mu muzi ŵakanjira pa malo gha Ŵakaboni ŵa Yehova na kuŵakanizga kuti ŵaleke kuzenga Nyumba ya Ufumu. Kweniso ŵakakanizga ŵabali na ŵadumbu kuti ŵaleke kuwungana pamoza ndiposo ŵaleke kupharazga nyumba na nyumba. Ŵabali ŵakaluta na nkhani iyi ku khoti kuti urunji uwoneke. Ndipouli, makhoti ghaŵiri mu chigaŵa ichi ghakati palije wanangwa wa Ŵakaboni ŵa Yehova, uwo ukaphwanyika.

Pamanyuma pakuti vyatondeka ŵabali ŵati ŵayezgayezga kuti ŵamazge nkhani iyi ku makhoti ghachokoghachoko, ŵakatolera nkhani iyi ku Khoti Lakuwona vya Malango, khoti likuru chomene mu charu cha Ecuador. Khoti Lakuwona vya Malango likayowoya pakweru kuti makhoti ghachokoghachoko ghakaswa wanangwa wakusopa wa Ŵakaboni ŵa Yehova. Ŵalongozgi ŵa mu chigaŵa kweniso ŵeruzgi ŵa makhoti ghakwamba, ŵakaphalirika na khoti likuru kuti ŵakaŵepo pa masambiro gha umo ŵanthu awo ŵakupambana chisopa kweniso mitheto ŵangakhalira mwakukolerana. Kweniso khoti likuru ili likaphalira ŵalongozgi ŵa mu chigaŵa kuti ŵakwenera kuvikilira na kudumbiskana pamoza nkhani zakukhwaskana na “chisopa kweniso mitheto mwamtende, chomenechomene kuvikilira milimo” yakukhwaskana na Ŵakaboni ŵa Yehova.

Philip Brumley, wakupeleka fundo wa Ŵakaboni ŵa Yehova wakati: “Tikumanya kuti malango ghakuvikilira wanangwa wa ŵanthu awo ŵakukhala ku vigaŵa vyakutali kweniso mitheto yawo, kweni chingaŵa chiheni kugwiliskira ntchito malango agha pakuswaa wanangwa wa munthu waliyose.”

Ŵakaboni ŵa Yehova ku San Juan de Ilumán ŵakuwonga chomene Khoti umo lagamulira nkhani iyi.

Tikukondwa chomene kuwona ukaboni wa “woko la Yehova” para ŵabali na ŵadumbu ŵithu ŵakupindura pamanyuma pakuwina milandu yakuvikilira wanangwa wakusopa.—Zintharika 21:1.