Mu March 2022 Ŵakaboni ŵa Yehova ku El Salvador ŵaŵenge kuti ŵakwaniska vyaka 50 kufuma apo ŵakazomerezgekera na dango. Boma lati laŵazomerezga ŵabali ŵithu pa March 27, 1972, chiŵelengero cha ŵapharazgi ku El Salvador chikakura mwaluŵiro chomene kufuma pa 2,524 mu 1972 kufika pa 5,632 mu 1976. Pasono, kuli ŵapharazgi ŵakujumpha 38,000 awo ŵakuteŵetera mu mipingo 662.

Ŵamishonale ŵakafika mu charu ichi mu 1945 ndipo ŵakaŵikapo mtima pa mulimo wakupharazga. Panyengo iyo, mphanyi chikaŵa chipusu kuti ŵazomerezgeke na boma kukhala mu charu ichi kwa nyengo yitali. Mipingo yikamba kupangika, ndipo ofesi ya munthavi yikakhazikiskika mu May 1946.

Mu 1968, dango liphya lakukhwaskana na kwenda likapangiska kuti chiŵe chakusuzga kwa ŵamishonale kukhala mu charu ichi kwa vyaka vyakujumpha 5. Ŵabali ŵakawamo kuti ivi vikhwaskenge chomene ntchito yakupharazga. Ntheura ŵabali awo ŵakalongozganga ŵakaghanaghana vya kukalembeska ku boma kuti ŵaŵe ŵakuzomerezgeka na dango.

Cha kuumaliro wa 1971, ŵabali ŵalara pafupifupi 30 ku El Salvador ŵakachemeka ku ofesi ya munthavi kuti ŵakadumbiskane vya nkhani iyi. Paungano uwu, Mubali Baltasar Perla, Sr., uyo pamanyuma wakazakateŵetera mu Komiti ya Munthavi, wakapempha ŵalara awo ŵakaŵa pa ungano uwu kuti ŵamupe makadi ghawo ghakuŵamanyikwiska agho boma likaŵapa. Pamanyuma wakaŵaphalira kuti mazina ghawo na ma adiresi viŵikikenge pa pempho lakuluta ku boma lakuti Ŵakaboni ŵa Yehova ŵaŵe ŵakuzomerezgeka na dango.

Mubali Juan Antonio Flores, yumoza mwa ŵabali ŵalara awo ŵakaŵapo pa ungano uwu, wakuti: “Mubali Perla, Sr., wakati pakuti mazina na maadiresi ghithu ghamuŵa pa chikalata, para boma likukhumba kukanizga ntchito yithu, ise ndise tamuŵa pakwamba kukakika na kujalirika mu jele.” Mubali Perla, Sr., wakapeleka mwaŵi kwa waliyose uyo wakuchita wofi kuti wamuwezgere kadi yake. Pakaŵavya na yumoza uyo wakakhumba kuti ŵamuwezgere. Chakukondweska ntchakuti, boma likakanizga yayi mulimo withu, ndipo palije uyo wakajalirika mu jele.

Vyose vikenda makora, ndipo wupu wa Association of Jehovah’s Witnesses ukazomerezgeka na dango mu chaka chakulondezgapo. Kufuma waka panyengo iyi, ŵamishonale ŵakazomerezgekanga kuzakakhalirathu mu charu ichi. Chinyake ntchakuti, chikaŵa chipusu kuti ofesi ya munthavi yichemeske mabuku kweniso kuti ŵabali ŵavikilire wanangwa withu wakuleka kunjilirapo pa vya charu ku sukulu na ku ŵamazaza ŵa boma.

Pa April 26, 1972, nyuzipepara ya boma ku El Salvador yikafumiska nkhani iyo yikalongosoranga chilato chikuru cha wupu wakuzomerezgeka uwu. Yikati : “[Nkhu] pharazga visambizgo vyakukhwaskana na Baibolo na Ufumu wa Chiuta kweniso kuchitira ukaboni zina lake, uthenga wake, na ukuru wa Chiuta wankhongono zose Yehova.”

Pajumpha vyaka vinandi kufuma apo mazgu agha ghakalembekera, kweni Ŵakaboni ŵa Yehova ku El Salvador ŵakulutilira kupharazga vya Yehova.—Yesaya 25:9.