Pa September 27, 2024, ŵalara ŵa boma ku Eritrea ŵakanjira mu nyumba ya Ŵakaboni ŵa Yehova apo ŵakachitanga maungano. Ŵapolisi ŵakakaka ŵanthu 24, ndipo pa ŵanthu aŵa pakaŵa ŵabali 6, ŵadumbu 16 na ŵana ŵaŵiri. Pati pajumpha mazuŵa ghatatu, ŵapolisi ŵakizaso na kukaka mudumbu wa vyaka 85 uyo wakakhalanga pa nyumba iyi. Pamanyuma ŵana ŵaŵiri aŵa ŵakaŵafumiska mu jele apo ŵanthu 23 ŵakaŵatumizga ku jele la Mai Serwa.

Pasono ku Eritrea, mu jele muli Ŵakaboni ŵa Yehova 63 awo ŵali kukakika chifukwa cha chipulikano chawo, ndipo 10 ŵali na vyaka vyakujumpha 70. Palije na yumoza wa ŵabali na ŵadumbu aŵa, kusazgapo awo ŵakakakika pa nyengo yimoza uyo ŵali kumusanga na mulandu panji kweruzgika ku khoti.

Nangauli ku Eritrea Ŵakaboni ŵa Yehova ŵali kwamba ni kale kutambuzgika, kweni sono vyafika panyake. Pasono pajumpha vyaka pafupifupi 30 kufuma apo pulezidenti wa ku Eritrea pa October 25, 1994 wakaŵapokera wenekaya Ŵakaboni wose awo ŵali kubabikira mu charu ichi. Kwambira waka pa nyengo iyi ndipo ŵabali na ŵadumbu ŵithu ŵatambuzgika chomene na kujalirika mu jele kwambura vifukwa vyakupulikikwa.

Tili na chitima kweniso takhwaskika chomene chifukwa cha ivi vikuchitika apa. Apo tikulomba ‘kukumbuka awo ŵali mu jele’ ku Eritrea, tikugomezga kuti Yehova walutilirenge kuŵapembuzga, kuŵawovwira kuzizipizga na kuŵapa nkhongono ŵabali na ŵadumbu ŵithu.—Ŵahebere 13:3.