Wupu wa United States Commission on International Religious Freedom (USCIRF) wayowoya kuti ukufipa mtima na Mubali Tesfazion Gebremichael, uyo wali kujalirika mu jele ku Eritrea vyaka vyakujumpha 11. Wupu uwu wa USCIRF wayowoya ivi pa webusayiti yake kuti “Gebremichael uyo pasono wali na vyaka vyakujumpha 80 wakufipiska mtima kukhala mu jele chifukwa ni muchekuru ndipo wakulwaralwara.” Pa October 7, 2022, Mulara wa wupu wa USCIRF, Frederick Davie wakapharazga kuti Mubali Gebremichael wafumiskike mu jele.

Ŵamazaza ŵakamukaka Mubali Gebremichael pa July 20, 2011, apo wakayowoyanga vya chigomezgo chake ku ŵanji. Nangauli wali kubabikira ku Eritrea, kweni wakumanyikwaso kuti ni mwenekaya wa charu ichi yayi chifukwa boma lili kupoka wenekaya wa Kaboni wa Yehova waliyose mu 1994.

Mubali Gebremichael wakaŵa yumoza wa Ŵakaboni ŵa Yehova mu January 1971. Wakumanyikwa kuti ni munthu wachitemwa, walusungu, kweniso wakovwira ŵanthu. Mu 1974, wakatorana na Lemlem. Nayo ni Kaboni wa Yehova. Ŵali na ŵana ŵanayi na ŵazukuru ŵankhondi.

Mudumbu Gebremichael wakuti: “Nangauli nkhufipa mtima chifukwa mfumu wane wakulwaralwara apo wali ku jele, kweniso nachisoŵa chitemwa chake na wovwiri wake kweni nkhumanya kuti Yehova wamupwelelerenge. Icho chikunikondweska ntchakuti mfumu wane ngwakukhumbisiska kuŵa wakugomezgeka kwa Yehova. Para nkhughanaghanira lemba la Mupharazgi 10:4 likunikhozga chomene kuti mtima wane uŵe m’malo nangauli mbumba yithu yikusangana na masuzgo nga agha.”

Kufuma waka mu 1991, charu cha Eritrea chakhala chikutambuzga chomene Ŵakaboni ŵa Yehova. Nangauli Ŵakaboni 32 ŵali kufumiskika mu jele kwamba mu December 2020 m’paka mu February 2021, kweni ŵabali na ŵadumbu ŵithu 20 ŵachali ŵandafumiskike mu jele. Wose ŵakuphalirika yayi apo ŵafumirenge. Pakuti pasono palije malango agho ghangavikilira wanangwa wawo, ŵabali aŵa para ŵajalirika ndikuti ŵakukhazga kukhala umoyo wawo wose mu jele.

Mawupu agho ghakuwona vya wanangwa wa ŵanthu pa charu chose ghasuskapo kanandi waka ivyo charu cha Eritrea chikuchita pa kuswa wanangwa wa ŵanthu, ndipo ghachiska ŵalaraŵalara ŵa charu cha Eritrea kuti ŵayiwone makora nkhani iyi. Wupu wa UN Commission of Inquiry on Human Rights in Eritrea nawo ukayowoya fundo yakuyanako waka mu 2016 apo ukati, ŵamazaza ŵa charu cha Eritrea ŵali “kupalamura mulandu ” chifukwa ŵakutambuzga Ŵakaboni ŵa Yehova na ŵanji.

Chifukwa chakuti ŵamazaza ŵa boma ili ŵachali kulutilira kumusunga mu jele Mubali Gebremichael, mbukaboni wakuti ŵakuchitira nkhaza Ŵakaboni ŵa Yehova, nanga ŵangaŵa ŵachekuru. Kufuma waka mu 2011, Ŵakaboni ŵanayi ŵali kufwa uku ŵachali mu jele ndipo Ŵakaboni ŵachekuru ŵatatu ŵali kufwa ŵati ŵafumiskika waka mu jele chifukwa cha nkhaza izo ŵakaŵachitiranga pa nyengo iyo ŵakajalilikira.

Ŵamazaza ŵa charu cha Eritrea ŵali kukana ivyo Ŵakaboni ŵa Yehova ŵakapempha kuti ŵadumbirane nkhani iyi.

Tikuŵalombera ŵabali na ŵabali ŵithu awo ŵali kuŵikika mu jele kwambura chifukwa chakupulikikwa. Tili na chigomezgo kuti Yehova walutilirenge kuŵapwelelera.—Ŵahebere 13:3.