Fiji

• Pa Chinayi, December 17, 2020, chimphepo chakuchemeka Tropical Cyclone Yasa chikaputa pa chilwa cha Vanua Levu icho ntchachiŵiri pa vilwa vikuruvikuru ku Fiji

• Chimphepo cha Yasa ntchachiŵiri pa vimphepo vyankhongono ivyo vyaputapo ku Fiji. Malipoti ghakulongora kuti mphepo yikaputanga pa sipidi ya makilomita pafupifupi 260 pa ora limoza (161 mph)

• Mu vigaŵa ivyo vyakhwaskika, muli mipingo pafupifupi 30 na tumagulu twa ku vigaŵa vyakutali

• Palije mubali panji mudumbu uyo wali kupwetekeka

• Malipoti ghakwambilira ghakulongora kuti mbumba 20 zikasamuka mu nyumba zawo

• Chimphepo ichi chikasaza chomene mbewu, ndipo ŵapharazgi 430 mu chigaŵa ichi awo ŵakugomezga ulimi kuti ŵasange chakurya ŵakhwaskika chomene na soka ili

• Nyumba 10 zikanangikirathu

• Nyumba 25 zikanangika

• Nyumba ya Ufumu yimoza yikanangika pachoko waka

• Ofesi ya munthavi ya Fiji yili kwimika Makomiti ghatatu Ghakovwira Para Kwachitika Soka. Makomiti agha ghakovwira kupeleka vinthu vyakukhumbikwa ku ŵapharazgi awo ŵakhwaskika, vinthu nga maji ghawemi ghakumwa, vyakuvwara, chakurya na mathenti. Makomiti agha ghakovwiraso ŵapharazgi awo nyumba zawo zili kunangika kuti ŵasange pakukhala pakukolerapo waka

• Ŵakwimira ofesi ya munthavi ya Fiji pamoza na ŵalaŵiliri ŵa dera mu chigaŵa ichi, ŵakuchita maulendo ghauliska kwa awo ŵakhwaskika

• Wose awo ŵakovwirapo pa ntchito yakupeleka wovwiri kweniso awo ŵakuchita maulendo ghauliska ŵakulondezga malango ghakujivikilira ku muliri wa COVID-19

Nangauli ŵabali na ŵadumbu ŵithu ŵataya katundu wawo munandi chifukwa cha chimphepo chakofya ichi, kweni ŵakujiwonera ŵekha kufiskika kwa mazgu gha pa Salimo 46:1: “Chiuta ntchiphokwero chithu.”