Pa June 30, 2023, Mubali Joni Shalamberidze, uyo wali mu Komiti ya Munthavi ya Georgia, wakafumiska buku la mu Baibolo la Makani Ghawemi la Mateyu mu Chimingreliya. Ili ni buku lakwamba la mu Baibolo kufumiskika mu chiyowoyero ichi. Buku ili likafumiskika pa Ungano wa Chigaŵa wa 2023 wa mutu wakuti ‘Lutilirani Kuzikira’! ndipo pakaŵa ŵanthu 627 apo likafumiskikanga. Ungano uwu ukachitikira ku malo ghakuchitirako ungano gha Zugdidi, Georgia. Ŵanthu ŵakapokera Baibolo lakupulinta kweniso pakaŵa mwaŵi wakuti ŵanthu ŵangachitaso dawunilodi pa intaneti.

Chimingreliya chikuyowoyeka chomene na ŵanthu awo ŵakukhala ku chigaŵa cha Samegrelo uko nkhumanjiliro gha dazi kwa Georgia. Mu 2019, Ŵakaboni ŵa Yehova ŵakajura ofesi ya kung’anamulirako mabuku ku Zugdidi.

Ŵakaboni ŵa Yehova mbamoza mwa ŵanthu ŵachoko waka awo ŵali kufumiska buku mu chiyowoyero cha Chimingreliya. Wakung’anamura munyake wakayowoya kuti:“Chifukwa chakuti Chimingreliya chikuyowoyeka na ŵanthu ŵanandi, chikuyowoyeka mwakupambanapambana ndipo chilije malango ghakalembero ka masipeling’i. Ivi vikapangiska mulimo withu wakung’anamura kuŵa wakusuzga chomene. Kufuma apo tikasankha kuti tilondezgenge malango ghakalembero gha Chigeorgia kweni kwambura kuzerezga umo Chimingreliya ichi chikuyowoyekera.”

Kweniso tilije mazgu ghanyake mu Chimingreliya agho ghangayana ndendende na mazgu ghanyake agho ŵali kugwiliskira ntchito mu Baibolo. Mwachiyelezgero mu chiyowoyero chithu mulije mazgu ghakuti “kupera.” Ntheura awo ŵakang’anamuranga ŵakagwiliskira ntchito mazgu ghakuti “kuchita chitima chifukwa cha zakwananga izo wachita.”

Tikukondwera nawo lumoza ŵabali na ŵadumbu ŵithu awo ŵakuyowoya Chimingreliya apo ŵapokera buku lakung’anamurika makora ili kuti ŵawovwire ŵanthu awo “ŵakupulika njara na nyota yaurunji.”—Mateyu 5:6.