JANUARY 24, 2024
GERMANY
Charu cha Germany Chikapeleka Chawanangwa Chikuru kwa Mudumbu Simone Arnold-Liebster Chifukwa cha Kusambizga Ŵachinyamata
Pa 15 December 2023, boma la Germany likapeleka chawanangwa chikuru kwa Mudumbu Simone Arnold-Liebster. Chawanangwa chikuru cha nthena ichi, chikupelekeka ku ŵanthu awo ŵachita milimo yiwemi yakovwira ŵanthu ŵanandi. Thomas Pröpstl uyo ni mulara wakwimira boma ndiyo wakapeleka chawanangwa ichi kwa Simone pa ungano uwo ukachitikira ku Chambéry, ku France. Simone pasono wali na vyaka 93. Iyo wakawongeka chifukwa cha kukumbuska ŵanthu vinthu vya nkhaza ivyo Boma la Nazi likachitiranga ŵanthu awo ŵakakananga kukolelerana nalo.
Kufika mwahuno, Simone wayowoyapo na ŵanthu mu vyaru 25. Ŵanthu pafupifupi 65,000 ŵali kuchitako maungano agha kusazgapo ŵana ŵasukulu kweniso ŵasambizgi. Nangauli pasono ngwachilara, kweni wakulutilira kuyowoya na ŵanthu ŵanandi mwakugwiliskira ntchito videoconference pakuzgora mafumbo kufuma ku ŵachinyamata. Iyo wakulongosoraso ivyo vikamuchitikiranga pa nyengo iyo nayo wakaŵa wachinyamata. Mwana wa sukulu munyake uyo wakaŵapo pa ungano wake unyake, wakayowoya kuti: “Nkhati nategherezga ivyo Simone wakalongosoranga, nkhamanya kuti munthu wakuŵa na chikanga usange wapulikiska makora ivyo wakugomezga.”
Simone Arnold-Liebster wakuyowoya na ŵana ŵasukulu ku Colorado, U.S.A., kwizira pa videoconference
Thomas Pröpstl apo wakapelekanga chawanangwa ichi wakayowoya kuti: “Ntchakukondweska chomene kuwona umo mukuchiskikira kuphalirako ŵanyinu za masuzgo agho mukakumana nagho. Nyengo zose mukuyowoya mwaunenesko kweniso mwalusungu ndipo mukuŵa na chigomezgo kuti vinthu vizamuŵa makora munthazi. Pa chifukwa ichi nkhupeleka ntchindi zikuru.”
Panyengo ya muwuso wa Nazi, Simone na mbumba yake ŵakatambuzgika chomene nga umo vikaŵiraso na Ŵakaboni ŵa Yehova ŵanandi. Apo Simone wakaŵa na vyaka 12, boma la Nazi likamutumizga ku jele la ku Von Wessenberg Reformatory. Ku jele ili ŵakachichizganga ŵanthu kuti ŵazomerenge na kukolerana na ivyo boma likukhumba. Chifukwa chakuti wakakana kuleka chipulikano chake, Simone ŵakamuyuyura, ŵakamupanga kachakurya kachoko chomene, kumugwiliska ntchito zinonono, kweniso kumukanizga kuyowoya na waliyose pafupifupi vyaka viŵiri. Pakukumbuka ivyo vikamuchitikira, Simone wakayowoya kuti: “Yehova wakanovwira ndipo nkhalutilira kuŵa wakugomezgeka.”
Tikuwonga chomene kuti Simone wakalongora kugomezgeka kweniso kuti wakulutilira kupeleka uchindami kwa Adada ŵithu Yehova.—Mateyu 5:16.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Ntchivichi Chikachitikira Ŵakaboni ŵa Yehova mu Nyengo ya Chipani cha Nazi?
Manyani ivyo vikaŵachitikira.
