Pa April 22, 2023, jele la ku Flossenbürg Bavaria, Germany likachita mwambo wakukumbukira Ŵakaboni ŵa Yehova awo ŵakafwa apo ŵakagwiranga jele ku malo agha. Flossenbürg ndimoza mwa majele 9 agho ghali kuchita mwambo wakukumbukira Ŵakaboni ŵa Yehova awo ŵakachitirika nkhaza.

Ŵakaboni ŵa Yehova ŵakujumpha 100 ŵakajalirika mu jele la Flossenbürg kweniso mu majele ghanyake ghapafupi. Ŵachibali ŵanyake ŵa ŵanthu awo ŵakakakika ŵakaŵapo pa mwambo uwu. Mubali munyake uyo wakaŵapo pa mwambo uwu wakayowoya kuti “Kuŵa pa malo agha, apo ŵabali ŵithu ŵakachitirika nkhaza chikaŵa chinthu chakuchitiska chitima chomene. Ndipouli, kughanaghanira umo ŵabali ŵithu ŵakagomezgekera kwa Yehova, chikaŵa chakukondweska ndipo ukaŵa mwambo wapadera chomene.”

Pulofesa Jörg Skriebeleit, uyo ni mulara wa jele la Flossenbürg, wakayowoya kuti “chisopa cha Ŵakaboni ŵa Yehova chikaŵa chakwamba kukanizgika apo chipani cha Nazi chikaŵa na nkhongono kuwusa mu charu ichi mu March 1933.” Mu mazgu ghake, wakati “Chipulikano icho Ŵakaboni ŵa Yehova ŵakaŵa nacho ndicho chikaŵapanga nkhongono apo ŵakaŵa mu jele. Chipulikano chikaŵapanga nkhongono kuzizipizga masuzgo kweniso chikawovwiranga ŵanthu ŵanyake.”

Mubali Wolfram Slupina, muyowoyeri wa Ŵakaboni ŵa Yehova ku Germany, nayo wakayowoyapo pa mwambo uwu. Wakaphalira ŵanthu kuti: “Ntchakuzirwa chomene kwa tose ndipo tizamuluwapo yayi mbiri ya Ŵakaboni ŵa Yehova awo ŵakajalirika mu majele yakuyuzgirako ŵanthu. Mbiri ya ŵanthu awo ŵakaŵa ŵakukhumbisiska kulondezga fundo izo ŵakasambira mu nyengo yakusuzga chomene ku Germany.”

Tili na chigomezgo chose kuti ŵabali na ŵadumbu ŵithu awo ŵakatambuzgika ndipo ŵanji ŵali kufwa mu majele yakusuzgirako ŵanthu, Chiuta wali kuŵalemba mu “buku la chikumbusko.”—Malaki 3:16.