Pa Sabata, April 24, 2022, Mubali Mark Sanderson, uyo ngwa mu Wupu Wakulongozga, wakafumiska Baibolo lakunozgekaso la Malemba Ghakupatulika mu Mang’anamuliro gha Charu Chiphya mu Chitwi (Asante). Pamanyuma pakuti nkhani yakufumiska Baibolo ili yamara waka, ŵanthu ŵakaŵa na mwaŵi wakuti ŵangachita dawunilodi Baibolo ili pa intaneti. Ghakuchita kupulinta ghambenge kusangika mu August.

Chitwi (Asante) na Chitwi (Akuapem) ni viyowoyero ivyo ŵakuyowoya ŵanthu ŵa mtundu wa Akan, ndipo vikuyowoyeka na ŵanthu mamiliyoni kumanjiliro gha dazi kwa Africa. Baibolo likamba kusangika mu Chitwi mu 1871, kweni chikaŵa Chitwi cha (Akuapem) pera. Mu 1897, Baibolo linyakeso mu Chitwi (Akuapem) likafumiskika. M’paka mu 1964 ndipo Baibolo lakwamba la Chitwi (Asante) likafumiskikanga. Mu 2012, Ŵakaboni ŵa Yehova ŵakafumiska Baibolo la Mang’anamuliro gha Charu Chiphya mu Chitwi (Asante).

Pakuyowoyapo vyakukhwaskana na ntchito ya kung’anamura Baibolo ili, yumoza mwa awo ŵakang’anamurako wakati: “Pakwamba, tikawonanga kuti ntchito iyi njikuru chomene, tingafiska yayi. Ndipouli, pamanyuma pa kulomba na kuthemba chomene wovwiri wa Yehova, tikawona kuti zuŵa lililose Yehova wakatovwiranga pa ntchito iyi.”

Baibolo lakunozgekaso la Mang’anamuliro gha Charu Chiphya mu Chitwi (Asante) ntchawanangwa chinyake icho chiwovwirenge ŵabali na ŵadumbu awo ŵakuyowoya Chitwi kuti ŵateŵetere makora Chiuta withu Yehova uyo ngwakupa.—Yakobe 1:17.