Pa August 14, 2021, chindindindi chankhongono chomene chikachitika kumwera cha kumanjiliro gha dazi kwa Haiti, ndipo pamanyuma pa chindindindi ichi pakachitikaso tuvindindindi tuchokotuchoko tunandi. Ŵachali kufufuza kuti ŵamanye makora vinthu ivyo vyasakazika.

• Chachitima ntchakuti ŵadumbu ŵithu ŵatatu ŵali kufwa

• Ŵabali na ŵadumbu ŵithu 21 ŵali kupwetekeka

• Nyumba 119 zanangika

• Nyumba 72 zanangikirathu

• Nyumba za Ufumu 5 zanangika pachoko waka

• Nyumba za Ufumu zinayi zanangika chomene

• Komiti Yakovwira Para Kwachitika Soka ndiyo yikulongozga pa ntchito yakupeleka wovwiri. Komiti iyi pamoza na ŵalaŵiliri ŵa dera ŵaŵiri ŵa mu chigaŵa icho chakhwaskika kweniso ŵalara mu mpingo ku chigaŵa ichi ndiwo ŵakupeleka wovwiri ku ŵabali na ŵadumbu kweniso kuŵakhozga mwauzimu

• Komiti Yakovwira Para Kwachitika Soka ndiyo yikwendeska ntchito yakupeleka vinthu vyakukhumbikwira pa umoyo nga ni mabulangeti, vyakuvwara, chakurya, munkhwala, mathenti, na maji. Kweniso Komiti iyi yanozga ndondomeko yakuti ŵabali na ŵadumbu awo ŵapwetekeka ŵapokere wovwiri wa chipatala

• Ntchito yose yakupeleka wovwiri yikuchitika mwakulondezga ulongozgi wa umo tingajivikililira ku muliri wa COVID-19

Nangauli ŵabali na ŵadumbu ŵakakumana na suzgo ili, kweni mipingo yinandi ku chigaŵa icho kukachitika chindindindi ŵakakwaniska kuchita maungano gha kuumaliro kwa Sabata pa August 15, kwizira pa videoconference. Kweniso ŵabali na ŵadumbu ŵakakwaniska kuwonelera chigaŵa cha mulenji cha pa Sabata cha Ungano wa Chigaŵa wa mutu wakuti ‘Chipulikano Chikutipa Nkhongono!’

Tili na chitima chomene na nyifwa ya ŵadumbu ŵithu ŵatatu. Tikulombera ŵabali na ŵadumbu ŵithu awo ŵali na chitima panji ŵali kupwetekeka kweniso ŵakusuzgika maghanoghano chifukwa cha chindindindi icho chili kuchitika. Tikumanya kuti Yehova wakuwona vyakuŵinya vyawo ndipo walutilirenge kuŵa malo ghawo gha chiphokwero na nkhongono, panyengo ya suzgo iyi.—Salimo 46:1, 2.