Pa June 27, 2021, Baibolo la Malemba Ghakupatulika mu Mang’anamuliro gha Charu Chiphya mu chiyowoyero cha Chitamil likafumiskika mu vilembo vya Roman. Pulogiramu ya kufumiska Baibolo ili yikalongoreka pa Intaneti ndipo ŵabali na ŵadumbu awo ŵakuyowoya chiyowoyero cha Chitamil kufuma mu vyaru vyakupambanapambana 16 ŵakawonelera pulogiramu iyi.

• Chiyowoyero cha Chitamil chikuyowoyeka na ŵanthu pafupifupi 85 miliyoni pa charu chose

• Ŵapharazgi ŵakujumpha 20,500 ŵakuteŵetera mu mipingo 334 na mu magulu 32 gha chiyowoyero cha Chitamil

• Ŵanthu 5 awo ŵakang’anamura Baibolo ili ŵakagwira ntchito iyi kwa myezi 6 kuti ŵamalizge mulimo wose

Baibolo la Mang’anamuliro gha Charu Chiphya mu chiyowoyero cha Chitamil likafumiskika mu September 2016. Baibolo ili lawovwira chomene ŵanthu awo ŵakuyowoya Chitamil pa charu chose. Kweni ŵanthu ŵanyake awo ŵakuyowoya chiyowoyero ichi vikuŵasuzga kuŵerenga mu vilembo vya Tamil ndipo ŵakutemwa kuŵerenga mu vilembo vya Roman.

Pakuyowoyapo pa nkhani yakusambira Baibolo payekha, mudumbu munyake uyo wakachitako ntchito iyi yakung’anamura wakati: “Vikanisuzganga chomene kuŵerenga Baibolo la vilembo vya Tamil ndipo nkhagomezganga chomene Baibolo la Chingelezi. Ntheura pasono, Baibolo liphya ili linovwirenge chomene.”

Tili na chigomezgo chose kuti Baibolo ili, liwovwirenge chomene ŵabali na ŵadumbu ŵanandi kuti ŵaŵerengenge Mazgu gha Chiuta “pasipasi” na kuŵa ŵakukondwa pa umoyo wawo kweniso ŵawovwirenge nalo ŵanthu ŵanandi mu uteŵeti.—Joshuwa 1:8.