Pa Sabata, October 25, 2020, Baibolo la Malemba Ghakupatulika mu Mang’anamuliro gha Charu Chiphya likafumiskika mu viyowoyero vitatu vya ku India: Chigujarati, Chikannada na Chipunjabi. Mabaibolo agha ghali kufumiskika pa Intaneti pera, ndipo nkhani yake yikajambulikirathu. Ŵapharazgi ŵakawonelera pulogiramu iyi uku ŵali ku nyumba kwawo. Pamanyuma pa nkhani iyi, ŵapharazgi ŵakaŵa na mwaŵi wakupanga dawunilodi Baibolo mu chiyowoyero chawo.

Pa charu chose pali ŵanthu pafupifupi 61 miliyoni awo ŵakuyowoya Chigujarati.

Ŵanthu 6 ndiwo ŵakachitako mulimo wakung’anamura Baibolo ili, uwo ukatora vyaka 7 kuti umare. Yumoza mwa awo ŵakang’anamurako wakuti: “Kufumiskika kwa Baibolo ili kwatikondweska chomene. Ndipusu chomene na ŵana wuwo ŵangapulikiska ivyo vikuyowoyeka.”

Munyakeso uyo wakang’anamurako wakuti : “Baibolo ili lawezgeramo zina la Yehova mu malo ghose umo likasangikanga mu mpukutu wakwambilira. Tikugomezga kuti chipulikano cha ŵabali na ŵadumbu ŵithu ŵanandi chikhozgekenge chomene apo ŵakugwiliskira ntchito Baibolo ili para ŵakusambira paŵekha.”

Tili na chigomezgo chose kuti Baibolo lipusu ili lovwirenge chomene awo ŵaliŵazgenge kweniso liwovwirenge “ŵakuzika” kusambira nthowa za Yehova.—Salimo 25:9.

Pali mphambano yikuru chomene pakati pa Chikannada chakuchita kulemba na cha kuyowoya. Chiyowoyero ichi chikuyowoyeka mwakupambana mu vigaŵa vyakupambanapambana. Ntheura chikaŵa chakusuzga chomene kuti awo ŵakang’amuranga ŵang’anamure vinthu vyaunenesko mu mazgu ghapusu kweniso kuyana na umo ŵanthu ŵakuyowoyera.

Mulimo wakung’anamura ukatora vyaka vyakujumpha 7 kuti umare. Ŵanthu 10 ndiwo ŵakachitako ntchito ya kung’anamura Baibolo ili. Yumoza mwa ŵanthu awo ŵakang’anamurako Baibolo ili wakuti: “Nkhaghanaghananga kuti Baibolo ili lizamufumiskika mu 2021 chifukwa chakuti pasono kuli muliri uwu wa COVID-19. Kweni kufumiskika kwa Baibolo ili mbukaboni wakuti palije chilichose icho chingatondeska mulimo wa Yehova.”

Munyakeso uyo wakang’anamurako Baibolo ili wakuti: “Ntchakukondweska chomene kumanya fundo yakuti pasono ŵanthu awo ŵakuyowoya Chikannada, ŵaŵazgenge mazgu gha Chiuta mu chiyowoyero chawo na kusanga zina lake mu malo mose umo likwenera kuŵa!”

Tikugomezga kuti Baibolo ili liwovwirenge chomene ŵapharazgi ŵakujumpha 2,800 ŵa chiyowoyero ichi awo ŵakukhala mu chigaŵa cha ofesi ya munthavi ya India. Liwovwirengeso ŵanthu pafupifupi 46 miliyoni awo ŵakuyowoya chiyowoyero ichi pa charu chose kuti ŵapulikiske kuti Chiuta “wali na vinjeru ndipo wakumanya chomene vinthu.”—Ŵaroma 11:33.

Ŵanthu 6 ndiwo ŵakang’anamura Baibolo la Malemba Ghakupatulika mu Mang’anamuliro gha Charu Chiphya mu Chipunjabi ndipo likatora vyaka 12 kuti limare. Baibolo ili liwovwirenge ŵanthu ŵakujumpha 100 miliyoni awo ŵakuyowoya chiyowoyero ichi ku India na vyaru vyapafupi kweniso pa charu chose.

Yumoza mwa awo ŵakang’anamurako wakuti : “Tikachita waka ivyo tingafiska chifukwa tikaŵa na vinthu vichoko vyakugwilira ntchito yithu. Yehova wakatovwira chomene kuti tifiske mulimo uwu. Baibolo ili likhozgenge chipulikano cha ŵabali ŵithu, liŵapenge mtende na nkhongono izo ŵakukhumbikwira kuti ŵazakazizipizge masuzgo agho ghakwiza munthazi.”

Munyakeso uyo nayo wakang’anamurako wakati: “Ŵanthu ŵa mitima yiwemi ŵamukondwa chomene kuŵerenga Baibolo ili, chomenechomene mabuku agho ghali kulembeka nga ni powemu. Ŵamupindura chomene na vigaŵa vyakufufuzira nkhani ivyo vikusangika mu Baibolo ili.”

Tose tikuwonga Yehova lumoza na ŵabali ŵithu chifukwa cha ‘milimo yake yakuzizwiska’ iyo ‘yingapendeka yayi.’—Salimo 40:5.