Pa Sabata, October 29, 2023, mabomba ghakaphulika pa ungano wa chigaŵa uwo ukachitikira ku Kerala, ku India. Kweni chachitima ntchakuti padera pa ŵanthu ŵatatu awo tikayowoya kuti ŵali kufwa, mubali munyake na ŵadumbu ŵaŵiri ŵafwaso. Pa ŵanthu aŵa pakaŵa mama na mudumbu wa msungwana wa vyaka 12 uyo wakafwa pakwambilira. Kweniso ŵabali na ŵadumbu 11 ŵachali mu chipatala.

Ofesi ya munthavi ya India yikazomerezgeka kunozga ungano wapadera uwo ukachitika pa November 4, 2023 na chilato chakuti ŵakhozge na kupembuzga awo ŵali kukhwaskika na soka ili. Ŵabali na ŵadumbu ŵakufuma mu mipingo 21 awo ŵakuchitira ungano pa malo apo pakaphulika mabomba, ŵakachemeka kuti ŵategherezge pulogiramu iyi. Pulogiramu iyi yikachitikira mu Nyumba ya Ufumu umo mukaŵa ŵanthu pafupifupi 200. Ndipo ŵanyake ŵakukwana 1,300 ŵakajoyina pulogiramu iyi kwizira pa videoconference. Kweniso ŵakajambura pulogiramu iyi kuti awo ŵakaŵa mu chipatala nawo ŵakapulikizge. Mubali mulara munyake wakufuma ku ofesi ya munthavi wakaŵerenga lemba la Salimo 23:1 na kulongosora kuti Yehova wakupwelelera chomene muteŵeti wake waliyose. Iyo wakati: “Mu vesi ili wamasalimo wakayowoya kuti Yehova ni muliska waka yayi, nesi kuŵa waka muliska muwemi. Kweni wakati Yehova ni ‘muliska wane.’ Fundo iyi njakukhozga chomene kumanya kuti Yehova ngwakunweka na waliyose wa ise!”

Mubali uyo wakaŵapo apo mabomba agha ghakaphulikanga wakuyowoya kuti usiku vikumusuzga kuti wagone makora. Nangauli vili nthena, kweni iyo wakajipeleka kovwira awo ŵachali mu chipatala. Iyo wakuti: “Para nkhuwona kuti ŵali na chipulikano chakukhora kweniso kuti ŵakuwona vinthu mwakwenelera vikunovwira kuti niluweko ivyo nkhufipa navyo mtima. Nangauli ŵali kupwetekeka kweniso ŵakupulika vyakuŵinya, ŵanandi mwa iwo ŵakaŵa ŵakukondwa na kwimba sumu za Ufumu.” Mubali munyake wakayowoya kuti: “Tikumanya kuti patorenge nyengo kuti vinthu viŵeso makora ku ŵabali ŵithu aŵa, ndipouli tikumanya kuti ŵabali na ŵadumbu ŵithu ŵalutilirenge kuŵalongora chitemwa. Nkhukayika yayi kuti Chiuta withu wachitemwa waŵakora waliyose wa iwo na woko lake lankhongono. Ichi ntchakukhozga chomene!”