Pa November 28, 2020, Baibolo lose la Malemba Ghakupatulika mu Mang’anamuliro gha Charu Chiphya likafumiskika lakuchita kupulinta na la pa intaneti mu viyowoyero vinayi vya ku Indonesia: Chibatak (Karo), Chibatak (Toba), Chijavanese, na Chinias. Mubali Geoffrey Jackson, wa mu Wupu Wakulongozga, ndiyo wakadumba nkhani yakufumiska Mabaibolo agha iyo yikajambulikirathu ndipo mipingo ku Indonesia yikachita kuwonelera kwizira pa intaneti. Ŵanthu pafupifupi 41,265 ŵakajoyina kuti ŵawonelere pulogiramu iyi. Mubali Jackson wakapharazgaso kuti Baibolo la Malemba Ghakupatulika Mu Mang’anamuliro gha Charu Chiphya Mateyu-Uvumbuzi mu chiyowoyero cha Chisunda, lifumiskikenge mwasonosono pa intaneti.

Mabaibolo agha ghakafumiskika chifukwa chakuti awo ŵakuchita mulimo wakung’anamura ŵakaŵikapo mtima kuchita ntchito yawo kwa vyaka vyakujumpha vitatu na hafu. Pa ŵanthu ŵakujumpha 100 miliyoni pali ŵanyake awo ŵakuyowoya viyowoyero vinayi ivyo Mabaibolo agha ghang’anamulika. Chinyake ntchakuti, ŵapharazgi ŵakujumpha 2,600 ŵakuyowoya viyowoyero ivi mu upharazgi kweniso ku maungano.

Mazuŵa ghano ŵanandi ŵakughamanya makora yayi mazgu ghakale agho ghakusangika mu Mabaibolo ghanandi. Yumoza wa awo ŵakang’anamurako Mabaibolo agha wakuti: “Kuŵa na Baibolo lose la Malemba Ghakupatulika Mu Mang’anamuliro Gha Charu Chiphya kukunikhorweska kuti Yehova Chiuta wakukhumba kuti waliyose wapulike Mazgu ghake mu chiyowoyero chambura kusuzga kupulikiska na icho chikumufika pamtima.”

Daniel Purnomo, wa mu Komiti ya Munthavi ya Indonesia wakuti: “Tikukhala mu nyengo zakusuzga, chomenechomene sono apo kuli muliri wa COVID-19. Ŵabali na ŵadumbu ŵithu awo ŵapokera Mabaibolo agha mu viyowoyero vyawo ŵakuwonga chomene chawanangwa cha pa nyengo yake ichi.”

Tikuwonga chomene Yehova uyo wapangiska kuti chawanangwa chapadera ichi, icho ni Mazgu ghake, chifikire ŵanthu ŵanandi. Tili na chigomezgo chose kuti ŵanthu awo ŵakuyowoya viyowoyero ivi ŵasangenge chandulo chomene na ivyo Baibolo likusambizga.—Yakobe 1:17.