Pa April 4, 2021, ku Indonesia kukaputa chimphepo chakofya chomene chakuchemeka Seroja. Ntchito yakovwira kunozga nyumba za ŵabali ŵithu yikakhozga chomene chitemwa pakati pa ŵabali, kweniso yikawovwira chomene ŵanthu awo ŵakawonanga kuti ŵalumbe Yehova.

Mudumbu Ela Ludjipau, uyo wakukhala yekha na ŵana ŵake ndipo nyumba yake yikanozgeka na Komiti Yakovwira Para Kwachitika Soka, wakayowoya kuti: “Nangauli nkhukhala nekha na ŵana ŵane, kweni nkhajipulika kuti nili nekha yayi chifukwa cha wovwiri uwo ŵabali na ŵadumbu ŵakanipanga.” Mudumbu munyake zina lake Yuliana Baunsele, wakati: “Nkhati nawona ŵabali ŵakwiza kuzakanovwira pamanyuma pakuti soka lachitika waka, nkhakhorwa chomene kuluska kumanyuma kose kuti Yehova wakunipwelelera nadi.”

Mubali Dicky Thome, uyo wali mu Komiti Yakovwira Para Kwachitika Soka, wakati: “Ntchakukondweska chomene kuwona kuti Yehova wakovwira ŵabali na ŵadumbu awo ŵakukhumbikwira wovwiri. Tikakhozgeka chomene kuwona umo ŵabali na ŵadumbu ŵakawongera ŵati ŵapokera wovwiri. Chipulikano chithu chikakhora chomene kuwona ŵabali na ŵadumbu ŵakugomezga Yehova kuti waŵavikilirenge na kuŵawovwira.”

Mbabali na ŵadumbu pera yayi awo ŵakawona chitemwa ichi. Mubali Marsel Banunaek na banja lake ŵakukhala mu chigaŵa icho ŵanthu ŵanandi mbakukolerana yayi chifukwa cha kupambana mafuko. Ŵazengezgani ŵawo ŵakaŵasuskanga chomene Ŵakaboni ŵa Yehova. Ndipouli, Mubali Banunaek wakulongosora kuti ŵazengezgani ŵawo ŵakati ŵawona ŵabali na ŵadumbu ŵa mafuko ghakupambanapambana ŵakupeleka wovwiri ku banja lake, ŵazengezgani ŵanyake ŵakamuphalira kuti: “Vinthu ivyo tikaphalirika vyakukhwaskana na Ŵakaboni ŵa Yehova vikupambana chomene na umo mukuchitira.” Mubali Banunaek wakulongosora kuti: “Ŵazengezgani ŵithu ŵakazizwa chomene ŵati ŵawona chitemwa chithu na umo tiliri ŵakukolerana. Kweniso ŵabali ŵithu ŵakuthupi, ŵakajiwonera ŵekha lusungu lwa ŵabali na ŵadumbu. Pasono, ŵakutifumba mafumbo ghakukhwaskana na ivyo tikugomezga. Tikuwonga chomene chitemwa icho tili nacho pakati pithu!”

Mulara munyake wa boma, Yosi Duli Ottu, wakayowoya kuti umo Komiti Yakovwira Para Kwachitika Soka yikachitira vinthu, kweniso umo yikalondezgera ulongozgi wakujivikilira ku matenda gha COVID-19, chikaŵa “chiyelezgero” chiwemi chomene. Mulara wa boma uyu, wakaphalira komiti iyi kuti: “Nakhwaskika chomene na ivyo mwachitira ŵabwezi ŵinu. Mwachitapo kanthu mwaluŵiro kuti muŵawovwire ŵati ŵakhwaskika na soka. Muli na ndondomeko yiwemi yakovwira para kwachitika soka, ndipo muli na chilichose chakukhumbikwa kuti mufiske ntchito iyi.”

Masoka ghachilengiwa ghangananga katundu panji kuti vinthu ivyo tili navyo, kweni ghangananga yayi chitemwa chanadi icho Taŵakhristu tili nacho kweniso kukolerana kwithu. Ntchakukondweska chomene kuwona umo ‘milimo yiwemi’ yikukhozgera chitemwa chithu na kuchiska ŵanji “kupeleka uchindami” kwa Yehova!—Mateyu 5:16.