Malo ghakuwonerako umo Ŵakaboni ŵa Yehova ŵakalongolera chikanga apo ŵakatambuzgikanga na chipani cha Nazi ghali kujulika ku Israel pa March 7, 2022. Malo agha ghali pa chigaŵa cha Center for Humanistic Education ku Myuziyamu ya Ghetto Fighters’ House cha kumanjiliro gha dazi kwa Galilee ndipo vinthu vyake vili mu Chiarabic, Chingelezi, na Chihebere. Ghalutilirenge kuŵa ghakujula m’paka mu March 2023. Kuti ŵanozge makora vinthu vyakuti ŵanthu ŵazakaviwone, awo ŵakugwira ntchito mu myuziyamu iyi ŵakagwira ntchito lumoza na ŵabali na ŵadumbu ŵakujumpha 50 ŵakufuma mu vyaru vyakupambanapambana, ndipo ŵabali aŵa ŵakawovwira pa kufufuza mbiri, kudinda vithuzi, na kung’anamura vinthu vinyake ivyo vikakhumbikwanga.

Malo agha ghali na mutu wakuti “Wedontdothat,” kung’anamura “ise tikuchitako yayi ivyo.” Mazgu agha ghakaŵa zina ilo msilikari wa ku Germany wakapa Mubali Joachim Alfermann, yumoza wa Ŵakaboni ŵa Yehova awo ŵakajalirika mu jele na chipani cha Nazi. a Nangauli chipani cha Nazi chikamofya chomene Mubali Joachim, kumutimba mwankhaza, na kumujalira mu misasa yakuyuzgirako ŵanthu, kweni wakakana nipera kunjira usilikari, wakayowoya kuti: “Ise tikuchitako yayi ivyo.” Yaara Galor, uyo wakulinda malo agha, wakati: “Pa Ŵayuda ŵanandi awo ŵakakomeka pa vifukwa vyakupambanapambana, pakaŵaso ŵanthu ŵanyake mamiliyoni ghanandi awo ŵakakomekaso. . . . Waliyose wa ŵanthu aŵa wakakomeka pa vifukwa vyakupambana.”

Dr. Gideon Greif, uyo ni nkhwantha yakuwona vya kukomeka kwa ŵanthu ŵanandi kweniso wakusanda mbiri, wakayowoyapo pa pulogiramu yakujura malo agha ndipo wakayowoyapo vyakuti Ŵakaboni ŵa Yehova ŵakakananga kusayina chikalata chakuti ŵaleka chipulikano chawo. Iyo wakati: “[Ŵakaboni ŵa Yehova] ŵakatenge ŵaŵenge ŵanangwa mwambura kusuzga—kusayina chikalata kukatoranga waka miniti yimoza. Ivi vikulongora waka kuti nanga ni mu nyengo zakusuzga chomene mu mbiri ya ŵanthu, pakuŵa ŵanyake awo ŵakulutilira kuŵa na makhaliro ghawemi, kweniso mtima wambura kugaŵikana mu vyakuchita na mazgu. Ntheura mphake kuti tiyowoyenge vyakukhwaskana na Ŵakaboni ŵa Yehova, kuŵakumbukira, kusambira vya iwo, nanga kungaŵa kusambizga ŵanji vya iwo.”

Mudumbu munyake uyo wakuteŵetera pa ofesi ya munthavi ya Israel ndipo wakaŵapo pakujura malo ghakuwonerako mbiri agha wakati: “Nkhathiska masozi chifukwa cha kuwona waka kuti tili na malo agha kuno ku Israel mu myuziyamu iyo waliyose wangiza kuzakawona . . . Chikaŵa chinthu chapadera chomene kupulika awo ŵakugwira ntchito mu myuziyamu iyi ŵakuyowoya kuti ‘Ŵakaboni ŵa Yehova’ mu Chihebere. Nkhukayika yayi napachoko kuti zina la Yehova likapika uchindami pa chakuchitika ichi.”

Tili na chigomezgo chose kuti awo ŵalutenge kukawona malo agha ŵasambirenge vinandi pa nkhani ya chikanga na chipulikano icho ŵabali na ŵadumbu ŵithu ŵakalongora apo ŵakatambuzgikanga na chipani cha Nazi ku Germany. Chiyelezgero chawo chiwemi chiwovwirenge ŵateŵeti ŵa Yehova ŵa mazuŵa ghano kuti ŵalutilire ‘kuzizipizga apo ŵakuchimbira pa chiphalizgano.’—Ŵahebere 12:1.