Charu cha Italy ntchimoza mwa vyaru ivyo vyakhwaskika chomene na muliri wa COVID-19. Wupu Wakulongozga ukupeleka ulongozgi ku Ofesi ya munthavi ya Italy, wa umo ŵangachitira kuti ŵawovwire ŵabali na ŵadumbu mwakuthupi kweniso mwauzimu.

Pali makomiti ghatatu agho ghakovwira para kwachitika soka, ndipo ghakupeleka wovwiri ku ŵabali na ŵadumbu ŵa mu vigaŵa vya kumpoto, pakati na kumwera kwa Italy. Ŵabali ŵa mu makomiti agha ŵakufumbanga ŵalaŵiliri ŵa dera kuti ŵamanye vinthu ivyo ŵabali na ŵadumbu ŵakukhumbikwira. Ŵalaŵiliri ŵa dera aŵa ŵakupokeranga malipoti kufuma ku ŵalara, ghaumo vinthu viliri ku mipingo yawo.

Padera pa wovwiri wakuthupi, ŵalara ŵakovwiraso ŵapharazgi kuti ŵalutilire kuchita vinthu vyauzimu. Mubali Villiam Boselli, uyo ni mulaŵiliri wa dera ndipo wakuteŵetera kufupi na msumba wa Milan uwo ukaŵa umoza mwa misumba yakwamba kukhwaskika na muliri uwu, wakuti: “Nangauli ŵabali ŵakukhala mu nyumba zawo, kweni wose ŵakulutilira kuyowoyeskana. Kweniso chifukwa chakuti pasono ŵakuchita maungano pa pulogiramu yinyake ya pa kompyuta, vikovwira kuti ŵakhozganenge kweniso kuti ŵazgorengepo pa maungano. Nanga mbabali na ŵadumbu awo mbachekuru, nawo ŵakukhozgeka chomene na nthowa yiphya yakuchitira maungano iyi. Nkhuwona kuti sono mipingo njakukolerana chomene nkhanira!”

Nakuti pasono ŵanthu ŵanandi awo Mbakaboni ŵa Yehova yayi, nawo ŵakuwonelera maungano agha pamoza na ŵabali ŵawo awo Mbakaboni. Mudumbu munyake wakuti: “Mfumu wane wakakhumbanga yayi kuluta ku maungano, kweni sono maungano agha ghiza panyumba ndipo wakuwonelera. Nakuti wakukondwa nagho chomene!”

Ŵabali na ŵadumbu ŵakugwiliskira ntchito m’pata uliwose uwo wasangika kuti ŵapharazge. Mwachiyelezgero, mudumbu munyake uyo wakalutanga kukapeleka njinga ya ŵanthu ŵakulemara ku mudumbu munyake muchekuru, wakakumana na ŵapolisi ŵatatu awo ŵakamuyimika pa nthowa. Mudumbu uyu wakaŵalongosolera kuti wakuluta kukawovwira mwanakazi muchekuru ndipo wakaŵalongora vikalata vyakumuzomerezga kuchita nthena. Paumaliro wakaŵapaso mathirakiti ghakuti Kasi Mukughanaghana Kuti Vinthu Viŵenge Wuli Kunthazi? kweniso la Kasi Masuzgo Ghamalenge? Ŵapolisi aŵa ŵakazomera kupoka mathirakiti agha. Apo mudumbu uyu wakawelangako, ŵapolisi aŵa ŵakamuyimikaso. Kweni pa nyengo iyi, ŵapolisi aŵa ŵakamuwonga mudumbu uyu na kumupempha kuti waŵaphalirekoso vinthu vinyake ivyo Baibolo likuyowoya kuti vichitikenge munthazi. Ŵapolisi aŵa ŵakachemaso ŵanyawo ŵaŵiri kuti nawo ŵaŵepo pakudumbiskan. Mudumbu uyu wakakondwa chomene ndipo wakaŵalongora webusayiti yithu ya jw.org. Mpolisi munyake wakaphalira mudumbu uyu kuti, “Tawonga chomene chifukwa cha kutiphalirako vinthu vyakukondweska ivi!”

Mubali Boselli wakuti: “Nangauli udindo wane unyake ngwakuti nikhozge na kusanguluska ŵanji, kweni ine ndine nkhukhozgeka chomene para nkhuwona ŵabali ŵakulutilira kuŵa paubwezi wakukhora na Yehova na kulutilira kumusopa. Ŵabali na ŵadumbu ŵakulongora kuti ŵakumutemwa nadi Yehova ndipo ivi vikunikhozga chomene. Ŵabali na ŵadumbu aŵa ni vyawanangwa nadi vyakufuma kwa Yehova, ndipo ŵakutikhozga chomene!”

Vikuwonekerathu kuti nangauli ŵabali ŵithu ŵali mu nyengo yakusuzga, kweni ŵakulutilira kukhozga ubwezi wawo na Yehova ndipo ‘ŵakusunkhunyika yayi na suzgo ili.’—1 Ŵatesalonika 3:2, 3.