Khoti Likuru la ku Italy laŵikira kumanyuma Kaboni wa Yehova pa nkhani ya wanangwa uwo mulwari wali nawo wakusankha yekha wovwiri wa munkhwala uwu wangapika. Pa December 23, 2020, Khoti Likuru likakolerana na chigamuro icho khoti lakwamba likadumura kuti mulwari waliyose wali na wanangwa wakusankha wovwiri wa chipatala uwo wakukhumba, kusazgapo kukana kupokera wovwiri wa chipatala uwo ukususkana na ivyo wakugomezga.

Mulandu uwu ukukhwaskana na ivyo vikachitika mu 2005, apo madokotala ghakaswa wanangwa wa mudumbu withu. Pambere mudumbu uyu ŵandamupange opareshoni, wakaŵaphalira mwakupulikikwa makora kuti kumuŵika ndopa yayi kweniso wakaŵalongora kadi lakukana ndopa la Mazaza gha Mwimiliri pa Umoyo Wane. Kweni madokotala ghakazerezga ivyo wakaŵaphalira ndipo ŵakamuŵika ndopa mwakuwerezgawerezga.

Khoti likati “kukana kuŵikika ndopa ni wanangwa waka wa munthu yayi, kweni munthu wakusankha yekha kuchita nthena chifukwa cha ivyo wakugomezga.” Khoti likati wanangwa uwu “ngwapadera” ndipo ngwakuvikilirika na malango.

Mulandu uwu ngumoza mwa milandu 10 iyo Khoti Likuru ku Italy lili kuŵikira kumanyuma Ŵakaboni ŵa Yehova kwambira mu 2015. Pa milandu iyi Khoti likakolerananga nase kweniso kuzirwiska wanangwa withu wa kusopa. Milandu iyi yikakhwaskanga nkhani zakulondezgapo izi:

• Kukana kupokera ndopa: Ŵakaboni ŵa Yehova ŵakukhumba kuti ŵapokerenge wovwiri uwemi uwo ukusangika ku chipatala, ndipo ŵakuzomera wovwiri unandi wa chipatala. Makhoti ghazomerezga kuti Ŵakaboni ŵa Yehova mbanangwa kusankha wovwiri wa chipatala uwo ukukolerana na njuŵi yawo yakusambizgika Baibolo. Madokotala ghakwenera kuchindika ivyo mulwari wasankha, nga nkhukana kumuŵika ndopa. Mulwari wali na wanangwa wakupanga yekha chakusankha pa nkhani iyi kuyana na ivyo wakugomezga.

• Kulera mwana: Ŵapapi awo Mbakaboni ŵa Yehova ŵali na wanangwa wakuyana waka na ŵapapi wose, wakusambizga ŵana ŵawo ivyo ŵakugomezga pa nkhani ya chisopa.

• Kusezga munthu mu mpingo: Ŵakaboni ŵa Yehova ŵakumuchitira nkhaza yayi munthu uyo wasezgeka mu mpingo. M’malo mwake, mbanangwa kusankha kuleka kuchitira nayo lumoza vinthu munthu uyo wasezgeka mu mpingo, chifukwa ni wanangwa wawo kuchita nthena ndipo ŵanthu ŵakwenera kuchindika wanangwa wawo uwu.

• Kupeleka misonkho: Ŵakaboni ŵa Yehova ŵakupeleka misonkho ntheura nawo mbanangwa nga ni umo viliri na visopa vinyake vyose ku Italy nanga mpha nkhani ya kupeleka msonkho wa malo ghawo ghakusoperapo.

Tikukhozgeka chomene para ŵalara ŵa boma ŵakupanga malango agho ghakuvikilira wanangwa wa ŵanthu ŵa Yehova kuti nawo ŵasopenge mwakufwatuka.—Zintharika 21:1.