Mwasonosono apa, Khoti la Apilu ku Milan, Italy, laŵikira kumanyuma banja linyake la Ŵakaboni ŵa Yehova pa mulandu wakukhwaskana na wovwiri wa ku chipatala wa mwana wawo. Chigamuro ichi chawovwira makhoti kumanya fundo yakuti ghakwenera yayi kupoka mazaza agho ŵapapi ŵali nagho pa ŵana ŵawo chifukwa waka chakuti ŵapempha madokotala kuti ghawovwire ŵana ŵawo na nthowa zinyake zambura kugwiliskira ntchito ndopa. Khoti likati ŵapapi aŵa ŵali na wanangwa wakusankha nthena chifukwa cha vigomezgo vyawo vya chisopa.

Mu September 2019, ŵakutorana ŵanyake awo Mbakaboni, ŵakaluta ku chipatala na mwana wawo wa myezi 10, chifukwa wakawa na kupwetekeka. Madokotala ghakasanga kuti mwana uyu wakapwetekeka chomene ku mutu ndipo wakakhumbikwiranga kumupanga opareshoni. Madokotala agha ghakafiska kupanga opareshoni iyi kwambura kumuŵika ndopa.

Kweni kufuma apo, nangauli mwana wakamba kuŵako makora ndipo ŵakamufumiskako ku chipinda cha awo umoyo wawo uli pa ngozi chomene, dokotala wakapempha ŵapapi aŵa kuti wakukhumba kumuŵika ndopa mwana uyu “kuchitira kuti panji vingasuzga.” Ŵapapi aŵa ŵakapempha kuti mbwenu mwana wawo ŵamovwire na nthowa zinyake zambura kugwiliskira ntchito ndopa.

M’malo mwa kupulika ivyo ŵapapi ŵa mwana uyu ŵakapempha, dokotala wakaphara ku polisi kweniso ku ofesi ya wakwimira boma pa milandu. Ofesi ya wakwimira boma pa milandu yikatora chikalata ku khoti la kuwona vya mabanja. Chikalata ichi chikapoka mazaza agho ŵapapi aŵa ŵakaŵa nagho pa nkhani yakusankhira wovwiri wa chipatala mwana wawo na kughapeleka kwa mulara wa chipatala ichi. Ndipouli, mwana uyu ŵakamuŵika ndopa yayi chifukwa madokotala ghakawona kuti zikukhumbikwaso yayi.

Chakuchitika ichi chikapangiska kuti ŵamutolamakani ŵanandi ŵalembe vya nkhani iyi. Ŵamutolamakani ŵanandi ŵa ku Italy ŵakalemba nkhani iyi mwakubudika, ndipo ŵakatenge umoyo wa mwana uyu ukaponoskeka chifukwa chakuti khoti likazomerezga kuti waŵikike ndopa.

Pa September 10, 2020, Khoti la Apilu likasuska ivyo khoti la kuwona vya mabanja likachita pa kuzomerezga kupeleka chikalata cha kupoka mazaza gha ŵapapi aŵa. Khoti la Apilu ili likayowoyaso kuti khoti lakuwona vya mabanja likeneranga kupeleka chikalata chanthena ichi yayi ndipo likaŵavya mazaza gha kweruzga nkhani iyi.

Pa kupeleka chigamuro ichi, Khoti la Apilu la Milan likati: “Pakuti waka ŵapapi ŵakakana kuti mwana wawo waŵikike ndopa chifukwa cha vigomezgo vya chisopa chawo, ntchifukwa chakukwana yayi chakuŵapokera mazaza agho ŵali nagho pa mwana wawo.” Mu chaka chamara pera, Makhoti ghatatu gha Apilu ku Italy ghakaŵikira kumanyuma wanangwa wa ŵapapi awo Mbakaboni wakuti ŵasankhirenge ŵana ŵawo wovwiri wa ku chipatala wambura kugwiliskira ntchito ndopa.

Ntchakuzirwa chomene kuti ŵakuwona vya malango kweniso ŵa vya chipatala, ŵapulikiske fundo yakuti Ŵakaboni ŵa Yehova ŵakuchizgana mwamunthondwe yayi, ndipo ŵakukana yayi wovwiri wa ku chipatala. Kweni para ŵaluta ku chipatala, ŵakukhumba wovwiri uwemi uwo ukukolerana na ivyo iwo ŵakugomezga pa nkhani ya chisopa. Iwo ŵakupempha waka madokotala kuti ghaleke kuŵaŵika ndopa para ghakuŵawovwira. Madokotala ghanandi ghakumanyikwa mu vipatala vikuruvikuru pa charu chose ghali kupulikiska fundo iyi, ndipo ghakuŵikapo mtima kuŵawovwira kwambura kugwiliskira ntchito ndopa.

Ndise ŵakukondwa chomene kuti ivyo makhoti agha ghakudumura, vikovwira ŵabali na ŵadumbu ŵithu apo ŵakulutilira kusankha mwamahara pa nkhani ya wovwiri wa ku chipatala wa ŵana ŵawo.—Milimo 15:29.